ಒಂದೇ ಒಂದು ಪಂದ್ಯ ಗೆಲ್ಲದಿದ್ರೂ ಟಿ20 ವಿಶ್ವಕಪ್​ನಲ್ಲಿ ಜಾಕ್​ಪಾಟ್​ ಹೊಡೆದ ತಂಡಗಳಿವು! T20 World Cup

ನವದೆಹಲಿ: ಟಿ20 ವಿಶ್ವಕಪ್ 2026 ಟೂರ್ನಿಯಲ್ಲಿ 8 ತಂಡಗಳು ಇದೀಗ ಸೂಪರ್ 8 ಹಂತವನ್ನು ಪ್ರವೇಶಿಸಿದ್ದು, ಇಂದಿನಿಂದ ಸೆಮಿಫೈನಲ್​ಗೆ ತಲುಪಲು ಭಾರೀ ಹಣಾಹಣಿ ನಡೆಯಲಿದೆ.  20 ತಂಡಗಳೊಂದಿಗೆ ಆರಂಭವಾದ ಈ ಮೆಗಾ ಟೂರ್ನಮೆಂಟ್‌ನಲ್ಲಿ, 12 ತಂಡಗಳು ಈಗಾಗಲೇ ತವರಿಗೆ ವಾಪಾಸ್​ ಆಗಿವೆ. ಭಾರತ, ದಕ್ಷಿಣ ಆಫ್ರಿಕಾ, ಶ್ರೀಲಂಕಾ, ವೆಸ್ಟ್​ ಇಂಡೀಸ್​ನಂತಹ ಬಲಿಷ್ಠ ತಂಡಗಳು ಸೆಮಿಫೈನಲ್​ಗೆ ಎಂಟ್ರಿಕೊಡಲಿವೆ ಎಂಬ ಲೆಕ್ಕಾಚಾರಗಳ ಒಂದೆಡೆಯಾದರೆ, ಈ ಟೂರ್ನಮೆಂಟ್‌ನಲ್ಲಿ ಒಂದೇ ಒಂದು ಪಂದ್ಯವನ್ನು ಗೆಲ್ಲದ ಟೀಮ್​ಗಳು ಬರಿಗೈಯಲ್ಲಿ ಹಿಂತಿರುಗಿಲ್ಲ. ಬದಲಿಗೆ ಕೋಟ್ಯಂತರ ರೂಪಾಯಿ ಬಹುಮಾನದ ಹಣದೊಂದಿಗೆ ತವರಿಗೆ ಮರಳಿವೆ.

ಟಿ20 ವಿಶ್ವಕಪ್‌ ಟೂರ್ನಿಯಲ್ಲಿ, ಒಟ್ಟು ಮೂರು ತಂಡಗಳು ಆಡಿದ ನಾಲ್ಕು ಲೀಗ್ ಪಂದ್ಯಗಳಲ್ಲಿ ಸೋತಿವೆ. 'ಗ್ರೂಪ್-ಎ'ನಲ್ಲಿದ್ದ  ನಮೀಬಿಯಾವನ್ನು ಭಾರತ, ಪಾಕಿಸ್ತಾನ, ನೆದರ್‌ಲ್ಯಾಂಡ್ಸ್ ಮತ್ತು ಯುಎಸ್‌ಎ ಸೋಲಿಸಿತು. ಎರಡನೆಯದು ಕೆನಡಾ. ದಕ್ಷಿಣ ಆಫ್ರಿಕಾ, ನ್ಯೂಜಿಲೆಂಡ್, ಅಫ್ಘಾನಿಸ್ತಾನ ಮತ್ತು ಯುಎಇ ವಿರುದ್ಧ ಒಂದೇ ಒಂದು ಪಂದ್ಯವನ್ನು ಗೆಲ್ಲಲು ಈ ತಂಡಕ್ಕೆ ಸಾಧ್ಯವಾಗಲಿಲ್ಲ. ಇನ್ನು ಮೂರನೆಯದು ಓಮನ್. ಈ ತಂಡವು ಜಿಂಬಾಬ್ವೆ, ಶ್ರೀಲಂಕಾ, ಆಸ್ಟ್ರೇಲಿಯಾ ಮತ್ತು ಐರ್ಲೆಂಡ್ ವಿರುದ್ಧ ಹೀನಾಯ ಸೋಲುಂಡಿತು. ಉಳಿದ 17 ತಂಡಗಳು ಟೂರ್ನಿಯಲ್ಲಿ ಕನಿಷ್ಠ ಒಂದು ಗೆಲುವನ್ನು ದಾಖಲಿಸುವಲ್ಲಿ ಯಶಸ್ವಿಯಾಗಿವೆ ಎಂಬುದು ಗಮನಾರ್ಹ. 

