ನಮ್ಮವರೇ ಮೊದಲು... ವೈಭವ್ ಸೂರ್ಯವಂಶಿ ಕೆಣಕಿದ ಲಂಕಾ ಆಟಗಾರರಿಗೆ ಕ್ಯಾಪ್ಟನ್ ಸಹನ್​​ ಕ್ಲಾಸ್​ | Vaibhav Sooryavanshi

Vaibhav Sooryavanshi: ನಿನ್ನೆಯಷ್ಟೇ (ಜೂ.21) ಮುಗಿದ ತ್ರಿಕೋನ ಸರಣಿಯ ಫೈನಲ್​ ಪಂದ್ಯದಲ್ಲಿ ಶ್ರೀಲಂಕಾ 'ಎ' ವಿರುದ್ಧ ಭಾರತ 'ಎ' ತಂಡ ಭರ್ಜರಿ ಗೆಲುವು ಸಾಧಿಸಿತು. ಇಡೀ ಪಂದ್ಯದ ಲೆಕ್ಕಾಚಾರವನ್ನು ಬದಲಿಸಿದ ಟೀಮ್ ಇಂಡಿಯಾದ ಯುವ ಬ್ಯಾಟಿಂಗ್ ಸೆನ್ಸೇಷನ್ ವೈಭವ್ ಸೂರ್ಯವಂಶಿ, ತಮ್ಮನ್ನು ಕೆಣಕಿದ ಲಂಕಾ ಪಡೆಗೆ ಮುಟ್ಟಿ ನೋಡಿಕೊಳ್ಳುವಂತೆ ಉತ್ತರಿಸಿದರು. ಇನ್ನು ತಂಡ ಸೋತ ಬೆನ್ನಲ್ಲೇ ಮಾತನಾಡಿದ ಶ್ರೀಲಂಕಾ ಕ್ಯಾಪ್ಟನ್, ತಮ್ಮ ಆಟಗಾರರ ಬಗ್ಗೆ​ ಅಚ್ಚರಿ ಹೇಳಿಕೆಗಳನ್ನು ನೀಡಿದ್ದಾರೆ.

ಶ್ರೀಲಂಕಾ 'ಎ' ತಂಡದ ನಾಯಕ ಸಹನ್ ಅರಾಚಿ ಮಾತನಾಡಿ, ಟೀಮ್ ಇಂಡಿಯಾದ ಯುವ ಆರಂಭಿಕ ಆಟಗಾರ ವೈಭವ್ ಸೂರ್ಯವಂಶಿ ಅವರಿಂದ ಬಂದ ಅದ್ಭುತ ಇನ್ನಿಂಗ್ಸ್ ಹಾಗೂ ಕೊನೆಯ ಓವರ್‌ಗಳಲ್ಲಿ ಭಾರತದ ಗಳಿಸಿದ ವೇಗದ ರನ್‌ಗಳು ನಮ್ಮ ಸೋಲಿಗೆ ಪ್ರಮುಖ ಕಾರಣವಾಯಿತು ಎಂದರು.

ಟೀಮ್ ಇಂಡಿಯಾದ ಬ್ಯಾಟಿಂಗ್​ ಬಹಳ ಚೆನ್ನಾಗಿತ್ತು. ಪವರ್‌ಪ್ಲೇನಲ್ಲಿ ವೈಭವ್ ಸೂರ್ಯವಂಶಿ ನಿಜವಾಗಿಯೂ ಅದ್ಭುತ ಇನ್ನಿಂಗ್ಸ್ ಆಡಿದರು. ಅವರ ಸ್ಪೋಟಕ ಬ್ಯಾಟಿಂಗ್, ನಮ್ಮ ಬೌಲರ್‌ಗಳನ್ನು ಒತ್ತಡಕ್ಕೆ ಸಿಲುಕಿಸಿತು. ಆರಂಭದ ಹಂತದಲ್ಲೇ ಪಂದ್ಯವನ್ನು ನಮ್ಮಿಂದ ದೂರ ತೆಗೆದುಕೊಂಡು ಹೋದರು. ನಾವು ಮಿಡಲ್​ ಓವರ್‌ಗಳಲ್ಲಿ ಪಂದ್ಯವನ್ನು ಗೆಲ್ಲಲು ಪ್ರಯತ್ನಿಸಿದರೂ, ಕೊನೆಯ ಎರಡು ಓವರ್‌ಗಳು ಸಹ ಸಂಪೂರ್ಣವಾಗಿ ಭಾರತದ ಕಡೆ ಹೋಗಿತ್ತು. ನಮ್ಮವರೇ ಒತ್ತಡವನ್ನು ಹೊತ್ತುಕೊಂಡಿದ್ದು ಸೋಲಿಗೆ ಮುಖ್ಯ ಕಾರಣ ಎಂದು ಹೇಳಿದರು.

