ಅಂಡರ್-19 ಏಷ್ಯಾ ಕಪ್‌ನಲ್ಲಿ ಪಾಕ್​ ವಿರುದ್ಧ ಭಾರತಕ್ಕೆ ಸೋಲು: ಕ್ರಮಕ್ಕೆ ಮುಂದಾದ ಬಿಸಿಸಿಐ! U19 Asia Cup 2025

ನವದೆಹಲಿ: ದುಬೈನಲ್ಲಿ ನಡೆದ 2025ರ ಅಂಡರ್-19 ಏಷ್ಯಾ ಕಪ್‌ನಲ್ಲಿ ( U19 Asia Cup 2025 ) ಭಾರತ ಭಾರೀ ನಿರಾಸೆ ಅನುಭವಿಸಿರುವುದು ನಿಮಗೆಲ್ಲರಿಗೂ ಗೊತ್ತೇ ಇದೆ. ಎಲ್ಲ ಪಂದ್ಯಗಳಲ್ಲಿ ಪ್ರಾಬಲ್ಯ ಸಾಧಿಸಿದ್ದ ಭಾರತ, ನಿರ್ಣಾಯಕ ಫೈನಲ್ ಪಂದ್ಯದಲ್ಲಿ ಸಾಂಪ್ರದಾಯಿಕ ಎದುರಾಳಿ ಪಾಕಿಸ್ತಾನ ವಿರುದ್ಧವೇ 191 ರನ್‌ಗಳಿಂದ ಸೋತಿತು. ಇದರಿಂದ ಭಾರತದ ಕ್ರೀಡಾಭಿಮಾನಿಗಳು ಭಾರಿ ನೋವುಂಟಾಗಿದೆ. ಇದರ ಬೆನ್ನಲ್ಲೇ ಬಿಸಿಸಿಐ ಎಚ್ಚೆತ್ತುಕೊಂಡಿದೆ.

ಫೈನಲ್​ ಪಂದ್ಯದಲ್ಲಿ ಟೀಮ್​ ಇಂಡಿಯಾದ ಅವಮಾನಕರ ಸೋಲಿನ ಬಗ್ಗೆ ಬಿಸಿಸಿಐ ಗಂಭೀರವಾಗಿರುವಂತೆ ತೋರುತ್ತಿದೆ. ಸೋಮವಾರ ಆನ್‌ಲೈನ್‌ನಲ್ಲಿ ನಡೆದ ಅಪೆಕ್ಸ್ ಕೌನ್ಸಿಲ್ ಸಭೆಯಲ್ಲಿ ಮಂಡಳಿಯ ಸದಸ್ಯರು ಈ ವಿಷಯವನ್ನು ಗಂಭೀರವಾಗಿ ಚರ್ಚಿಸಿದ್ದಾರೆ ಎಂದು ಕ್ರಿಕ್‌ಬಜ್ ವರದಿ ಮಾಡಿದೆ. ಭಾರತೀಯ ತಂಡದ ಪ್ರದರ್ಶನದ ಪರಿಶೀಲನೆ ಅಗತ್ಯವಿದೆ ಎಂದು ಚರ್ಚೆಯಾಗಿದೆ.

ಸಾಮಾನ್ಯವಾಗಿ, ಯಾವುದೇ ಪಂದ್ಯಾವಳಿಯ ನಂತರ ತಂಡದ ವ್ಯವಸ್ಥಾಪಕರು ಯಾವಾಗಲೂ ಬಿಸಿಸಿಐಗೆ ವರದಿಯನ್ನು ಸಲ್ಲಿಸುತ್ತಾರೆ. ಈ ಬಾರಿ, ಬಿಸಿಸಿಐ ತಂಡದ ಆಡಳಿತ ಮಂಡಳಿಯಿಂದ ವಿವರಣೆಯನ್ನು ಪಡೆಯಲು ಮುಂದಾಗಿದೆ. ಮುಖ್ಯ ಕೋಚ್ ಹೃಷಿಕೇಶ್ ಕಾನಿಟ್ಕರ್ ಮತ್ತು ನಾಯಕ ಆಯುಷ್ ಮಾತ್ರೆ ಅವರೊಂದಿಗೆ ಬಿಸಿಸಿಐ ಚರ್ಚಿಸಲಿದೆ ಎಂದು ವರದಿಯಾಗಿದೆ.

