ವೈಭವ್​ ಆಟ ನೋಡಿ ಆನಂದಿಸಿ, ವಯಸ್ಸನ್ನಲ್ಲ!..ರಾಜಸ್ಥಾನ್ ರಾಯಲ್ಸ್ ವಂಡರ್ ಕಿಡ್ ಪರ ಬ್ಯಾಟ್​​ ಬೀಸಿದ ಪಾರ್ಥಿವ್ ಪಟೇಲ್ | Vaibhav Sooryavanshi

ಕ್ವಾಲಿಫೈಯರ್ 2 ಪಂದ್ಯದ ಮುನ್ನ ನಡೆದ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಪಾರ್ಥಿವ್ ಪಟೇಲ್, ವೈಭವ್ ಸೂರ್ಯವಂಶಿಯನ್ನು ಕೇವಲ ಒಬ್ಬ ಅಪ್ರತಿಮ ಪ್ರತಿಭೆಯಾಗಿ ನೋಡಬೇಕೇ ವಿನಃ ಅದಕ್ಕೆ ವಯಸ್ಸಿನ ಲಿಂಕ್ ಕೊಡಬಾರದು ಎಂದು ಹೇಳಿದ್ದಾರೆ.

ವೈಭವ್​ ಬ್ಯಾಟಿಂಗ್ ಮಾಡುತ್ತಿರುವ ಶೈಲಿಯನ್ನು ನೋಡುವುದು ಕಣ್ಣಿಗೆ ಹಬ್ಬ, ನಾವು ಪದೇ ಪದೇ ಅವರ ವಯಸ್ಸಿನ ಬಗ್ಗೆ ಮಾತನಾಡುವುದನ್ನು ನಿಲ್ಲಿಸಬೇಕು. ಅದಕ್ಕೊಂದು ಕೊನೆ ಹಾಡಬೇಕಿದೆ. ಅವರು ನಿಜಕ್ಕೂ ಅದ್ಭುತ ಪ್ರತಿಭೆ. ಆದರೆ ಎದುರಾಳಿ ತಂಡದ ದೃಷ್ಟಿಕೋನದಿಂದ ಹೇಳುವುದಾದರೆ, ನಾಳಿನ ಪಂದ್ಯದಲ್ಲಿ ಅವರು ನಮ್ಮ ವಿರುದ್ಧ ಅಬ್ಬರಿಸದಿರಲಿ ಎಂದು ನಾವು ಆಶಿಸುತ್ತೇವೆ ಎಂದು ಪಾರ್ಥಿವ್ ಪಟೇಲ್ ತಿಳಿಸಿದ್ದಾರೆ.

ಈಗಾಗಲೇ ಗುಜರಾತ್ ಟೈಟನ್ಸ್ ವಿರುದ್ಧ ಕೇವಲ 35 ಎಸೆತಗಳಲ್ಲಿ ಅಜೇಯ 101 ರನ್ ಗಳಿಸಿ ವೈಭವ್ ಈಗಾಗಲೇ ದೂಳೆಬ್ಬಿಸಿದ್ದಾರೆ. ಆಡಿರುವ 3 ಪಂದ್ಯಗಳಲ್ಲಿ ಸೂರ್ಯವಂಶಿ 56 ರ ಸರಾಸರಿಯಲ್ಲಿ 168 ರನ್ ಗಳಿಸಿದ್ದಾರೆ. ಹೀಗಾಗಿ ಅವರ ಶಕ್ತಿ ಏನೆಂಬುದು ಜಿಟಿ ತಂಡಕ್ಕೆ ಚೆನ್ನಾಗಿ ಗೊತ್ತು. ಆದರೆ, ಎಲಿಮಿನೇಟರ್ ಪಂದ್ಯಕ್ಕೂ ಮುನ್ನ ಸನ್‌ರೈಸರ್ಸ್ ಹೈದರಾಬಾದ್ ತಂಡ ಸೂರ್ಯವಂಶಿ ವಿರುದ್ಧ ನಮ್ಮ ಬಳಿ ಹಲವು ಪ್ಲಾನ್‌ಗಳಿವೆ ಎಂದು ಬಹಿರಂಗಪಡಿಸಿ ಎಡವಟ್ಟು ಮಾಡಿಕೊಂಡಿತ್ತು. ಪಾರ್ಥಿವ್ ಪಟೇಲ್ ಮಾತ್ರ ಆ ತಪ್ಪು ಮಾಡಲು ಸಿದ್ಧರಿಲ್ಲ.

