ಟೀಮ್ ಇಂಡಿಯಾ ಮಾಜಿ ಆಟಗಾರ ಆರ್.ಅಶ್ವಿನ್ ಜತೆಗೆ ಕೈ ಜೋಡಿಸಿದ ಸ್ಪೇನ್‌ನ ಸ್ಟಾರ್ ಫುಟ್‌ಬಾಲ್ ಆಟಗಾರ!

ಬೆಂಗಳೂರು: ಫುಟ್‌ಬಾಲ್ ದಿಗ್ಗಜ ಹಾಗೂ ಉದ್ಯಮಿ ಗೆರಾರ್ಡ್ ಪಿಕೆ ಅವರು ಫೈಯರ್ಸ್ ಅಮೆರಿಕನ್ ಗ್ಯಾಂಬಿಟ್ಸ್ (FYERS American Gambits) ತಂಡದಲ್ಲಿ ಕಾರ್ಯತಂತ್ರದ ಷೇರುದಾರರಾಗಿ ಸೇರ್ಪಡೆಯಾಗಿದ್ದಾರೆ. ಈ ಬೆಳವಣಿಗೆಯು ಚೆಸ್ ಕ್ರೀಡೆಯ ಜಾಗತಿಕ ಬೆಳವಣಿಗೆಗೆ ದೀರ್ಘಕಾಲಿಕ ಕೊಡುಗೆ ನೀಡುವ ತಂಡದ ಮಹತ್ವಾಕಾಂಕ್ಷೆಯನ್ನು ಮತ್ತಷ್ಟು ಬಲಪಡಿಸಿದೆ.

ಸ್ಪೇನ್ ಪರ ಫಿಫಾ ವಿಶ್ವಕಪ್ ಗೆದ್ದಿರುವ ಹಾಗೂ ತಮ್ಮ ಪೀಳಿಗೆಯ ಅತ್ಯಂತ ಯಶಸ್ವಿ ಫುಟ್‌ಬಾಲ್ ಆಟಗಾರರಲ್ಲಿ ಒಬ್ಬರಾಗಿರುವ ಪಿಕೆ, ಉನ್ನತ ಮಟ್ಟದ ಕ್ರೀಡೆ, ಜಾಗತಿಕ ಅಭಿಮಾನಿ ಸಮುದಾಯಗಳು ಮತ್ತು ಹೊಸ ಮಾದರಿಯ ಕ್ರೀಡಾ ಉದ್ಯಮಗಳ ಬಗ್ಗೆ ಅಪಾರ ಅನುಭವ ಹೊಂದಿದ್ದಾರೆ. ಅವರ ಸೇರ್ಪಡೆ ಚೆಸ್ ಕ್ರೀಡೆಯು ಸ್ಪರ್ಧೆ, ತಂತ್ರಜ್ಞಾನ, ಮನರಂಜನೆ ಮತ್ತು ಸಂಸ್ಕೃತಿಯನ್ನು ಒಳಗೊಂಡ ಜಾಗತಿಕ ಕ್ರೀಡಾ ಪರಿಸರವಾಗಿ ಬೆಳೆಯುತ್ತಿರುವುದನ್ನು ಪ್ರತಿಬಿಂಬಿಸುತ್ತದೆ.

ಚೆಸ್ ಜಾಗತಿಕವಾಗಿ ವೇಗವಾಗಿ ಬೆಳೆಯುತ್ತಿರುವ ಸಂದರ್ಭದಲ್ಲಿ, ಫೈಯರ್ಸ್ ಅಮೆರಿಕನ್ ಗ್ಯಾಂಬಿಟ್ಸ್ ಭವಿಷ್ಯದ ಚೆಸ್ ಕ್ರೀಡೆಯನ್ನು ರೂಪಿಸುವ ಉದ್ದೇಶದಿಂದ ತನ್ನ ಫ್ರಾಂಚೈಸನ್ನು ಅಭಿವೃದ್ಧಿಪಡಿಸುತ್ತಿದೆ. ಮಾಜಿ ಅಂತಾರಾಷ್ಟ್ರೀಯ ಕ್ರಿಕೆಟಿಗ ರವಿಚಂದ್ರನ್ ಅಶ್ವಿನ್ ಸೇರಿದಂತೆ ಹಲವು ಕಾರ್ಯತಂತ್ರದ ಷೇರುದಾರರ ಬೆಂಬಲ ಹೊಂದಿರುವ ತಂಡವು, ಸೆಪ್ಟೆಂಬರ್ 3ರಿಂದ 13ರವರೆಗೆ ಬೆಂಗಳೂರಿನಲ್ಲಿ ನಡೆಯಲಿರುವ ಜಾಗತಿಕ ಚೆಸ್ ಲೀಗ್ ( Global Chess League) 2026ರ 4ನೇ ಆವೃತ್ತಿಯಲ್ಲಿ ಸ್ಪರ್ಧಿಸಲಿದೆ.