ಅಂದಹಾಗೆ, 19 ವರ್ಷದೊಳಗಿನವರ ವಿಶ್ವಕಪ್ 2026ರ ಜನವರಿಯಲ್ಲಿ ಆರಂಭವಾಗಲಿದೆ. ಈ ಹಿನ್ನೆಲೆಯಲ್ಲಿ, ಈ ಮೆಗಾ ಟೂರ್ನಮೆಂಟ್‌ಗೆ ಮುನ್ನ ತಂಡದಲ್ಲಿನ ನ್ಯೂನತೆಗಳನ್ನು ಸರಿಪಡಿಸಲು ಮತ್ತು ಟೂರ್ನಮೆಂಟ್‌ನಲ್ಲಿ ಉತ್ತಮ ಪ್ರದರ್ಶನವನ್ನು ಖಚಿತಪಡಿಸಿಕೊಳ್ಳುವುದಕ್ಕಾಗಿ ಕ್ರಮಗಳನ್ನು ತೆಗೆದುಕೊಳ್ಳಲಾಗುವುದು ಎಂದು ಬಿಸಿಸಿಐ ತಿಳಿಸಿರುವುದಾಗಿ ವರದಿಯಾಗಿದೆ.

ಪಂದ್ಯದ ವಿಚಾರಕ್ಕೆ ಬರುವುದಾದರೆ, ಭಾನುವಾರ ನಡೆದ ಫೈನಲ್​ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ ಪಾಕಿಸ್ತಾನ, ಸಮೀರ್ ಮಿನ್ಹಾಸ್ (172 ರನ್​, 113 ಎಸೆತ, 17 ಬೌಂಡರಿ, 9 ಸಿಕ್ಸರ್‌) ಅವರ ಭರ್ಜರಿ ಶತಕ ಹಾಗೂ ಅಹ್ಮದ್ ಹುಸೇನ್ (56 ರನ್​, 72 ಎಸೆತ, 2 ಬೌಂಡರಿ, 1 ಸಿಕ್ಸರ್) ಅರ್ಧಶತಕದ ನೆರವಿನಿಂದ ನಿಗದಿತ 50 ಓವರ್‌ಗಳಲ್ಲಿ 8 ವಿಕೆಟ್‌ಗಳ ನಷ್ಟಕ್ಕೆ 347 ರನ್ ಗಳಿಸಲು ಸಾಧ್ಯವಾಯಿತು.

ಟೀಮ್ ಇಂಡಿಯಾ ಪರ ದೀಪೇಶ್ ದೇವೇಂದ್ರನ್ ಮೂರು ವಿಕೆಟ್ ಪಡೆದರು. ಹೆನಿಲ್ ಪಟೇಲ್ ಮತ್ತು ಖಿಲನ್ ಪಟೇಲ್ ತಲಾ ಎರಡು ವಿಕೆಟ್ ಪಡೆದರೆ, ಕಾನ್ಶಿಕ್ ಚೌಹಾಣ್ ಒಂದು ವಿಕೆಟ್ ಪಡೆದರು.

348 ರನ್‌ಗಳ ಗುರಿಯನ್ನು ಬೆನ್ನಟ್ಟಿದ ಭಾರತ 26.2 ಓವರ್‌ಗಳಲ್ಲಿ 156 ರನ್‌ಗಳಿಗೆ ಆಲೌಟ್ ಆಯಿತು. ಭಾರತದ ಬ್ಯಾಟ್ಸ್‌ಮನ್‌ಗಳಲ್ಲಿ ದೀಪೇಶ್ ದೇವೇಂದ್ರನ್ (36), ವೈಭವ್ ಸೂರ್ಯವಂಶಿ (26), ಆರನ್ ಜಾರ್ಜ್ (16), ಅಭಿಗ್ಯಾನ್ ಕುಂಡು (13), ಮತ್ತು ಖಿಲಾನ್ ಪಟೇಲ್ (19) ಮಾತ್ರ ಎರಡಂಕಿಯ ರನ್ ಗಳಿಸಿದರು. ಉಳಿದವರೆಲ್ಲರೂ ಒಂದಂಕಿಗೆ ಸೀಮಿತರಾದರು.

ಪಾಕಿಸ್ತಾನಿ ಬೌಲರ್‌ಗಳಲ್ಲಿ ಅಲಿ ರಜಾ ನಾಲ್ಕು ವಿಕೆಟ್ ಪಡೆದರೆ, ಮೊಹಮ್ಮದ್ ಸಯ್ಯಮ್, ಅಬ್ದುಲ್ ಸುಭಾನ್ ಮತ್ತು ಹುಜೈಫಾ ಅಹ್ಸಾನ್ ತಲಾ ಎರಡು ವಿಕೆಟ್ ಪಡೆದರು, (ಏಜೆನ್ಸೀಸ್​).