ಒಂದೇ ಟೆಸ್ಟ್‌ನಲ್ಲಿ ಕೆಂಪು-ಗುಲಾಬಿ ಚೆಂಡು ಬಳಕೆ!:ಟೆಸ್ಟ್ ಹಾಗೂ ಏಕದಿನ ಕ್ರಿಕೆಟ್‌ನ ಪ್ರಮುಖ ನಿಯಮಗಳು ಪರಿಷ್ಕರಣೆ?

ಸಾಂಪ್ರದಾಯಿಕ ಟೆಸ್ಟ್ ಪಂದ್ಯದಲ್ಲಿ ಬಳಸಲಾಗುವ ಕೆಂಪು ಚೆಂಡನ್ನು ಗುಲಾಬಿ ಚೆಂಡಿಗೆ ಬದಲಾಯಿಸುವ ನಿಯಮ ತಿದ್ದುಪಡಿಯೂ ಮಹತ್ವದಾಗಿದ್ದು, ಹವಾಮಾನ ವೈಪರೀತ್ಯ ಅಥವಾ ಮಂದಬೆಳಕಿನ ಸಮಯಯಲ್ಲಿ ಎರಡೂ ತಂಡಗಳು ಒಪ್ಪಿದರೆ ಗುಲಾಬಿ ಚೆಂಡನ್ನು ಬಳಸಲು ಅನುಮತಿ ನೀಡುವ ಪ್ರಸ್ತಾವನೆ ಇದೆ. ಚೆಂಡುಗಳ ಬಳಕೆ ನಿಯಮ ತಿದ್ದುಪಡಿ ಜತೆಗೆ ಏಕದಿನ ಕ್ರಿಕೆಟ್‌ನಲ್ಲಿ ಪಾನೀಯ ವಿರಾಮ (ಡ್ರಿಂಕ್ಸ್ ಬ್ರೇಕ್) ಸಮಯದಲ್ಲಿ ತಂಡದ ಮುಖ್ಯಕೋಚ್ ಮೈದಾನಕ್ಕೆ ಪ್ರವೇಶಿಸಲು ಅವಕಾಶ ಕಲ್ಪಿಸುವ ಸಾಧ್ಯತೆಗಳಿವೆ.

ಮುಖ್ಯಕೋಚ್ ಮೈದಾನಕ್ಕೆ ಪ್ರವೇಶಿಸಲು ಅವಕಾಶ ಪಡೆದರೆ, ತಂಡದ ಜೆರ್ಸಿ ಧರಿಸಬೇಕೆ ಎಂಬುದು ಸ್ಪಷ್ಟವಾಗಿಲ್ಲ. ಪ್ರಸ್ತುತ ಬದಲಿ ಆಟಗಾರರು ಮಾತ್ರ ಪಂದ್ಯದ ವೇಳೆ ಮೈದಾನಕ್ಕೆ ಪ್ರವೇಶಿಸಲು ಅನುಮತಿ ಇದೆ. ಏಕದಿನ ಕ್ರಿಕೆಟ್‌ನಲ್ಲಿ, ಪ್ರತಿ ಇನ್ನಿಂಗ್ಸ್‌ನ ಒಂದು ಗಂಟೆ 10 ನಿಮಿಷಗಳ ಅಂತರದಲ್ಲಿ ಎರಡು ಪಾನೀಯ ವಿರಾಮ ನೀಡಲಾಗುತ್ತಿದೆ. ಟಿ20 ಪಂದ್ಯದ ವೇಳೆ ಮುಖ್ಯಕೋಚ್ ವಿರಾಮದ ಸಮಯದಲ್ಲಿ ಮೈದಾನಕ್ಕೆ ತೆರಳಿ ಆಟಗಾರರೊಂದಿಗೆ ಸಮಾಲೋಚನೆ ನೀಡಲು ಪ್ರಸ್ತುತ ಅವಕಾಶವಿದೆ.

ಟಿ20 ಪಂದ್ಯದ ಇನ್ನಿಂಗ್ಸ್ ವಿರಾಮದ ಸಮಯವನ್ನು 20 ರಿಂದ 15 ನಿಮಿಷಗಳಿಗೆ ಇಳಿಸುವ ಸಾಧ್ಯತೆಗಳಿವೆ. ಪಂದ್ಯದ ವೇಳೆ ಬೌಲರ್‌ಗಳು ಅನುಚಿತ ವರ್ತನೆ ತೋರುವ ಬಗ್ಗೆ ಪರಿಶೀಲಿಸಲು ಮೈದಾನದಲ್ಲಿರುವ ಅಂಪೈರ್‌ಗಳಿಗೆ ಹಾಕ್‌ಐ ಡೇಟಾ ಬಳಕೆಗೆ ಅವಕಾಶ ನೀಡುವ ಪ್ರಸ್ತಾವನೆಯೂ ಐಸಿಸಿ ಮುಂದಿದ್ದು, ಸಭೆಯಲ್ಲಿ ಒಪ್ಪಿಗೆ ದೊರೆತರೆ ಅಕ್ಟೋಬರ್ 1 ರಿಂದ ನಿಯಮಗಳು ಜಾರಿಗೆ ಬರುವ ನಿರೀಕ್ಷೆ ಇದೆ.