ತಂಡದ ಪ್ರಮುಖ ಆಟಗಾರರಾಗಿ ಜವೋಖಿರ್ ಸಿಂದರೋವ್, ನಿಹಾಲ್ ಸರಿನ್, ಡ್ಯಾನಿಲ್ ದುಬೋವ್, ಬಿಬಿಸಾರಾ ಅಸ್ಸೌಬಯೇವಾ, ಸಾರಾ ಖಾದೆಮ್ ಮತ್ತು ಮಾರ್ಕ್-ಆಂಡ್ರಿಯಾ ಮೌರಿಜ್ಜಿ ಇದ್ದಾರೆ. ತಂಡದ ನಾಯಕತ್ವವನ್ನು ಗ್ರ್ಯಾಂಡ್‌ಮಾಸ್ಟರ್ ಶ್ರೀನಾಥ್ ನಾರಾಯಣನ್ ವಹಿಸಲಿದ್ದಾರೆ.

ಫೈಯರ್ಸ್ ಅಮೆರಿಕನ್ ಗ್ಯಾಂಬಿಟ್ಸ್ ನ ಸಿಇಒ ಹಾಗೂ ಸಹ-ಮಾಲೀಕರಾದ ಪ್ರಚುರಾ ಪಿ.ಪಿ. ಮಾತನಾಡಿ, “ಗೆರಾರ್ಡ್ ಪಿಕೆ ಅವರು ಫೈಯರ್ಸ್ ಅಮೆರಿಕನ್ ಗ್ಯಾಂಬಿಟ್ಸ್ ನಲ್ಲಿ ಹೂಡಿಕೆ ಮಾಡಿರುವುದು ನಮ್ಮ ಫ್ರಾಂಚೈಸಿಗೆ ಮಾತ್ರವಲ್ಲದೆ, ಜಾಗತಿಕ ಕ್ರೀಡೆಯಾಗಿ ಚೆಸ್ ಬೆಳೆಯುತ್ತಿರುವುದಕ್ಕೂ ಮಹತ್ವದ ಕ್ಷಣವಾಗಿದೆ. ಜಾಗತಿಕ ಕ್ರೀಡಾ ಆಸ್ತಿಯನ್ನು ನಿರ್ಮಿಸುವುದು ಹೇಗೆ ಎಂಬುದನ್ನು ಗೆರಾರ್ಡ್ ಚೆನ್ನಾಗಿ ಅರ್ಥಮಾಡಿಕೊಂಡಿದ್ದಾರೆ. ಉನ್ನತ ಮಟ್ಟದ ಸ್ಪರ್ಧೆಯೊಂದಿಗೆ ಆಕರ್ಷಕ ಕಥನ, ಅಭಿಮಾನಿಗಳ ಸಮುದಾಯ ಮತ್ತು ಪ್ರೇಕ್ಷಕರೊಂದಿಗೆ ಬಲವಾದ ಸಂಪರ್ಕವನ್ನು ಬೆಳೆಸುವ ಅವರ ಅನುಭವ ನಮ್ಮ ದೃಷ್ಟಿಕೋನಕ್ಕೆ ಮಹತ್ವದ ಬೆಂಬಲವಾಗಿದೆ,” ಎಂದು ತಿಳಿಸಿದರು.

