ಕಡೆಗೂ ಕ್ಯಾಪ್ಟನ್​ ತಿಲಕ್​ ಮಾತನ್ನು ನಿಜವಾಗಿಸಿದ ವೈಭವ್​! ವಿಶ್ವ ದಾಖಲೆ ಬರೆದ ಬೇಬಿ ಬಾಸ್​​ ಆಟಕ್ಕೆ ಕ್ರಿಕೆಟ್​ ಜಗತ್ತೇ ಫಿದಾ

Vaibhav Sooryavanshi: ದಂಬುಲ್ಲಾ ಅಂತಾರಾಷ್ಟ್ರೀಯ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ತ್ರಿಕೋನ ಸರಣಿಯ ಫೈನಲ್‌ನಲ್ಲಿ ಟೀಮ್ ಇಂಡಿಯಾ ಯುವ ಬ್ಯಾಟಿಂಗ್ ಸೆನ್ಸೇಷನ್ ವೈಭವ್ ಸೂರ್ಯವಂಶಿ ಮೈದಾನದಲ್ಲಿ ರನ್​ ಹೊಳೆಯನ್ನೇ ಹರಿಸಿದ್ದಾರೆ. ಕೇವಲ 29 ಎಸೆತಗಳಲ್ಲಿ 94 ರನ್ ರಚ್ಚಿದ ವಂಡರ್​ ಕಿಡ್​, ತಮ್ಮನ್ನು ಕೆಣಕಿದ ಲಂಕಾ ಪಡೆಯ ಬೌಲರ್​ಗಳಿಗೆ ಮುಟ್ಟಿ ನೋಡಿಕೊಳ್ಳುವಂತೆ ಉತ್ತರಿಸಿದ್ದಾರೆ. ಇದಕ್ಕೂ ಮೊದಲು ಕ್ಯಾಪ್ಟನ್ ತಿಲಕ್ ವರ್ಮಾ ಹೇಳಿದ ಮಾತನ್ನು ಕಡೆಗೂ ವೈಭವ್ ಉಳಿಸಿಕೊಂಡಿದ್ದಾರೆ.

ಶ್ರೀಲಂಕಾ ವಿರುದ್ಧದ ಕಳೆದ ಪಂದ್ಯದಲ್ಲಿ ವೈಭವ್​ರನ್ನು ಕೆಣಕಿದ್ದ ಲಂಕಾ ಆಟಗಾರರು, ಮೈದಾನದಲ್ಲೇ ಸ್ಟಾರ್​ ಕಿಡ್​ನ ಕಿಚ್ಚಾಯಿಸಿದ್ದರು. ಆದರೆ, ಇಂದಿನ ಅಂತಿಮ ಕಾಳಗದಲ್ಲಿ ಕೇವಲ 11 ಎಸೆತಗಳಲ್ಲಿ ಸ್ಫೋಟಕ ಅರ್ಧಶತಕ ಬಾರಿಸಿದ ವೈಭವ್ ಸೂರ್ಯವಂಶಿ, ಬರೋಬ್ಬರಿ 324.14 ಸ್ಟ್ರೈಕ್​ರೇಟ್​ನಲ್ಲಿ 10 ಬೌಂಡರಿ, 8 ಸಿಕ್ಸರ್​ಸಹಾಯದಿಂದ 94 ರನ್​ ಸಿಡಿಸಿ ಶತಕದಿಂದ ವಂಚಿತರಾದರು. ಕೇವಲ ಟಿ20 ಕ್ರಿಕೆಟ್​ನಲ್ಲಿ ಅಬ್ಬರಿಸುತ್ತಿದ್ದ ವೈಭವ್​, 50 ಓವರ್​ನಲ್ಲಿಯೂ ತಮ್ಮ ಅಮೋಘ ಬ್ಯಾಟಿಂಗ್ ಪ್ರದರ್ಶನ ಮುಂದುವರಿಸಿದ್ದನ್ನು ನೋಡಿ ಇಡೀ ಕ್ರಿಕೆಟ್​ ಜಗತ್ತೇ ನಿಬ್ಬೆರಗಾಗಿದೆ. ​