378 ರನ್‌ಗಳ ಬೃಹತ್ ಗುರಿಯನ್ನು ಬೆನ್ನತ್ತಿದಾಗ, ತಂಡದಲ್ಲಿರುವ ಒಬ್ಬರು ಅಥವಾ ಇಬ್ಬರು ಅಗ್ರ ಬ್ಯಾಟ್ಸ್‌ಮನ್‌ಗಳು ದೊಡ್ಡ ಇನ್ನಿಂಗ್ಸ್‌ಗಳನ್ನು ಕೊಡಬೇಕು. ಆಗ ಗೆಲುವಿಗೆ ನಾವು ಹತ್ತಿರವಾಗಲು ಸಾಧ್ಯ. ನಮ್ಮ ತಂಡದಲ್ಲಿ ವನಜಾ ಸಹನ್ (62 ರನ್​) ಮತ್ತು ಸದೀರಾ ಸಮರವಿಕ್ರಮ (52) ಉತ್ತಮ ಜೊತೆಯಾಟ ನೀಡಿದರು. ಆದರೆ, ಗುರಿ ತಲುಪಲು ಇಷ್ಟು ರನ್​ಗಳು ಸಾಲಲಿಲ್ಲ. ಮಧ್ಯಮ ಕ್ರಮಾಂಕದಲ್ಲಿ ಇನ್ನೂ ಹೆಚ್ಚು ಕೊಡುಗೆ ಸಿಕ್ಕಿದ್ದರೆ, ಖಂಡಿತ ಫಲಿತಾಂಶ ಬೇರೆಯೇ ಇರುತ್ತಿತ್ತು ಎಂದರು.

ಭಾನುವಾರ ದಂಬುಲ್ಲಾ ಅಂತಾರಾಷ್ಟ್ರೀಯ ಕ್ರೀಡಾಂಗಣದಲ್ಲಿ ಶ್ರೀಲಂಕಾ ವಿರುದ್ಧದ ತ್ರಿಕೋನ ಸರಣಿಯ ಅಂತಿಮ ಪಂದ್ಯದಲ್ಲಿ ವೈಭವ್ ಅವರ ಸ್ಫೋಟಕ ಆಟಕ್ಕೆ ಎದುರಾಳಿ ತಂಡದ ಆಟಗಾರರು ಅಕ್ಷರಶಃ ಬೆರಗಾದರು. ಕೇವಲ 11 ಎಸೆತಗಳಲ್ಲಿ ಅರ್ಧಶತಕ ಬಾರಿಸಿದ ವೈಭವ್​, 10 ಬೌಂಡರಿ, 8 ಸಿಕ್ಸರ್​ ಸಹಾಯದಿಂದ 94 ರನ್​ ಕಲೆಹಾಕಿದರು. ಇದು ವಿಶ್ವ ದಾಖಲೆಗೆ ಸಾಕ್ಷಿಯಾಯಿತು. ಈ ಮೂಲಕ ಲಿಸ್ಟ್-ಎ ಕ್ರಿಕೆಟ್ ಇತಿಹಾಸದಲ್ಲಿ ಅತ್ಯಂತ ವೇಗದ ಅರ್ಧಶತಕ ದಾಖಲಿಸಿದ ಆಟಗಾರನಾಗಿ ವೈಭವ್ ಮಿಂಚಿದ್ದಾರೆ.