ಈ ಕುತಂತ್ರ ಎಲ್ಲ... ಶ್ರೀಲಂಕಾ-ಕಿವೀಸ್​ ಪಂದ್ಯದಲ್ಲಿ ಫಿಕ್ಸಿಂಗ್! ಸ್ಫೋಟಕ ಹೇಳಿಕೆ ನೀಡಿದ ಪಾಕ್​ ಮಾಜಿ ಆಟಗಾರ | Pakistan

Pakistan: ನಿನ್ನೆ (ಫೆ.25) ನಡೆದ ಟಿ20 ವಿಶ್ವಕಪ್ ಸೂಪರ್​-8 ಪಂದ್ಯದಲ್ಲಿ ನ್ಯೂಜಿಲೆಂಡ್ ಎದುರು ಶ್ರೀಲಂಕಾ ಹೀನಾಯ ಸೋಲುಂಡಿತು. ಈ ಪಂದ್ಯದಿಂದ ಕೇವಲ ಸಿಂಹ ಪಡೆಗೆ ಮಾತ್ರ ಸಂಕಷ್ಟ ಎದುರಾಗಲಿಲ್ಲ. ಬದಲಿಗೆ ಪಾಕಿಸ್ತಾನ ತಂಡಕ್ಕೂ ದೊಡ್ಡ ತಲೆನೋವು ತಂದೊಡ್ಡಿದೆ. ಕಿವೀಸ್​ ಗೆಲುವಿನಿಂದ ಇದೀಗ ಪಾಕ್​ ಸೆಮೀಸ್​ ಕನಸು ಬಹುತೇಕ ಭಗ್ನಗೊಂಡಿದೆ.

ಪಾಕಿಸ್ತಾನಕ್ಕೆ ನಿನ್ನೆಯ ಪಂದ್ಯದಲ್ಲಿ ಶ್ರೀಲಂಕಾ ಗೆಲ್ಲಲೇಬೇಕಿತ್ತು. ಆದರೆ, ಅದು ಸಾಧ್ಯವಾಗಲಿಲ್ಲ. ನ್ಯೂಜಿಲೆಂಡ್ ವಿರುದ್ಧ 61 ರನ್‌ಗಳ ಭಾರೀ ಅಂತರದಲ್ಲಿ ಹೀನಾಯ ಸೋಲನ್ನು ಅನುಭವಿಸಿತು. ಲಂಕಾ ಪಡೆಯು ಈ ಹೀನಾಯ ಸೋಲಿನಿಂದ ಸದ್ಯ ಪಾಕ್​ ಆಸೆ ನುಚ್ಚುನೂರಾಗಿದೆ. ಇಲ್ಲಿ ಪವಾಡ ಸಂಭವಿಸಿದರೆ ಮಾತ್ರ ಸಲ್ಮಾನ್ ಅಲಿ ಅಘಾ ಪಡೆಗೆ ಸೆಮೀಸ್​ಗೆ ಎಂಟ್ರಿಕೊಡುವ ಅವಕಾಶವಿದೆ. ತಮ್ಮನ್ನು ಸಂಕಷ್ಟಕ್ಕೆ ಸಿಲುಕಿಸಿದರು ಎಂಬ ಸಿಟ್ಟಿನಿಂದ ಇದೀಗ ಹುಚ್ಚರಂತೆ ಮಾತನಾಡುತ್ತಿರುವ ಪಾಕ್​ ಕ್ರಿಕೆಟಿಗರು, ಈ ಪಂದ್ಯವು ಫಿಕ್ಸಿಂಗ್ ಆಗಿದೆ ಎಂದು ಆರೋಪಿಸಿದ್ದಾರೆ.

