ಪಂದ್ಯಕ್ಕೂ ಮುನ್ನ ಅದನ್ನು ನೋಡಿಯೇ ಹೋಗೋದು...LSG ಎದುರು ಪಂದ್ಯ ಗೆದ್ದ ಬೆನ್ನಲ್ಲೇ 'ಬೇಬಿ ಬಾಸ್'​ ಹೇಳಿಕೆ ವೈರಲ್

Vaibhav Sooryavanshi: ಪ್ರಸ್ತುತ ನಡೆಯುತ್ತಿರುವ 19ನೇ ಆವೃತ್ತಿಯ ಐಪಿಎಲ್​ನಲ್ಲಿ ತಮ್ಮ ಬಿರುಗಾಳಿ ಬ್ಯಾಟಿಂಗ್​ ಮೂಲಕವೇ ಸಖತ್​ ಸದ್ದು ಮಾಡುತ್ತಿರುವ ರಾಜಸ್ಥಾನ ರಾಯಲ್ಸ್‌ ತಂಡದ ಯುವ ಸೆನ್ಸೇಷನ್ ವೈಭವ್ ಸೂರ್ಯವಂಶಿ, ಶೀಘ್ರದಲ್ಲೇ ಟೀಮ್​ ಇಂಡಿಯಾಗೆ ಪಾದರ್ಪಣೆ ಮಾಡುವುದು ಬಹುತೇಕ ಖಚಿತ ಎಂದೇ ಹೇಳಲಾಗುತ್ತಿದೆ. ಈ ಮಧ್ಯೆ, ಐಪಿಎಲ್​ನಲ್ಲಿ ಆರ್​ಆರ್​ಗೆ ಓಪನರ್​ ಆಗಿ ಮಿಂಚುತ್ತಿರುವ ಈ ಯುವ ಬ್ಯಾಟರ್​, ತನ್ನ ಬ್ಯಾಟ್​ನಿಂದ ಮಾತ್ರವಲ್ಲ, ಮಾತುಗಳಿಂದಲೂ ಕ್ರಿಕೆಟ್​ ಪ್ರಿಯರ ಗಮನವನ್ನು ಸೆಳೆಯುತ್ತಿದ್ದಾರೆ.

ಕಳೆದ ವರ್ಷ ಮತ್ತು ಪ್ರಸಕ್ತ ನಡೆಯುತ್ತಿರುವ ಐಪಿಎಲ್​ನಲ್ಲಿ ಹಲವು ದಾಖಲೆಗಳನ್ನು ನಿರ್ಮಿಸುತ್ತಿರುವ 15 ವರ್ಷದ ಪೋರ, ತಾನು ಟೀಮ್ ಇಂಡಿಯಾದ ಭವಿಷ್ಯದ ಭರವಸೆಯ ಆಟಗಾರ ಎಂಬ ಮುನ್ಸೂಚನೆಯನ್ನು ಅದಾಗಲೇ ಕ್ರೀಡಾಭಿಮಾನಿಗಳಿಗೆ ಮತ್ತು ಬಿಸಿಸಿಐ ಆಯ್ಕೆಗಾರರಿಗೆ ನೀಡಿರುವುದು ಗಮನಾರ್ಹ. 19ನೇ ಆವೃತ್ತಿಯಲ್ಲಿ ರಾಜಸ್ಥಾನ ಪರ ಕ್ರೀಸ್​ಗಿಳಿಯುತ್ತಿರುವ ವೈಭವ್, ಎದುರಾಳಿ ತಂಡದ ಅನುಭವಿ ಬೌಲರ್​ಗಳಿಗೆ ಬೆಂಡೆತ್ತುತ್ತಿರುವುದು ನೋಡುಗರಿಗೆ ಭರ್ಜರಿ ಮನರಂಜನೆ ನೀಡುತ್ತಿದೆ.

ಅಂತೆಯೇ, ನಿನ್ನೆ (ಏ.22) ನಡೆದ ಲಖನೌ ಸೂಪರ್ ಜೈಂಟ್ಸ್​ ವಿರುದ್ಧ ಪಂದ್ಯದಲ್ಲಿ ಕಳಪೆ ಬ್ಯಾಟಿಂಗ್ ಪ್ರದರ್ಶನ ತೋರಿದ ಸೂರ್ಯವಂಶಿ, ಪಂದ್ಯ ಗೆದ್ದ ಬಳಿಕ ಮಾತನಾಡಿ, ನನಗೆ ಈಗಲೂ ಟಿವಿಯಲ್ಲಿ ಕಾರ್ಟೂನ್​ ನೋಡುವ ಅಭ್ಯಾಸವಿದೆ ಎಂದರು. ಇದು ಅವರನ್ನು ಪ್ರಶ್ನಿಸಿದ ಕಮೆಂಟೇಟರ್​ಗೆ ಒಂದು ನಿಮಿಷ ನಗು ತರಿಸಿತು. ಆಟದ ಮೇಲೆ ಸಂಪೂರ್ಣ ಫೋಕಸ್​ ಇದೆ. ಅದರೊಟ್ಟಿಗೆ ಕಾರ್ಟೂನ್​ ಕೂಡ ನೋಡುವುದನ್ನು ಮುಂದುವರಿಸಿದ್ದೇನೆ ಎಂದಿದ್ದಾರೆ.

ಪ್ರತಿ ಪಂದ್ಯಕ್ಕೂ ಮೊದಲು ನಾನು ಕಾರ್ಟೂನ್​ ನೋಡುತ್ತೇನೆ. ಅದನ್ನು ಮುಗಿಸಿಕೊಂಡು ಮೈದಾನಕ್ಕೆ ಹೋಗುತ್ತೇನೆ. ಆದರೆ, ಅಖಾಡದಲ್ಲಿ ನಿಂತಾಗ ನನ್ನ ಸಂಪೂರ್ಣ ಗಮನ ಆಟದ ಮೇಲಿರುತ್ತದೆ. ಈ ಪಂದ್ಯವನ್ನು ಗೆದ್ದು ಎರಡು ಪಾಯಿಂಟ್​ಗಳನ್ನು ಪಡೆದುಕೊಂಡಿದ್ದೇವೆ. ಖಂಡಿತ ಪ್ಲೇಆಫ್​ಗೆ ಎಂಟ್ರಿ ಕೊಡ್ತೇವೆ. ಮುಂದಿನ ಪಂದ್ಯಗಳಲ್ಲಿ ನನ್ನಿಂದ ಉತ್ತಮ ಪ್ರದರ್ಶನ ಬರಲಿದೆ ಎಂದರು,(ಏಜೆನ್ಸೀಸ್).