ಬರೋಬ್ಬರಿ 1050 ದಿನಗಳ ಬಳಿಕ ಭಾರತಕ್ಕೆ ಸರಣಿ ಸೋಲು: 16 ಟಿ20 ಸರಣಿಗಳ ಅಜೇಯ ಓಟಕ್ಕೆ ಐರ್ಲೆಂಡ್ ಬ್ರೇಕ್! Team India

Team India : ಮೂರು ಬಾರಿಯ ಟಿ20 ವಿಶ್ವಕಪ್​ ಚಾಂಪಿಯನ್​ ಆಗಿ ವಿಶ್ವ ಕ್ರಿಕೆಟ್​ನಲ್ಲೇ ಬಲಿಷ್ಠ ತಂಡವೆಂಬ ಹೆಗ್ಗಳಿಕೆ ಹೊಂದಿರುವ ಟೀಮ್​ ಇಂಡಿಯಾಗೆ ಕ್ರಿಕೆಟ್​ ಶಿಶು ಐರ್ಲೆಂಡ್​ ತಂಡ ಬಿಗ್​ ಶಾಕ್​ ನೀಡಿದೆ. ಬೆಲ್‌ಫಾಸ್ಟ್‌ನಲ್ಲಿ ಭಾನುವಾರ (ಜೂನ್​ 28) ನಡೆದ ಎರಡನೇ ಟಿ20 ಪಂದ್ಯದಲ್ಲಿ ಕೇವಲ 1 ರನ್ ಅಂತರದಿಂದ ರೋಚಕ ಜಯ ಸಾಧಿಸುವ ಮೂಲಕ 2 ಪಂದ್ಯಗಳ ಸರಣಿಯನ್ನು 2-0 ಯಿಂದ ಮುಡಿಗೇರಿಸಿಕೊಂಡಿದೆ. ಈ ಐತಿಹಾಸಿಕ ಗೆಲುವಿನೊಂದಿಗೆ ಯಾವುದೇ ಕ್ರಿಕೆಟ್ ಮಾದರಿಯಲ್ಲಿ ಭಾರತದ ವಿರುದ್ಧ ