ರಾಜ್ಯ ಈಜು ಚಾಂಪಿಯನ್​ಷಿಪ್​: ತನಿಷಿ ಗುಪ್ತಾ ಅವಳಿ ದಾಖಲೆ

ಡಾಲ್ಫಿನ್​ ಈಜು ಕೇಂದ್ರದ ತನಿಷಿ ಗುಪ್ತಾ (tanishi gupta) ಕೆಎಸ್​ಎ ರಾಜ್ಯ ಸೀನಿಯರ್​ ಈಜು ಚಾಂಪಿಯನ್​ಷಿಪ್​ನ (national swimming championship) ಎರಡನೇ ದಿನ ಅವಳಿ ಕೂಟ ದಾಖಲೆ ನಿರ್ಮಿಸಿದ್ದಾರೆ. ಮಂಗಳವಾರ ಒಟ್ಟು 8 ಕೂಟ ದಾಖಲೆ ರಚನೆಯಾದವು. ಬಸವನಗುಡಿ ಈಜು ಕೇಂದ್ರದ ಶೋನ್​ ಗಂಗೂಲಿ, ಅನೀಶ್​ ಎಸ್​. ಗೌಡ, ದರ್ಶನ್​ ಎಸ್​, ನೈಷಾ, ಎಸ್​. ಲಕ್ಷ್ಯ ಮತ್ತು ಜೈನ್​ ರೆಸಿಡೆನ್ಶಿಯಲ್​ ಸ್ಕೂಲ್​ನ ತಾನ್ಯಾ ಎಸ್​. ದಿನದ ಇತರ ದಾಖಲೆ ಬರೆದರು.

ಬಸವನಗುಡಿ ಈಜು ಕೇಂದ್ರದಲ್ಲಿ (ಬಿಎಸಿ) ನಡೆಯುತ್ತಿರುವ ಕೂಟದಲ್ಲಿ ತನಿಷಿ ಗುಪ್ತಾ ಮಹಿಳೆಯರ 100 ಮೀ. ಬಟರ್​ಫ್ಲೈ ಮತ್ತು ಬ್ಯಾಕ್​ಸ್ಟೋಕ್​ ವಿಭಾಗದಲ್ಲಿ ಕೂಟ ದಾಖಲೆ ಮುರಿದರು. ತನಿಷಿ ಬಟರ್​ಫ್ಲೈ ವಿಭಾಗದಲ್ಲಿ 1 ನಿಮಿಷ, 0.49 ಸೆಕೆಂಡ್​ನಲ್ಲಿ ಈಜಿದರೆ, ಬ್ಯಾಕ್​ಸ್ಟ್ರೊಕ್​ ವಿಭಾಗದಲ್ಲಿ 1 ನಿಮಿಷ, 5.16 ಸೆಕೆಂಡ್​ಗಳಲ್ಲಿ ಈಜಿ ಚಿನ್ನಕ್ಕೆ ಕೊರಳೊಡ್ಡಿದರು. ಎರಡೂ ಸ್ಪರ್ಧೆಗಳಲ್ಲಿ ಅವರು ಕ್ರಮವಾಗಿ ನೀನಾ ವೆಂಕಟೇಶ್​ (1ನಿ,3.45ಸೆ) ಮತ್ತು ರಿಧಿಮಾ (1ನಿ,5.81ಸೆ) ದಾಖಲೆ ಅಳಿಸಿದರು.