ಐಸಿಸಿ ನಿಯಮಗಳ ಅನುಸಾರ, ಈ ಮೆಗಾ ಟೂರ್ನಮೆಂಟ್‌ನಲ್ಲಿ ಭಾಗವಹಿಸುವ ಪ್ರತಿಯೊಂದು ತಂಡವು ಅವರ ಶ್ರೇಯಾಂಕದ ಆಧಾರದ ಮೇಲೆ ಬಹುಮಾನ ಹಣವನ್ನು ಪಡೆಯುತ್ತದೆ. ಹಿಂದಿನ ಅಂಕಿಅಂಶಗಳ ಪ್ರಕಾರ, ಈ ಟೂರ್ನಮೆಂಟ್‌ನಲ್ಲಿ 13ರಿಂದ 20ನೇ ಸ್ಥಾನದಲ್ಲಿರುವ ತಂಡಗಳಿಗೆ ಸುಮಾರು 225,000 ಡಾಲರ್​ ನೀಡಲಾಗುತ್ತದೆ. ಅಂದರೆ, ಭಾರತೀಯ ಕರೆನ್ಸಿಯಲ್ಲಿ ಇದು ಸುಮಾರು 2 ಕೋಟಿ ರೂ.ಗೆ ಸಮ.

ಇನ್ನು 9ರಿಂದ 12ನೇ ಸ್ಥಾನದಲ್ಲಿರುವ ತಂಡಗಳು ಸುಮಾರು 2.25 ಕೋಟಿ ರೂ. (247,500 ಡಾಲರ್) ಪಡೆಯುತ್ತವೆ. ಅದರಂತೆ, ಒಂದೇ ಒಂದು ಪಂದ್ಯವನ್ನು ಗೆಲ್ಲದ ಓಮನ್, ನಮೀಬಿಯಾ ಮತ್ತು ಕೆನಡಾದಂತಹ ತಂಡಗಳೂ ಸಹ ಐಸಿಸಿಯಿಂದ ಕನಿಷ್ಠ 2 ಕೋಟಿ ರೂ. ಹಣವನ್ನು ಬಹುಮಾನದ ರೂಪದಲ್ಲಿ ಪಡೆಯಲಿದೆ. 

ಸಹವರ್ತಿ ರಾಷ್ಟ್ರಗಳಾಗಿರುವ ಈ ತಂಡಗಳಿಗೆ ನೀಡಲಾಗುವ ಬಹುಮಾನ ಹಣವನ್ನು ಆಯಾ ದೇಶಗಳಲ್ಲಿ ಕ್ರಿಕೆಟ್ ಮೂಲಸೌಕರ್ಯವನ್ನು ಅಭಿವೃದ್ಧಿಪಡಿಸಲು, ಯುವ ಆಟಗಾರರನ್ನು ಉತ್ತೇಜಿಸಲು ಮತ್ತು ಮುಂದಿನ ಅಂತಾರಾಷ್ಟ್ರೀಯ ಟೂರ್ನಿ ಆಯೋಜಿಸಲು ಅಥವಾ ನಡೆಸಲು ತಯಾರಿಗೆ ಬಳಸಲಾಗುತ್ತದೆ,(ಏಜೆನ್ಸೀಸ್).