50 ಓವರ್​ ಕ್ರಿಕೆಟ್​ನಲ್ಲಿ ಕೇವಲ 11 ಎಸೆತಗಳಲ್ಲಿ 50 ರನ್​ ಸಿಡಿಸುವ ಮೂಲಕ ವೈಭವ್​, ಅತ್ಯಂತ ವೇಗವಾಗಿ ಅರ್ಧಶತಕ ದಾಖಲಿಸಿದ ಆಟಗಾರನಾಗಿ ಹೊರಹೊಮ್ಮಿದ್ದಾರೆ. ಏಕದಿನ ಕ್ರಿಕೆಟ್ ಇತಿಹಾಸದಲ್ಲಿ (ಲಿಸ್ಟ್-ಎ ಕ್ರಿಕೆಟ್) ಅರ್ಧಶತಕ ಪೂರೈಸಿದ ಅತ್ಯಂತ ವೇಗದ ಬ್ಯಾಟ್ಸ್‌ಮನ್ ಎಂಬ ದಾಖಲೆ ಈಗ ವೈಭವ್ ಹೆಸರಿಗೆ ಸೇರಿರುವುದು ಭಾರತೀಯ ಕ್ರಿಕೆಟ್​ ಪ್ರೇಮಿಗಳಲ್ಲಿ ಸಂತಸ ಮೂಡಿಸಿದೆ.

ಶ್ರೀಲಂಕಾ ವಿರುದ್ಧ ಕಳೆದ ರೋಚಕ ಸೂಪರ್​ ಓವರ್​ ಹಂತದ ಪಂದ್ಯದಲ್ಲಿ ವೈಭವ್ ಮತ್ತು ಶ್ರೀಲಂಕನ್​ ಆಟಗಾರ ವಿಶೆನ್ ಹಲಂಬಗೆ ಮಧ್ಯೆ ತೀವ್ರ ವಾಗ್ವಾದ ನಡೆಯಿತು. ಈ ಸಂದರ್ಭದಲ್ಲಿ, ಮಾತಿಗೆ ಮಾತು ಬೆಳೆದು, ಪರಸ್ಪರ ತಳ್ಳಾಟ ಕೂಡ ನಡೆಯಿತು. ಇದು ದೊಡ್ಡ ವಿವಾದಕ್ಕೂ ಕಾರಣವಾಯಿತು. ಶ್ರೀಲಂಕಾ ಆಟಗಾರರ ಮಾತಿನಿಂದ ಮನನೊಂದ ವೈಭವ್​ಗೆ ತಂಡದ ನಾಯಕ ತಿಲಕ್ ವರ್ಮಾ ಒಂದು ಮಹತ್ವದ ಸಲಹೆಯನ್ನು ನೀಡಿದ್ದರು. ಯಾವುದೇ ಕಾರಣಕ್ಕೂ ಮುಂದಿನ ಪಂದ್ಯದಲ್ಲಿ ನೀನು ಬ್ಯಾಕ್​ ಆಗಬಾರದು. ನಿನ್ನ ತನದಲ್ಲಿಯೇ ಆಡಬೇಕು. ನಿನಗೆ ನನ್ನ ಸಂಪೂರ್ಣ ಬೆಂಬಲವಿದೆ ಎಂದು ಹೇಳಿದ್ದರು. ಕಡೆಗೂ ಆ ಮಾತಿನಂತೆಯೇ ವೈಭವ್ ಆಡಿರುವುದು ಕ್ಯಾಪ್ಟನ್​ಗೆ ಖುಷಿ ತಂದಿದೆ. ​

"ನಾನು ವೈಭವ್‌ಗೆ ತನ್ನ ಸಹಜ ಆಟವನ್ನು ಮುಂದುವರಿಸಲು ಮತ್ತು ಯಾವುದೇ ಒತ್ತಡವನ್ನು ತೆಗೆದುಕೊಳ್ಳದೆ, ಆಟವನ್ನು ಎಂಜಾಯ್ ಮಾಡಲು ಹೇಳಿದ್ದೇನೆ. ಈ ವಯಸ್ಸಿನಲ್ಲಿ, ಅವನು ಹೊಸ ವಿಷಯಗಳನ್ನು ಕಲಿಯಬೇಕು ಮತ್ತು ತನ್ನ ಪ್ರತಿಭೆಯನ್ನು ಜಗತ್ತಿಗೆ ತೋರಬೇಕು. ಇಲ್ಲಿಯವರೆಗೆ ಆತ ಸಾಧಿಸಿರುವ ಎಲ್ಲಾ ಯಶಸ್ಸುಗಳು ಪಾಸಿಟಿವ್​ ಮನೋಭಾವದಿಂದ ಆಡುವುದರಿಂದ ಬಂದಿವೆ. ಹೀಗಿರುವಾ, ಈಗ ಆ ಶೈಲಿಯನ್ನು ಬದಲಾಯಿಸುವ ಅಗತ್ಯವಿಲ್ಲ" ಎಂದು ತಿಲಕ್ ವರ್ಮಾ 'ಸ್ಪೋರ್ಟ್‌ಸ್ಟಾರ್' ಜೊತೆಗಿನ ಸಂದರ್ಶನದಲ್ಲಿ ತಿಳಿಸಿದ್ದರು.