ಇವನಿಂದ ಪಾಕಿಸ್ತಾನಕ್ಕೆ ಅವಮಾನ! ತಮ್ಮದೇ ಆಟಗಾರನಿಗೆ ವಾಸಿಮ್ ಅಕ್ರಂ ಛೀಮಾರಿ | Usman Tariq

ನವದೆಹಲಿ: ಮೊದಲೇ ವಿವಾದ, ಹೈಡ್ರಾಮಾಗಳಿಂದ ಕ್ರಿಕೆಟ್​ ಪ್ರಿಯರ ಟೀಕೆ, ವ್ಯಂಗ್ಯಗಳಿಗೆ ಗುರಿಯಾಗಿರುವ ಪಾಕಿಸ್ತಾನ ತಂಡ, ಇದೀಗ ತಮ್ಮ ತಂಡದ ಸ್ಪಿನ್ನರ್​ ಉಸ್ಮಾನ್ ತಾರಿಕ್​ ಮಾಡುತ್ತಿರುವ ಬೌಲಿಂಗ್ ಶೈಲಿಯಿಂದ ಗಂಭೀರ ಆರೋಪಗಳನ್ನು ಎದುರಿಸುತ್ತಿದೆ. ಈ ಕುರಿತು ಪಾಕ್​ ದಿಗ್ಗಜ, ಮಾಜಿ ಕ್ರಿಕೆಟಿಗ ವಾಸಿಮ್ ಅಕ್ರಂ ಕಿಡಿಕಾರಿದ್ದಾರೆ. ಮತ್ತೊಂದೆಡೆ ಅಚ್ಚರಿ ಎಂಬಂತೆ ಆರ್​. ಅಶ್ವಿನ್​ ಉಸ್ಮಾನ್​ ಪರ ವಹಿಸಿ, ಮಾತನಾಡಿದ್ದಾರೆ.

ನಿನ್ನೆ (ಫೆ.10) ಕೊಲೊಂಬೊದಲ್ಲಿ ನಡೆದ ಯುಎಸ್ಎ ವಿರುದ್ಧದ ಪಂದ್ಯದಲ್ಲಿ ಜಯ ಸಾಧಿಸಿದ ಪಾಕಿಸ್ತಾನ ತಂಡಕ್ಕೆ ಉಸ್ಮಾನ್​ ತಾರಿಕ್​ ಅವರ ಬೌಲಿಂಗ್ ದಾಳಿ ಉತ್ತಮ ಕೊಡುಗೆಯನ್ನೇ ನೀಡಿತು. ಮಾಡಿದ 3 ಓವರ್​ಗಳಲ್ಲಿ 3 ವಿಕೆಟ್​ ಪಡೆದ ತಾರಿಕ್​, ಮತ್ತೊಮ್ಮೆ ತಮ್ಮ ಪಾಜ್​​ ಅಂಡ್​ ಡೆಲಿವರಿ ಬೌಲಿಂಗ್​ ಶೈಲಿಗೆ ವ್ಯಾಪಕ ಟೀಕೆ ಮತ್ತು ಆರೋಪಗಳಿಗೆ ಗುರಿಯಾಗಿದ್ದಾರೆ. ಅದರಲ್ಲೂ, ಯುಎಸ್​ಎ ಅಭಿಮಾನಿಗಳು ಉಸ್ಮಾನ್​ ಬೌಲಿಂಗ್​ನಲ್ಲಿ ಮೋಸವಿದೆ ಎಂದು ಗಂಭೀರವಾಗಿ ಆರೋಪ ಹೊರಿಸಿದ್ದಾರೆ.