ಮಾಧ್ಯಮದವರ ಪ್ರಶ್ನೆಗೆ ಉತ್ತರಿಸಿದ ಪಾರ್ಥಿವ್​, ಸರ್, ನಾನು ಬ್ರಾಡ್‌ಕಾಸ್ಟರ್ ಅಲ್ಲ, ಅಥವಾ ಸ್ಟಾರ್ ಸ್ಪೋರ್ಟ್ಸ್‌ನ ಪ್ರಿ-ಶೋನಲ್ಲಿ ಕುಳಿತಿಲ್ಲ. ಹಾಗಾಗಿ ನಾವು ಏನು ಪ್ಲಾನ್ ಮಾಡಿದ್ದೇವೆ ಎಂಬುದನ್ನು ಇಲ್ಲಿ ಹೇಳಲು ಸಾಧ್ಯವಿಲ್ಲ. ಆದರೆ ಅವರ ಬ್ಯಾಟಿಂಗ್ ನೋಡಿ ನನಗೆ ತುಂಬಾ ಸಂತೋಷವಾಗಿದೆ ಎಂದು ಪಾರ್ಥಿವ್ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.

ನಾವು ವೈಭವ್​​ರನ್ನು ಆದಷ್ಟು ಬೇಗ ಔಟ್ ಮಾಡಲು ಪ್ರಯತ್ನಿಸುತ್ತೇವೆ, ಎಲ್ಲರಂತೆಯೇ ನಾವು ಕೂಡ ಕೆಲವು ಯೋಜನೆಗಳನ್ನು ಸಿದ್ಧಪಡಿಸಿಕೊಂಡಿದ್ದೇವೆ. ಅವರ ಬ್ಯಾಟಿಂಗ್ ವಿಡಿಯೋಗಳನ್ನು ನೋಡಿದ್ದೇವೆ ಎಂದಿರುವ ಪಾರ್ಥಿವ್ ಪಟೇಲ್, ನಮ್ಮ ಯೋಜನೆಗಳನ್ನು ಮೈದಾನದಲ್ಲಿ ಯಶಸ್ವಿಯಾಗಿ ಕಾರ್ಯಗತಗೊಳಿಸುವ ನಂಬಿಕೆ ನಮಗಿದ್ದು, ಆ ಪ್ಲಾನ್ ಏನೆಂಬುದನ್ನು ನಾನು ಈಗಲೇ ಹೇಳಲ್ಲ, ಅದನ್ನು ನೀವು ನೇರವಾಗಿ ಮೈದಾನದಲ್ಲೇ ನೋಡಲಿದ್ದೀರಿ ಎಂದು ಹೇಳಿದರು.

ಬುಧವಾರ (ಮೇ 27) ನಡೆದ ಸನ್‌ರೈಸರ್ಸ್ ಹೈದರಾಬಾದ್ ವಿರುದ್ಧದ ಎಲಿಮಿನೇಟರ್ ಪಂದ್ಯದಲ್ಲಿ ಕೇವಲ 29 ಎಸೆತಗಳಲ್ಲಿ ಭರ್ಜರಿ 97 ರನ್ ಚಚ್ಚಿದ ಸೂರ್ಯವಂಶಿ, ರಾಜಸ್ಥಾನ್ ರಾಯಲ್ಸ್ ತಂಡ ಕ್ವಾಲಿಫೈಯರ್ 2 ಹಂತಕ್ಕೇರಲು ಪ್ರಮುಖ ಕಾರಣಿಕರ್ತರಾದರು. ಪ್ರಸಕ್ತ ಐಪಿಎಲ್​ನಲ್ಲಿ ಅಬ್ಬರಿಸುತ್ತಿರುವ ಈ ಯುವ ಆಟಗಾರ 15 ಪಂದ್ಯಗಳಿಂದ 242.86 ರ ಅದ್ಭುತ ಸ್ಟ್ರೈಕ್ ರೇಟ್‌ನಲ್ಲಿ ಒಟ್ಟು 680 ರನ್ ಸಿಡಿಸಿದ್ದಾರೆ(ಏಜೆನ್ಸೀಸ್​​).