ಶೋನ್​ ಗಂಗೂಲಿ ಪುರುಷರ 400 ಮೀ. ಮೆಡ್ಲೆಯಲ್ಲಿ 4 ನಿಮಿಷ, 31.99 ಸೆಕೆಂಡ್​ಗಳಲ್ಲಿ ಈಜಿ ಶಿವಾ ಎಸ್​. (4ನಿ, 33.77ಸೆ) ದಾಖಲೆ ಮುರಿಯುವ ಮೂಲಕ ಚಿನ್ನ ಗೆದ್ದರು. ನೈಷಾ ಮಹಿಳೆಯರ 200 ಮೀ. ಬ್ಯಾಕ್​ಸ್ಟ್ರೊಕ್​ನಲ್ಲಿ 2 ನಿಮಿಷ, 23.92 ಸೆಕೆಂಡ್​ಗಳಲ್ಲಿ ಈಜಿ, ರಿದಿಮಾ (2ನಿ,24.54ಸೆ) ದಾಖಲೆ ಅಳಿಸಿ ಸ್ವರ್ಣ ಒಲಿಸಿಕೊಂಡರು. ಲಕ್ಷ್ಯ ಮಹಿಳೆಯರ 100 ಮೀ. ಬ್ಯಾಕ್​ಸ್ಟ್ರೊಕ್​ನಲ್ಲಿ 1 ನಿಮಿಷ, 13.67 ಸೆಕೆಂಡ್​ಗಳಲ್ಲಿ ಈಜಿ, ಮಾನವಿ ವರ್ಮ (1ನಿ,14.92ಸೆ) ದಾಖಲೆ ಮುರಿದು ಅಗ್ರಸ್ಥಾನ ಗಳಿಸಿದರು. ತಾನ್ಯಾ ಮಹಿಳೆಯರ 400 ಮೀ. ಮೆಡ್ಲೆಯಲ್ಲಿ 5 ನಿಮಿಷ, 8.65 ಸೆಕೆಂಡ್​ಗಳಲ್ಲಿ ಈಜಿ 2024ರಲ್ಲಿ ತಾನೇ ರಚಿಸಿದ್ದ ದಾಖಲೆ (5ನಿ,11.17ಸೆ) ಸುಧಾರಿಸುವ ಮೂಲಕ ಚಿನ್ನ ಒಲಿಸಿಕೊಂಡರು.

ಪುರುಷರ 200 ಮೀ. ಫ್ರೀಸ್ಟೈಲ್​​ನಲ್ಲಿ ಅನೀಶ್​ ಗೌಡ (1ನಿ, 51.87 ಸೆ), ದರ್ಶನ್​ ಎಸ್​. (1ನಿ,51.92ಸೆ) ಇಬ್ಬರೂ ಕೂಟ ದಾಖಲೆ ಮುರಿದರು. ಆದರೆ ಅನೀಶ್​ ಚಿನ್ನ ಗೆದ್ದರೆ, ದರ್ಶನ್​ ಬೆಳ್ಳಿಗೆ ತೃಪ್ತಿಪಟ್ಟರು. ಅನೀಶ್​ ಕಳೆದ ವರ್ಷ ತಾವೇ ಬರೆದಿದ್ದ ದಾಖಲೆ (1ನಿ,52.41ಸೆ) ಸುಧಾರಿಸಿಕೊಂಡರು.

ಡಾಲ್ಫಿನ್​ ಅಕ್ವೆಟಿಕ್ಸ್​ ಪ್ರತಿನಿಧಿಸಿದ ಒಲಿಂಪಿಯನ್​ ಧಿನಿಧಿ ದೇಸಿಂಘು ಮಹಿಳೆಯರ 400 ಮೀ. ಫ್ರೀಸ್ಟೈಲ್​​ ಮತ್ತು 100 ಮೀ. ಫ್ರೀಸ್ಟೈಲ್​​ ವಿಭಾಗಗಳಲ್ಲಿ ಚಿನ್ನ ಗೆದ್ದುಕೊಂಡರು.

ಹಾಲಿ ವರ್ಷ ಅಹಮದಾಬಾದ್​ನಲ್ಲಿ ನಡೆಯಲಿರುವ 79ನೇ ಸೀನಿಯರ್​ ರಾಷ್ಟ್ರೀಯ ಚಾಂಪಿಯನ್​ಷಿಪ್​ಗೆ ಇದು ಅರ್ಹತಾ ಕೂಟವೂ ಆಗಿದ್ದು, ಬುಧವಾರ 3ನೇ ಹಾಗೂ ಕೊನೇ ದಿನದ ಸ್ಪರ್ಧೆಗಳು ನಡೆಯಲಿವೆ.