ಕೋಚ್ ಗಂಭೀರ್​ ಮಾತಿಗಿಲ್ಲ ಕವಡೆ ಕಾಸಿನ ಕಿಮ್ಮತ್ತು! ನೇರವಾಗಿ ಬಿಸಿಸಿಐ ಬಾಗಿಲು ತಟ್ಟಿದ ಹಿರಿಯ ಆಟಗಾರರು

Team India: ಟೀಮ್ ಇಂಡಿಯಾದಲ್ಲಿ ಆಂತರಿಕ ಸಮಸ್ಯೆಗಳು ನಿನ್ನೆ, ಮೊನ್ನೆಯ ವಿಷಯವೇನಲ್ಲ. ಇದು ಬಹಳ ಸಮಯದಿಂದಲೂ ಸದ್ದು ಮಾಡುತ್ತಿರುವ ಟಾಪಿಕ್​. ಕ್ರಿಕೆಟ್​ ದಿಗ್ಗಜರಾದ ವಿರಾಟ್ ಕೊಹ್ಲಿ, ರೋಹಿತ್ ಶರ್ಮಾ ಅವರನ್ನು ಹೆಡ್​ ಕೋಚ್​ ಗೌತಮ್ ಗಂಭೀರ್ ಅವರೇ ಏಕದಿನ ಮತ್ತು ಟೆಸ್ಟ್​ ಕ್ರಿಕೆಟ್​ಗೆ ನಿವೃತ್ತಿ ಕೊಡುವಂತೆ ಒತ್ತಾಯಿಸಿದರು ಎಂಬ ಊಹಾಪೋಹಗಳು ಇಂದಿಗೂ ದೊಡ್ಡ ಮಟ್ಟದ ಚರ್ಚೆಗೆ ಗ್ರಾಸವಾಗಿವೆ. ಆದರೆ, ಇವೆಲ್ಲವೂ ನೆಟ್ಟಿಗರ ಟೀಕೆಗೆ, ಆರೋಪಕ್ಕಷ್ಟೇ ಸೀಮಿತವಾಗಿವೆ ಹೊರತು ಯಾವುದಕ್ಕೂ ಗಟ್ಟಿಯಾದ ಆಧಾರಗಳಿಲ್ಲ.

ಈಗ ಮತ್ತದೇ ವಿಚಾರಗಳು ಮುನ್ನೆಲೆಗೆ ಬಂದಿದ್ದು, ಮುಂದಿನ ವರ್ಷ (2027) ನಡೆಯಲಿರುವ ಏಕದಿನ ವಿಶ್ವಕಪ್‌ಗೆ ಸಿದ್ಧತೆಗಳ ಭಾಗವಾಗಿ ಟೀಮ್ ಇಂಡಿಯಾ ಪ್ರಸ್ತುತ ಅಫ್ಘಾನಿಸ್ತಾನ ತಂಡವನ್ನು ಎದುರಿಸಲು ತಯಾರಿ ನಡೆಸುತ್ತಿದೆ. ಈ ಮಧ್ಯೆ, 50 ಓವರ್‌ಗಳ ಸರಣಿ ಪ್ರಾರಂಭಕ್ಕೂ ಮೊದಲು, ಡ್ರೆಸ್ಸಿಂಗ್ ರೂಮ್​ನಲ್ಲಿ ಪರಿಸ್ಥಿತಿ ಉತ್ತಮವಾಗಿಲ್ಲ ಎಂಬ ವರದಿಗಳು ಸದ್ದು ಮಾಡುತ್ತಿವೆ.

ಟೆಸ್ಟ್ ಮತ್ತು ಟಿ20 ಫಾರ್ಮೆಟ್​ಗಳಲ್ಲಿ ಸಂಪೂರ್ಣ ನಿಯಂತ್ರಣ ಸಾಧಿಸಿರುವ ಹೆಡ್​ ಕೋಚ್ ಗೌತಮ್ ಗಂಭೀರ್, ಅದೇ ಏಕದಿನ ಸರಣಿ ಅಥವಾ ಟೂರ್ನಿ ಬಂದಾಗ ಇನ್ನೂ ಆ ಮಟ್ಟದ ಕಂಟ್ರೋಲ್​ ಸಾಧಿಸಲು ಸಾಧ್ಯವಾಗುತ್ತಿಲ್ಲ ಎಂಬುದಕ್ಕೆ ಮತ್ತೊಂದು ಘಟನೆಯೇ ಜ್ವಲಂತ ಸಾಕ್ಷಿ. ಹಿರಿಯ ಆಟಗಾರರಾದ ವಿರಾಟ್ ಕೊಹ್ಲಿ ಮತ್ತು ರೋಹಿತ್ ಶರ್ಮಾ ಅವರ ಭವಿಷ್ಯದ ಕುರಿತು ನಡೆಯುತ್ತಿರುವ ಚರ್ಚೆಗಳು ಗಂಭೀರ್​ ಪರಿಸ್ಥಿತಿಯನ್ನು ಇನ್ನಷ್ಟು ಜಟಿಲಗೊಳಿಸಿವೆ.ಇಲ್ಲಿ ಗಂಭೀರ್​ನ ಯಾವುದೇ ಮಾತುಗಳು ಅಷ್ಟು ಸಲಿಸಾಗಿ ನಡೆಯುವಂತೆ ಕಾಣುತ್ತಿಲ್ಲ.