ಈ ವಿಷಯ ದೊಡ್ಡ ಚರ್ಚೆಗೆ ಗ್ರಾಸವಾಗುತ್ತಿದ್ದಂತೆ ಹಲವರು ಹೀಗ್ಯಾಕೆ ಬೌಲಿಂಗ್ ಮಾಡ್ತಾರೆ? ಇದು ಸರಿಯಿಲ್ಲ ಎಂದೆಲ್ಲ ಆರೋಪಿಸಿದ್ದಾರೆ. ಈ ಮಧ್ಯೆ, ಮಾಜಿ ಕ್ರಿಕೆಟಿಗ ಶ್ರೀವತ್ಸ್​ ಗೋಸ್ವಾಮಿ ಅವರು ಉಸ್ಮಾನ್​, ಅದ್ಹೇಗೆ ಒಂದು ಪಾಜ್​ ಮತ್ತು ಡೆಲಿವರಿ ಮಾಡಲು ಅವಕಾಶ ಕೊಡಲಾಗಿದೆ. ಇದು ಮುಂದುವರಿದರೆ ಒಳ್ಳೆಯದಲ್ಲ. ಫುಟ್​ಬಾಲ್​ನಲ್ಲೇ ಪೆನಾಲ್ಟಿ ಶಾಟ್​ನಲ್ಲಿ ಈ ರೀತಿ ಪಾಜ್​ಗೆ ಅವಕಾಶವಿಲ್ಲ. ಹೀಗಿರುವಾಗ ಕ್ರಿಕೆಟ್​ನಲ್ಲಿ ಏಕೆ ಹೀಗೆ? ಎಂದು ಟ್ವೀಟ್​ ಮಾಡಿದ್ದಾರೆ. ಇದಕ್ಕೆ ಪ್ರತಿಕ್ರಿಯಿಸಿರುವ ಅಶ್ವಿನ್​, ತಾರಿಕ್​ ಪರ ಬ್ಯಾಟ್​ ಬೀಸಿರುವುದು ಆಶ್ಚರ್ಯಕರ.

ಶ್ರೀವತ್ಸ್​ ಆರೋಪಕ್ಕೆ ಕಿರಿಕಾರಿರುವ ಅಶ್ವಿನ್​, ಮೊದಲು ಸ್ವಿಚ್ ಹಿಟ್​ ನಿಯಮವನ್ನು ನಿಲ್ಲಿಸಬೇಕು. ಫುಟ್ಬಾಲ್ ಅದನ್ನು ಅನುಮತಿಸುವುದಿಲ್ಲ ಎಂಬ ವಿಷಯವನ್ನು ನಾನೂ ಒಪ್ಪುತ್ತೇನೆ. ಬ್ಯಾಟರ್ ಅಂಪೈರ್ ಅಥವಾ ಬೌಲರ್‌ಗೆ ತಿಳಿಸದೆ ದಿಢೀರ್​ ತಿರುಗಿ ಅಥವಾ ರಿವರ್ಸ್ ಸ್ವೀಪ್​ ಮಾಡುವ ಅವಕಾಶವಿದೆ. ಆದರೆ, ಈ ನಿರ್ಬಂಧಗಳು ಬೌಲರ್‌ಗೆ ಮಾತ್ರ ಏಕೆ ಸೀಮಿತವಾಗಿವೆ?" ಎಂದು ಅಶ್ವಿನ್ ರೀ-ಟ್ವೀಟ್ ಮಾಡಿದ್ದಾರೆ.

ಉಸ್ಮಾನ್ ತಾರಿಕ್ ಅವರಂತಹ ವ್ಯಕ್ತಿಯನ್ನು ತಂಡದಲ್ಲಿ ಸೇರ್ಪಡೆ ಮಾಡಿಕೊಂಡಿರುವುದರಿಂದ ಪಾಕಿಸ್ತಾನದ ವರ್ಚಸ್ಸಿನ ಬಗ್ಗೆ ನನಗೆ ಚಿಂತೆಯಾಗಿದೆ. ಪ್ರಾಮಾಣಿಕವಾಗಿ ಹೇಳಬೇಕೆಂದರೆ, ಅವರ ಕ್ರಮ ಅನುಮಾನಾಸ್ಪದ ಮತ್ತು ಇದು ಮೋಸದ ಆರೋಪಗಳಿಗೆ ಹೆಚ್ಚು ಗುರಿಯಾಗುತ್ತಿದೆ. ಇದನ್ನೆಲ್ಲ ಗಮನಿಸಿದರೆ, ಇನ್ನೂ ಏಕೆ ಪಾಕ್​ ಮ್ಯಾನೇಜ್​ಮೆಂಟ್​ ಈತನನ್ನು ಆಡಿಸುತ್ತಿದೆ? ಎಂದು ಹೇಳಿದ್ದಾಗಿ ಟ್ವೀಟ್​ವೊಂದು ಉಲ್ಲೇಖಿಸಿದೆ,(ಏಜೆನ್ಸೀಸ್).