2 ವರ್ಷ ಬ್ಯಾನ್​... ಐಪಿಎಲ್​ ಮೊದಲ ಪಂದ್ಯದ ಬೆನ್ನಲ್ಲೇ ಕ್ರಿಕೆಟ್​ ದಿಗ್ಗಜನ ಶಾಕಿಂಗ್​ ಹೇಳಿಕೆ | BCCI

ಬೆಂಗಳೂರು: ನಿನ್ನೆ (ಮಾ.28) ಎಂ. ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ನಡೆದ ಐಪಿಎಲ್​ 19ನೇ ಆವೃತ್ತಿಯ ಮೊದಲ ಪಂದ್ಯದಲ್ಲಿ ಸನ್​ರೈಸರ್ಸ್​ ಹೈದರಾಬಾದ್​ ಎದುರು ರಾಯಲ್ ಚಾಲೆಂಜರ್ಸ್​ ಬೆಂಗಳೂರು ತಂಡ ತವರಿನಲ್ಲೇ ಗೆಲುವನ್ನು ದಾಖಲಿಸಿದ್ದು ಕ್ರಿಕೆಟ್​ ಪ್ರಿಯರ ಖುಷಿಗೆ ಕಾರಣವಾಯಿತು. 202 ರನ್​ಗಳ ಬೃಹತ್​ ಗುರಿಯನ್ನು ಕೇವಲ 15.4 ಓವರ್​ಗೆ ಬೆನ್ನಟ್ಟಿದ ಆರ್​ಸಿಬಿ ಪರ ವಿರಾಟ್​ ಕೊಹ್ಲಿ ಮತ್ತು ದೇವದತ್ತ ಪಡಿಕ್ಕಲ್​ ಅದ್ಭುತ ಬ್ಯಾಟಿಂಗ್ ಪ್ರದರ್ಶನ ನೀಡಿದರು.

ಹಾಲಿ ಚಾಂಪಿಯನ್ಸ್​ಗಳಿಂದಲೇ ಐಪಿಎಲ್​ ಶುಭಾರಂಭ ಆಗಿರುವುದು ಫ್ರಾಂಚೈಸಿ ಅಭಿಮಾನಿಗಳಿಗೆ ಮತ್ತು ಮಾಜಿ ಹಿರಿಯ ಕ್ರಿಕೆಟಿಗರಿಗೆ ಸಂತಸ ತಂದಿದೆ. ಮತ್ತೊಂದೆಡೆ, ಟೀಮ್ ಇಂಡಿಯಾದ ದಂತಕಥೆ ಸುನೀಲ್ ಗವಾಸ್ಕರ್ ಮಾತನಾಡಿ​, ಐಪಿಎಲ್​ನಲ್ಲಿ ಆಡುವುದಾಗಿ ಹೇಳಿಕೊಂಡು ಬಿಡ್​ ಆದ ವಿದೇಶಿ ಕ್ರಿಕೆಟಿಗರು ಇದೀಗ ದಿಢೀರ್ ಉಲ್ಟಾ ಹೊಡೆದಿರುವುದನ್ನು ಒಪ್ಪಲು ಸಾಧ್ಯವಿಲ್ಲ ಎಂದು ಗರಂ ಆಗಿ ಹೇಳಿದ್ದಾರೆ.

ಡೆಲ್ಲಿ ಕ್ಯಾಪಿಟಲ್ಸ್​ ಪರ ಆಡಲು 2 ಕೋಟಿ ರೂ.ಗೆ ಖರೀದಿಯಾದ ಇಂಗ್ಲೆಂಡ್​ ಸ್ಟಾರ್ ಓಪನರ್​ ಬೆನ್​ ಡಕೆಟ್​​, ಇದೀಗ 2026ರ ಐಪಿಎಲ್​ನಿಂದ ಹೊರಗುಳಿಯುವುದಾಗಿ ದೃಢಪಡಿಸಿದ್ದಾರೆ. ಅಂದುಕೊಂಡಂತೆ ನಡೆದಿದ್ದರೆ, ಮುಂದಿನ ಪಂದ್ಯದಲ್ಲಿ ಕೆಎಲ್​ ರಾಹುಲ್​ ಜೊತೆಗೆ ಡಕೆಟ್​ ಆರಂಭಿಕರಾಗಿ ತಂಡದ ಪರ ಕಣಕ್ಕಿಳಿಯಬೇಕಿತ್ತು. ಆದರೀಗ, ಅಂತಾರಾಷ್ಟ್ರೀಯ ಕ್ರಿಕೆಟ್​ ಟೂರ್ನಿಗಳನ್ನು ಗಮನದಲ್ಲಿರಿಸಿ, ಸೀಸನ್​ ಶುರುವಿಗೂ ಕೆಲವು ದಿನಗಳ ಹಿಂದೆ ತಮ್ಮ ಫ್ರಾಂಚೈಸಿಗೆ ಕೈಕೊಟ್ಟಿದ್ದಾರೆ. ಇದರಿಂದ ಗವಾಸ್ಕರ್​ ಸಿಡಿಮಿಡಿಗೊಂಡಿದ್ದಾರೆ.

ಇದು ಕಷ್ಟಕರ. ಆ್ಯಶಸ್​ ಸರಣಿಯಲ್ಲಿ ಡಕೆಟ್​ ಅದ್ಭುತ ಬ್ಯಾಟರ್​ ಆಗಿ ಹೊರಹೊಮ್ಮಿದ್ದಾರೆ. ಆದರೆ, ತಾವು ಇಂಗ್ಲೆಂಡ್​ ಟೆಸ್ಟ್​ ಕರಿಯರ್​ ಮೇಲೆ ಹೆಚ್ಚು ಗಮನಹರಿಸಬೇಕು ಎಂದು ಈಗ ಹೊರನಡೆದಿದ್ದಾರೆ. ಅದು ಓಕೆ. ಇಲ್ಲಿ ಬಿಸಿಸಿಐ ಮುಂದೆ ಏನಾಗಬೇಕು ಎಂಬುದರ ಬಗ್ಗೆ ಚಿಂತಿಸಬೇಕು. ಕೈಕೊಡುವ ಆಟಗಾರರನ್ನು ಎರಡು ವರ್ಷಗಳ ಕಾಲ ಐಪಿಎಲ್​ನಿಂದ ಬ್ಯಾನ್​ ಮಾಡುವುದು ಕೆಲಸ ಮಾಡುತ್ತಿಲ್ಲ. ಅವರ ಮೇಲೆ ಪರಿಣಾಮ ಬೀರುವಂತದ್ದು ಏನಾದರೂ ಮಾಡಬೇಕು. ಅಲ್ಲಿಯವರೆಗೂ ಇಂತಹ ಸಮಸ್ಯೆಗಳು ಇದ್ದೇ ಇರುತ್ತದೆ ಎಂದರು,(ಏಜೆನ್ಸೀಸ್).