ಪಾಕಿಸ್ತಾನದ ಮಾಜಿ ಕ್ರಿಕೆಟಿಗ ತನ್ವೀರ್ ಅಹ್ಮದ್ ಮಾತನಾಡಿ, ನ್ಯೂಜಿಲೆಂಡ್​ ಮತ್ತು ಶ್ರೀಲಂಕಾ ಪಂದ್ಯವನ್ನು ಉದ್ದೇಶಪೂರ್ವಕವಾಗಿ ಫಿಕ್ಸಿಂಗ್ ಮಾಡಲಾಗಿದೆ ಎಂದು ಗಂಭೀರ ಆರೋಪಗಳನ್ನು ಹೊರಿಸಿದ್ದಾರೆ. ಶ್ರೀಲಂಕಾ ಬೇಕಂತಲೇ ಕಿವೀಸ್​ ಪಡೆ ಎದುರು ಸೋತಿದೆ. ಈ ಎರಡೂ ತಂಡಗಳ ನಡುವೆ ಮ್ಯಾಚ್ ಫಿಕ್ಸಿಂಗ್ ನಡೆದಿರುವುದು ಪಕ್ಕಾ. ಈ ಕುತಂತ್ರದ ಹಿಂದೆ ಅಂತಾರಾಷ್ಟ್ರೀಯ ಕ್ರಿಕೆಟ್ ಮಂಡಳಿ ಅಧ್ಯಕ್ಷ ಜಯ್ ಶಾ ಅವರ ಕೈವಾಡವಿದೆ. ಪಾಕಿಸ್ತಾನವನ್ನು ಈ ಟೂರ್ನಿಯಿಂದ ಹೊರಗಟ್ಟಲು ಇಂತಹ ನಾಟಕಕ್ಕೆ ಇಳಿದಿದ್ದಾರೆ. ಶ್ರೀಲಂಕಾ ತಂಡವು ನ್ಯೂಜಿಲೆಂಡ್ ವಿರುದ್ಧ ಸೋತ ನಂತರ ಪಾಕ್​ ಸೆಮಿಫೈನಲ್ ರೇಸ್‌ನಿಂದ ಹೊರಗುಳಿಯುವಂತಾಗಿದೆ ಎಂದು ನಾಲಿಗೆ ಹರಿಬಿಟ್ಟಿದ್ದಾರೆ.

ಟಿ20 ವಿಶ್ವಕಪ್‌ನ ಸೆಮಿಫೈನಲ್ ತಲುಪಲು ಪಾಕಿಸ್ತಾನಕ್ಕೆ ಇರುವುದು ಕೇವಲ 1% ಅಷ್ಟೇ ಅವಕಾಶ. ಮುಂದಿನ ಸೂಪರ್​-8 ಪಂದ್ಯಗಳಲ್ಲಿ ಇಂಗ್ಲೆಂಡ್ ತಂಡವು ನ್ಯೂಜಿಲೆಂಡ್ ವಿರುದ್ಧ 15 ರನ್‌ಗಳಿಂದ ಗೆದ್ದರೆ, ಪಾಕಿಸ್ತಾನವು ಶ್ರೀಲಂಕಾ ವಿರುದ್ಧ 55 ರನ್‌ಗಳಿಂದ ಗೆಲ್ಲಬೇಕು. ಅದೇ ರೀತಿ, ಇಂಗ್ಲೆಂಡ್ ಕಿವೀಸ್​ ಪಡೆ ವಿರುದ್ಧ ಕೇವಲ ಒಂದು ರನ್‌ನಿಂದ ಗೆದ್ದರೆ, ಪಾಕ್​ ಶ್ರೀಲಂಕಾ ವಿರುದ್ಧ 69 ರನ್‌ಗಳಿಂದ ಗೆಲ್ಲಬೇಕು. ಹಾಗಿದ್ದಲ್ಲಿ ಮಾತ್ರ, ಪಾಕಿಸ್ತಾನ ಸೆಮಿಫೈನಲ್‌ಗೆ ಲಗ್ಗೆಯಿಡುತ್ತದೆ. ಅದೇ ನ್ಯೂಜಿಲೆಂಡ್ ಇಂಗ್ಲೆಂಡ್ ವಿರುದ್ಧ ಗೆದ್ದರೆ, ಪಾಕಿಸ್ತಾನ ಶ್ರೀಲಂಕಾ ಜೊತೆಗೆ ತವರಿಗೆ ಗಂಟುಮೂಟೆ ಕಟ್ಟಿಕೊಂಡು ಹೋಗಬೇಕು,(ಏಜೆನ್ಸೀಸ್).