ಇದರ ಜತೆಗೆ ಅವರು, “ಚೆಸ್ ಇಂದು ಮಹತ್ವದ ಪರಿವರ್ತನೆಯ ಹಂತದಲ್ಲಿದೆ. ಅಸಾಧಾರಣ ಪ್ರತಿಭೆಗಳು, ವೇಗವಾಗಿ ಬೆಳೆಯುತ್ತಿರುವ ಪ್ರೇಕ್ಷಕ ಬಳಗ ಮತ್ತು ಜಾಗತಿಕ ಕ್ರೀಡೆಯಾಗಲು ಅಗತ್ಯವಿರುವ ಎಲ್ಲಾ ಅಂಶಗಳು ಚೆಸ್‌ನಲ್ಲಿವೆ. ಫೈಯರ್ಸ್ ಅಮೆರಿಕನ್ ಗ್ಯಾಂಬಿಟ್ಸ್ ಈ ಪರಿವರ್ತನೆಯ ಕೇಂದ್ರಬಿಂದುವಾಗಲು ಬಯಸುತ್ತದೆ. ಅತ್ಯುತ್ತಮ ಆಟಗಾರರು, ಮಹತ್ವಾಕಾಂಕ್ಷೆಯ ಪಾಲುದಾರರು ಮತ್ತು ಹೊಸ ಪೀಳಿಗೆಯ ಅಭಿಮಾನಿಗಳನ್ನು ಒಂದೇ ವೇದಿಕೆಗೆ ತರುವ ಗುರಿ ನಮ್ಮದು. ಗೆರಾರ್ಡ್ ಅವರ ಸೇರ್ಪಡೆ ನಮ್ಮ ದೃಷ್ಟಿಕೋನಕ್ಕೆ ದೊರೆತ ಬಲವಾದ ಮಾನ್ಯತೆಯಾಗಿದೆ,” ಎಂದು ಹೇಳಿದರು.

ಫೈಯರ್ಸ್ ನ ಸಹ-ಸಂಸ್ಥಾಪಕ ಹಾಗೂ ಮುಖ್ಯ ಉತ್ಪನ್ನ ಅಧಿಕಾರಿ ಯಶಸ್ ಖೋಡೆ ಮಾತನಾಡಿ, “ಫುಟ್‌ಬಾಲ್ ಜಾಗತಿಕ ಕ್ರೀಡೆಯಾಗಿ ಬೆಳೆದದ್ದು ಎಲ್ಲೆಡೆ ಇರುವ ಅಭಿಮಾನಿಗಳೊಂದಿಗೆ ಸಂಪರ್ಕ ಸಾಧಿಸುವ ಹೊಸ ಮಾರ್ಗಗಳನ್ನು ಕಂಡುಕೊಂಡ ಕಾರಣ. ಚೆಸ್‌ಗೂ ಅದೇ ಸಾಮರ್ಥ್ಯವಿದೆ ಎಂದು ನಾವು ನಂಬುತ್ತೇವೆ. ಫುಟ್‌ಬಾಲ್‌ನ ಆ ಜಾಗತಿಕ ಪಯಣವನ್ನು ಸ್ವತಃ ಅನುಭವಿಸಿರುವ ಗೆರಾರ್ಡ್ ನಮ್ಮೊಂದಿಗೆ ಕೈಜೋಡಿಸಿರುವುದು ಈ ಗುರಿಯನ್ನು ಮತ್ತಷ್ಟು ವಾಸ್ತವಿಕವಾಗಿಸಿದೆ. ಚೆಸ್ ಯಾವ ಮಟ್ಟಿಗೆ ಬೆಳೆಯಬಹುದು ಎಂಬುದರ ಇದು ಕೇವಲ ಆರಂಭ,” ಎಂದರು.

