ಎರಡೇ ದಿನಗಳಲ್ಲಿ ಎರಡನೇ ಟೆಸ್ಟ್​ ಗೆದ್ದ ಆಸೀಸ್​; ಬಾಂಗ್ಲಾ ಎದುರಿನ ಸರಣಿ ಸಮಬಲ

ಮೆಕಾಯ್​: ಎಡಗೈ ವೇಗಿ (

Mitchell Starc

) ಮಿಚೆಲ್​ ಸ್ಟಾರ್ಕ್​ (39ಕ್ಕೆ 4) ದಾಳಿಗೆ ಬಾಂಗ್ಲಾದೇಶ ತಂಡ ಎರಡನೇ ಇನಿಂಗ್ಸ್​ನಲ್ಲೂ ಕುಸಿತ ಕಾಣುವುದರೊಂದಿಗೆ ಆತಿಥೇಯ ಆಸ್ಟ್ರೆಲಿಯಾ ತಂಡ ಎರಡನೇ ಹಾಗೂ ಅಂತಿಮ ಟೆಸ್ಟ್​ ಪಂದ್ಯದಲ್ಲಿ ಇನಿಂಗ್ಸ್​ ಮತ್ತು 51 ರನ್​ ಗಳಿಂದ ಗೆಲುವು ದಾಖಲಿಸಿದೆ. ಮೊದಲ ಟೆಸ್ಟ್​ ಆಘಾತಕ್ಕೆ ಎರಡೇ ದಿನಗಳಲ್ಲಿ ಗೆದ್ದು ತಿರುಗೇಟು ನೀಡಿದ ಆಸೀಸ್​, ಸರಣಿಯಲ್ಲಿ 1-1 ಸಮಬಲ ಸಾಧಿಸಿತು. ಪಂದ್ಯದಲ್ಲಿ 10 ಮತ್ತು ಸರಣಿಯಲ್ಲಿ 12 ವಿಕೆಟ್​ ಕಬಳಿಸಿದ ಸ್ಟಾರ್ಕ್​ ಪಂದ್ಯಶ್ರೇಷ್ಠ ಮತ್ತು ಸರಣಿಶ್ರೇಷ್ಠ ಪ್ರಶಸ್ತಿ ಬಾಚಿಕೊಂಡರು.

ಗ್ರೇಟ್​ ಬ್ಯಾರಿಯರ್​ ಅರೇನಾದಲ್ಲಿ ಭಾನುವಾರ ಮುಕ್ತಾಯಗೊಂಡ ಪಂದ್ಯದಲ್ಲಿ 8 ವಿಕೆಟ್​ಗೆ 165 ರನ್​ಗಳಿಂದ 2ನೇ ದಿನದಾಟ ಆರಂಭಿಸಿದ ಆಸೀಸ್​, ಮತ್ತೆ 45 ರನ್​ ಸೇರಿಸಿ 210 ರನ್​ಗಳಿಗೆ ಆಲೌಟ್​ ಆಯಿತು. 146 ರನ್​ ಹಿನ್ನಡೆಯೊಂದಿಗೆ 2ನೇ ಇನಿಂಗ್ಸ್​ ಆರಂಭಿಸಿದ ಬಾಂಗ್ಲಾ, ಚಹಾ ವಿರಾಮದ ಬಳಿಕ 95 ರನ್​ಗಳಿಗೆ ಸರ್ವಪತನ ಕಂಡು ಶರಣಾಯಿತು. 23 ವರ್ಷಗಳ ಬಳಿಕ ಆಸೀಸ್​ ನೆಲದಲ್ಲಿ ಟೆಸ್ಟ್​ ಸರಣಿ ಆಡಿದ ಬಾಂಗ್ಲಾ, ಸೋಲಿನ ನಡುವೆ ಸರಣಿ ಸಮಬಲದ ಸಂತಸ ಕಂಡಿತು.

ಐಸಿಸಿ ವಿಶ್ವ ಟೆಸ್ಟ್​ ಚಾಂಪಿಯನ್​ಷಿಪ್​ ಅಂಕಪಟ್ಟಿಯಲ್ಲಿ ಆಸೀಸ್​ ಶೇ. 80 ಅಂಕದೊಂದಿಗೆ ಅಗ್ರಸ್ಥಾನ ಭದ್ರಪಡಿಸಿಕೊಂಡಿತು. ಬಾಂಗ್ಲಾ ಸದ್ಯ 4ನೇ ಸ್ಥಾನದಲ್ಲಿದ್ದರೂ, ಭಾರತ ಕೊಲಂಬೊ ಟೆಸ್ಟ್​ ಗೆದ್ದರೆ 5ನೇ ಸ್ಥಾನಕ್ಕೆ ಕುಸಿಯಲಿದೆ.