ನಾನೇ ಮೊದಲು... 2 ಟಿ20 ಸರಣಿ ಸೋಲಿನ ಬಗ್ಗೆ ನಾಯಕ ಶ್ರೇಯಸ್​ ಅಯ್ಯರ್​ ಆಡಿದ ಮಾತಿಗೆ ತಲೆಬಾಗಿದ ಕ್ರೀಡಾ ಜಗತ್ತು! Shreyas Iyer

Shreyas Iyer : ಇಂಗ್ಲೆಂಡ್ ಪ್ರವಾಸದಲ್ಲಿರುವ ಭಾರತದ ಯುವ ಟಿ20 ಕ್ರಿಕೆಟ್ ತಂಡಕ್ಕೆ ಚೇತರಿಸಿಕೊಳ್ಳಲಾಗದಂತಹ ಭಾರಿ ಆಘಾತ ಎದುರಾಗಿದೆ. ಆತಿಥೇಯ ಇಂಗ್ಲೆಂಡ್ ವಿರುದ್ಧದ ಐದನೇ ಹಾಗೂ ಅಂತಿಮ ಟಿ20 ಪಂದ್ಯದಲ್ಲಿ ಭೀಕರ ಸೋಲನ್ನು ಅನುಭವಿಸುವ ಮೂಲಕ ಟೀಮ್ ಇಂಡಿಯಾ ತೀವ್ರ ನಿರಾಶೆ ಮೂಡಿಸಿದೆ.

ಇಂಗ್ಲೆಂಡ್ ಬ್ಯಾಟರ್‌ಗಳ ರನ್ ಮಳೆಗೆ ಅಕ್ಷರಶಃ ಕೊಚ್ಚಿಹೋದ ಭಾರತೀಯ ಪಡೆ, ಕಳಪೆ ಬೌಲಿಂಗ್ ಹಾಗೂ ಫೀಲ್ಡಿಂಗ್ ವೈಫಲ್ಯದಿಂದಾಗಿ ಭಾರಿ ಬೆಲೆ ತೆತ್ತಿದೆ. ಈ ಸೋಲಿನೊಂದಿಗೆ ಭಾರತ ಐದು ಪಂದ್ಯಗಳ ಸರಣಿಯನ್ನು 0-4 ಅಂತರದಿಂದ ಕ್ಲೀನ್ ಸ್ವೀಪ್ ಎದುರಿಸಿದ್ದಲ್ಲದೆ, ಐಸಿಸಿ ಟಿ20 ಶ್ರೇಯಾಂಕದಲ್ಲಿ ಅಗ್ರಸ್ಥಾನವನ್ನು ಇಂಗ್ಲೆಂಡ್‌ಗೆ ಬಿಟ್ಟುಕೊಟ್ಟು ದ್ವಿತೀಯ ಸ್ಥಾನಕ್ಕೆ ಕುಸಿದಿದೆ.

ಐದನೇ ಪಂದ್ಯದಲ್ಲಿ ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ಮಾಡಿದ ಇಂಗ್ಲೆಂಡ್ ತಂಡ ಭಾರತದ ಬೌಲರ್‌ಗಳನ್ನು ಮನಬಂದಂತೆ ದಂಡಿಸಿ 257 ರನ್‌ಗಳ ಬೃಹತ್ ಗುರಿಯನ್ನು ನೀಡಿತು. ಇಷ್ಟೊಂದು ಬೃಹತ್ ಮೊತ್ತವನ್ನು ಬೆನ್ನಟ್ಟಿದ ಭಾರತ ತಂಡಕ್ಕೆ ಆರಂಭದಲ್ಲೇ ಆಘಾತ ಎದುರಾಯಿತು. ಆದಾಗ್ಯೂ, ಇಶಾನ್ ಕಿಶನ್ ಮತ್ತು ತಿಲಕ್ ವರ್ಮಾ ಅರ್ಧಶತಕಗಳ ಸಿಡಿಸಿ ಏಕಾಂಗಿ ಹೋರಾಟ ನಡೆಸಿದರು. ಆದರೆ, ಉಳಿದ ಬ್ಯಾಟರ್‌ಗಳಿಂದ ಸೂಕ್ತ ಬೆಂಬಲ ಸಿಗದ ಕಾರಣ ಭಾರತ ನಿಗದಿತ 20 ಓವರ್‌ಗಳಲ್ಲಿ 8 ವಿಕೆಟ್ ನಷ್ಟಕ್ಕೆ 201 ರನ್ ಗಳಿಸಲಷ್ಟೇ ಶಕ್ತವಾಯಿತು. ಇದರೊಂದಿಗೆ ಭಾರತ 56 ರನ್‌ಗಳ ಅಂತರದ ಹೀನಾಯ ಸೋಲನ್ನು ಒಪ್ಪಿಕೊಂಡಿತು.