ಗೆರಾರ್ಡ್ ಪಿಕೆ ಮಾತನಾಡಿ, “ನನ್ನ ವೃತ್ತಿಜೀವನದುದ್ದಕ್ಕೂ ಕ್ರೀಡೆ ಅಭಿಮಾನಿಗಳೊಂದಿಗೆ ಹೇಗೆ ಹೊಸ ರೀತಿಯಲ್ಲಿ ಸಂಪರ್ಕ ಸಾಧಿಸಬಹುದು ಎಂಬುದನ್ನು ಮರುಚಿಂತನೆ ಮಾಡುವ ಯೋಜನೆಗಳಲ್ಲಿ ನಾನು ಆಸಕ್ತಿ ಹೊಂದಿದ್ದೇನೆ. ಚೆಸ್‌ನ ಆಳ, ಜಾಗತಿಕ ಆಕರ್ಷಣೆ ಮತ್ತು ಅದಕ್ಕೆ ಅಗತ್ಯವಿರುವ ಅದ್ಭುತ ಮಾನಸಿಕ ಸಾಮರ್ಥ್ಯ ನನ್ನನ್ನು ಬಹುಕಾಲದಿಂದ ಆಕರ್ಷಿಸಿದೆ. ಫೈಯರ್ಸ್ ಅಮೆರಿಕನ್ ಗ್ಯಾಂಬಿಟ್ಸ್ ನ ಮಹತ್ವಾಕಾಂಕ್ಷೆ ಮತ್ತು ಚೆಸ್‌ಗಾಗಿ ಹೊಂದಿರುವ ದೀರ್ಘಕಾಲಿಕ ದೃಷ್ಟಿಕೋನ ನನ್ನನ್ನು ವಿಶೇಷವಾಗಿ ಸೆಳೆದಿದೆ. ಕಾರ್ಯತಂತ್ರದ ಷೇರುದಾರನಾಗಿ ತಂಡವನ್ನು ಸೇರಲು ಸಂತೋಷವಾಗುತ್ತಿದೆ. ಮುಂಬರುವ ಋತುವಿನಲ್ಲಿ ತಂಡಕ್ಕೆ ಯಶಸ್ಸು ಸಿಗಲಿ ಎಂದು ಹಾರೈಸುತ್ತೇನೆ,” ಎಂದು ಹೇಳಿದರು.

ಹೊಸ ಪೀಳಿಗೆಯ ಆಟಗಾರರ ಉದಯ, ಡಿಜಿಟಲ್ ವೇದಿಕೆಗಳ ವಿಸ್ತರಣೆ ಹಾಗೂ ನವೀನ ಸ್ಪರ್ಧಾ ಮಾದರಿಗಳಿಂದ ಚೆಸ್ ಕ್ರೀಡೆ ವಿಶ್ವದಾದ್ಯಂತ ಅಭೂತಪೂರ್ವ ವೇಗದಲ್ಲಿ ಬೆಳೆಯುತ್ತಿರುವ ಸಂದರ್ಭದಲ್ಲಿ ಈ ಘೋಷಣೆ ಹೊರಬಿದ್ದಿದೆ. ತಂಡ ಆಧಾರಿತ ಫ್ರಾಂಚೈಸಿ ಮಾದರಿಯ ಮೂಲಕ ವಿಶ್ವದ ಅಗ್ರ ಆಟಗಾರರನ್ನು ಒಂದೇ ವೇದಿಕೆಗೆ ತಂದು, ಅಭಿಮಾನಿಗಳಿಗೆ ಚೆಸ್ ಅನುಭವಿಸುವ ಹೊಸ ಮಾರ್ಗಗಳನ್ನು ಒದಗಿಸುವಲ್ಲಿ ಜಾಗತಿಕ ಚೆಸ್ ಲೀಗ್ ಪ್ರಮುಖ ಪಾತ್ರ ವಹಿಸುತ್ತಿದೆ.

ವಿಶ್ವಮಟ್ಟದ ಆಟಗಾರರು, ಅನುಭವಿ ನಾಯಕತ್ವ ಮತ್ತು ದೀರ್ಘಕಾಲಿಕ ಕಾರ್ಯತಂತ್ರದ ಬೆಂಬಲವನ್ನು ಒಟ್ಟುಗೂಡಿಸಿರುವ ಫೈಯರ್ಸ್ ಅಮೆರಿಕನ್ ಗ್ಯಾಂಬಿಟ್ಸ್, ಚೆಸ್‌ನ ಹೆಚ್ಚುತ್ತಿರುವ ಅಂತಾರಾಷ್ಟ್ರೀಯ ಪ್ರಭಾವಕ್ಕೆ ಪ್ರತೀಕವಾಗಿದೆ. ಚೆಸ್ ಜಾಗತಿಕ ಕ್ರೀಡೆ ಮತ್ತು ಮನರಂಜನಾ ಕ್ಷೇತ್ರದ ಪ್ರಮುಖ ಆಸ್ತಿಯಾಗಿ ರೂಪುಗೊಳ್ಳುತ್ತಿರುವ ಸಂದರ್ಭದಲ್ಲಿ, ತಂಡವು ಈ ಪರಿವರ್ತನೆಯ ಭಾಗವಾಗಲು ಸಜ್ಜಾಗಿದೆ.