ಇಂದೇ ದಿಗ್ಗಜನ​ ದಾಖಲೆ ಉಡೀಸ್! ಆಂಗ್ಲರ ಮಣ್ಣಿನಲ್ಲಿ 'ವಂಡರ್​ ಕಿಡ್'​​ ಆಡೋದು ಪಕ್ಕಾ ಅನ್ನೋದಕ್ಕೆ ಇದೇ ಸಾಕ್ಷಿ

Vaibhav Sooryavanshi: ಪ್ರಸಕ್ತ ನಡೆಯುತ್ತಿರುವ ಐದು ಟಿ20 ಪಂದ್ಯಗಳ ಇಂಗ್ಲೆಂಡ್​ ಸರಣಿಯ ಎರಡನೇ ಪಂದ್ಯದಲ್ಲಿ ಟೀಮ್ ಇಂಡಿಯಾದ ಯುವ ಬ್ಯಾಟಿಂಗ್ ಸೆನ್ಸೇಷನ್​ ವೈಭವ್ ಸೂರ್ಯವಂಶಿ ಕಣಕ್ಕಿಳಿಯುವುದು 100ಕ್ಕೆ 100 ಖಚಿತ ಎಂಬ ಮಾತುಗಳು ಕೇಳಿಬಂದಿವೆ. ಅದಕ್ಕೆ ಕಾರಣವೇ, ವಂಡರ್​ ಕಿಡ್​ ಹಾಕಿಕೊಂಡಿರುವ ಹೊಸ ಪೋಸ್ಟ್​.

ಐರ್ಲೆಂಡ್​ ಸರಣಿಯ ಎರಡು ಟಿ20 ಪಂದ್ಯಗಳಿಂದಲೂ ವೈಭವ್​ರನ್ನು ಕೈಬಿಟ್ಟ ಮ್ಯಾನೇಜ್​ಮೆಂಟ್​ಗೆ ಆಗಿದ್ದು ಭಾರಿ ಮುಖಭಂಗ. ಈಗ ಇಂಗ್ಲೆಂಡ್​ ಸರಣಿಯನ್ನು ಆಡುತ್ತಿರುವ ಟೀಮ್ ಇಂಡಿಯಾ, ಇಲ್ಲಿಯೂ ಸೂರ್ಯವಂಶಿಯನ್ನು ತಂಡದಿಂದ ಹೊರಗಿಟ್ಟಿದೆ. ಇದು ಅಪಾರ ಸಂಖ್ಯೆಯ ಕ್ರಿಕೆಟ್​ ಪ್ರೇಮಿಗಳ ಅಸಮಾಧಾನಕ್ಕೆ ಕಾರಣವಾಗಿದೆ. ಐರಿಶ್ ಎದುರು ಕ್ಲೀನ್​ಸ್ವೀಪ್​ ಆದಂತೆ ಇಂಗ್ಲೆಂಡ್​ನಲ್ಲಿ ಆಗಬಾರದು ಎಂದರೆ, ತಂಡದಲ್ಲಿ ವೈಭವ್​ಗೆ ಸ್ಥಾನ ಕೊಡಬೇಕು ಎಂದು ​ಪಟ್ಟು ಹಿಡಿಯಲಾಗಿದೆ.

ಆಡಿರುವ ಮೂರು ಪಂದ್ಯಗಳಲ್ಲಿ ಸತತವಾಗಿ ಫ್ಲಾಪ್​ ಪ್ರದರ್ಶನ ನೀಡಿರುವ ಸಂಜು ಸ್ಯಾಮ್ಸನ್​ರನ್ನು ಹೊರಗಿಟ್ಟು, ಅವರ ಸ್ಥಾನಕ್ಕೆ ವೈಭವ್​ಗೆ ಅವಕಾಶ ಕೊಡಿ ಎಂದರೂ ಗೌತಮ್​ ಗಂಭೀರ್​ ನೇತೃತ್ವದ ಮ್ಯಾನೇಜ್​ಮೆಂಟ್​ ಇದಕ್ಯಾಕೋ ಮನಸ್ಸು ಮಾಡುತ್ತಿಲ್ಲ. ಇದರಿಂದ ತೀವ್ರ ಸಿಡಿಮಿಡಿಗೊಂಡಿರುವ ಕ್ರಿಕೆಟ್​ ಅಭಿಮಾನಿಗಳಿಗೆ ಈಗ ವೈಭವ್ ಹಾಕಿರುವ ಪೋಸ್ಟ್​ವೊಂದು​ ಆಂಗ್ಲರ ಮಣ್ಣಿನಲ್ಲಿ ಅವರ ಎಂಟ್ರಿ ಖಚಿತ ಎಂಬುದನ್ನು ಪರೋಕ್ಷವಾಗಿ ಹೇಳಿದೆ.

'ಹೊಸ ಅಧ್ಯಾಯ' ಎಂದು ತಮ್ಮ ಇನ್​ಸ್ಟಾಗ್ರಾಮ್​ ಸ್ಟೋರಿಯಲ್ಲಿ ಬರೆದುಕೊಂಡಿರುವ ವೈಭವ್​, ಎರಡನೇ ಟಿ20 ಪಂದ್ಯದಲ್ಲಿ ಟೀಮ್ ಇಂಡಿಯಾ ಪರ ಆಡುವ ಅವಕಾಶ ಸಿಕ್ಕಿದೆ ಎಂಬುದನ್ನು ಒತ್ತಿ ಹೇಳಿದಂತಿದೆ. ಆದರಿದು ಎಷ್ಟು ನಿಜ ಅನ್ನೋದನ್ನು ಭಾರತ ತಂಡ ಹೊರಬಿಡಲಿರುವ ಪ್ಲೇಯಿಂಗ್​ 11 ನೋಡಿಯೇ ಖಚಿತಪಡಿಸಿಕೊಳ್ಳಬೇಕಿದೆ. ಆದರೆ, ಕ್ರಿಕೆಟ್​ ಪ್ರಿಯರು ಬಯಸುತ್ತಿರುವುದು ಮಾತ್ರ ಒಂದೇ. ಇಂದಿನ ಪಂದ್ಯದಲ್ಲಿ ವೈಭವ್​ ಕಣಕ್ಕಿಳಿಯಬೇಕು, ಸಚಿನ್​ ತೆಂಡೂಲ್ಕರ್​ ಅವರ ದಾಖಲೆಯನ್ನು ಮುರಿಯಬೇಕೆಂದು. ಇಲ್ಲಿ ಮ್ಯಾನೇಜ್​ಮೆಂಟ್​ ಲೆಕ್ಕಾಚಾರ ಏನಿದೆ ಎಂಬುದನ್ನು ಸದ್ಯ ಕಾದು ನೋಡಬೇಕು,(ಏಜೆನ್ಸೀಸ್).