ಸರಣಿಯುದ್ದಕ್ಕೂ ಎದುರಾದ ಸಾಲು ಸಾಲು ಸೋಲುಗಳಿಂದ ಕಂಗೆಟ್ಟಿರುವ ಭಾರತ ತಂಡದ ನಾಯಕ ಶ್ರೇಯಸ್ ಅಯ್ಯರ್ ಪಂದ್ಯದ ಬಳಿಕ ಸುದ್ದಿಗೋಷ್ಠಿಯಲ್ಲಿ ತೀವ್ರ ನಿರಾಶೆ ಮತ್ತು ಹತಾಶೆ ವ್ಯಕ್ತಪಡಿಸಿದ್ದಾರೆ. ಒಂದರೆ ಹಿಂದೆ ಒಂದಂತೆ ಎರಡು ಸರಣಿಗಳಲ್ಲಿ ಒಂದೂ ಪಂದ್ಯವನ್ನು ಗೆಲ್ಲದ ಮೊದಲ ಭಾರತೀಯ ನಾಯಕ ನಾನೇ ಇರಬಹುದು ಎಂದು ಓಪನ್​ ಆಗಿ ಹೇಳಿಕೊಂಡರು. ಈ ಮೂಲಕ ಯಾರನ್ನೂ ದೂಷಿಸದೇ ಸೋಲಿನ ಹೊಣೆ ಹೊತ್ತುಕೊಂಡರು. ಹೀಗಾಗಿ ಅಯ್ಯರ್​ ಅವರ ಈ ಮಾತಿಗೆ ಕ್ರೀಡಾಜಗತ್ತು ತಲೆಬಾಗಿದೆ.

ಇನ್ನು ಇಂಗ್ಲೆಂಡ್‌ನ ಹವಾಮಾನ ಪರಿಸ್ಥಿತಿಗಳಿಗೆ ನಮ್ಮ ಆಟಗಾರರು ಬೇಗ ಹೊಂದಿಕೊಳ್ಳದೇ ಇರುವುದೇ ಈ ಸರಣಿ ಸೋಲಿಗೆ ಪ್ರಮುಖ ಕಾರಣ. ಈ ಪ್ರವಾಸದಿಂದ ನಾವು ಕಲಿಯಬೇಕಾದದ್ದು ಸಾಕಷ್ಟಿದೆ ಎಂದು ಅಯ್ಯರ್ ಬೇಸರದಿಂದ ನುಡಿದರು.

ಬೌಲರ್‌ಗಳ ಕಳಪೆ ಪ್ರದರ್ಶನ ಹಾಗೂ ಪಿಚ್ ಪರಿಸ್ಥಿತಿಯ ಬಗ್ಗೆ ಮುಕ್ತವಾಗಿ ಮಾತನಾಡಿದ ಅಯ್ಯರ್, ಬ್ಯಾಟಿಂಗ್‌ಗೆ ಸಂಪೂರ್ಣ ನೆರವಾಗುವ ಇಂತಹ ಪಿಚ್‌ಗಳಲ್ಲಿ ಎದುರಾಳಿ ಬ್ಯಾಟರ್‌ಗಳು ನೀಡುವ ಕ್ಯಾಚ್‌ಗಳನ್ನು ಯಾವುದೇ ಕಾರಣಕ್ಕೂ ಕೈಚೆಲ್ಲಬಾರದು, ಆದರೆ ನಾವು ಕ್ಯಾಚ್‌ಗಳನ್ನು ಕೈಬಿಟ್ಟಿದ್ದರಿಂದ ಅವರು ಬೃಹತ್ ಸ್ಕೋರ್ ಪೇರಿಸಲು ಸಾಧ್ಯವಾಯಿತು. ಕಳೆದ ಎರಡು ಪಂದ್ಯಗಳಲ್ಲಿ ನಮ್ಮ ಬೌಲಿಂಗ್ ವೈಫಲ್ಯ 100 ಪ್ರತಿಶತ ಎದ್ದು ಕಾಣುತ್ತಿತ್ತು. ಪಂದ್ಯವೊಂದರಲ್ಲಿ ನಾವು ಪ್ರತಿ ಎಸೆತಕ್ಕೆ ಸರಾಸರಿ ಮೂರು ರನ್‌ಗಳಂತೆ ಬಿಟ್ಟುಕೊಟ್ಟರೆ, ಪಂದ್ಯದ ಫಲಿತಾಂಶ ಏನಾಗಬಹುದು ಎಂದು ಪ್ರತ್ಯೇಕವಾಗಿ ಹೇಳುವ ಅಗತ್ಯವಿಲ್ಲ ಎಂದರು.

ಈ ಹೀನಾಯ ಸೋಲುಗಳಿಂದ ಸೂಕ್ತ ಪಾಠ ಕಲಿತು, ಮುಂದಿನ ದಿನಗಳಲ್ಲಿ ತಪ್ಪುಗಳನ್ನು ತಿದ್ದಿಕೊಳ್ಳಲಿದ್ದೇವೆ. ಮುಂಬರುವ ಸರಣಿಗಳಲ್ಲಿ ಬಲಿಷ್ಠ ತಂತ್ರಗಾರಿಕೆಯೊಂದಿಗೆ ಅತ್ಯಂತ ಪ್ರಬಲವಾಗಿ ಮೈದಾನಕ್ಕಿಳಿಯಲಿದ್ದೇವೆ ಎಂದು ಶ್ರೇಯಸ್ ಅಯ್ಯರ್ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ, (ಏಜೆನ್ಸೀಸ್​).