ಇತ್ತೀಚಿನ ವರದಿಗಳ ಪ್ರಕಾರ, ತಂಡದ ಕೆಲವು ಹಿರಿಯ ಆಟಗಾರರು ಕೋಚ್ ಗೌತಮ್ ಗಂಭೀರ್ ಅವರನ್ನು ಓವರ್​ಟೇಕ್​ ಮಾಡಿ ನೇರವಾಗಿ ಬಿಸಿಸಿಐ ಉನ್ನತ ಅಧಿಕಾರಿಗಳನ್ನು ಸಂಪರ್ಕಿಸಿದ್ದಾರೆ ಎನ್ನಲಾಗಿದೆ. 2027ರ ಏಕದಿನ ವಿಶ್ವಕಪ್‌ಗಾಗಿ ತಮ್ಮ ಭವಿಷ್ಯ ಮತ್ತು ಮುಂದಿನ ಯೋಜನೆಗಳನ್ನು ಸ್ಪಷ್ಟಪಡಿಸಲು ಚರ್ಚಿಸಿದ್ದಾರೆ ಎಂದು ವರದಿಗಳು ಉಲ್ಲೇಖಿಸಿವೆ. ಈ ಮೊದಲಿನಿಂದಲೂ, ರೋಹಿತ್ ಮತ್ತು ಕೊಹ್ಲಿ ಅವರಿಗೆ ಗಂಭೀರ್​ ಜೊತೆಗೆ ಉತ್ತಮ ಒಡನಾಟವಿಲ್ಲ ಎಂಬ ಮಾತುಗಳಿವೆ. ಈಗಾಗಲೇ ಟಿ20 ಮತ್ತು ಟೆಸ್ಟ್​ಗೆ ಗುಡ್​ಬೈ ಹೇಳಿರುವ ಈ ದಿಗ್ಗಜರು, 2027ರ ಏಕದಿನ ವಿಶ್ವಕಪ್​ ಆಡುತ್ತಾರೆಯೇ? ಎಂಬ ಗೊಂದಲಗಳನ್ನು ಅಭಿಮಾನಿಗಳನ್ನು ಬೆಂಬಿಡದೆ ಕಾಡತೊಡಗಿವೆ.

ಬಿಸಿಸಿಐ ಅಧಿಕಾರಿಗಳೊಂದಿಗೆ ಟೀಮ್ ಇಂಡಿಯಾ ಸ್ಟಾರ್​ ಆಟಗಾರರ ನೇರ ಸಂಪರ್ಕವು ಸದ್ಯ ಕೋಚ್ ಗಂಭೀರ್ ಮತ್ತು ಮುಖ್ಯ ಆಯ್ಕೆಗಾರ ಅಜಿತ್ ಅಗರ್ಕರ್ ಅವರನ್ನು ಇಕ್ಕಟ್ಟಿಗೆ ಸಿಲುಕಿಸಿದೆ ಎಂಬುದಂತು ಇಲ್ಲಿ ಸ್ಪಷ್ಟ. ರೋಕೊ ಜೋಡಿ ಏಕದಿನ ವಿಶ್ವಕಪ್​ನಲ್ಲಿ ಟೀಮ್ ಇಂಡಿಯಾ ಪರ ಆಡುವುದು ಬಹುತೇಕ ಖಚಿತ ಎಂದೇ ಹೇಳಲಾಗಿದೆ. ಆದರೆ, ಇಗೋ ಹರ್ಟ್​ ಪ್ರಶ್ನೆಗಳ ನಡುವೆ ಮುಂದೇನು? ಎಂಬುದು ಸದ್ಯ ಕಾತರವಾಗಿಯೇ ಉಳಿಯಲಿದೆ,(ಏಜೆನ್ಸೀಸ್).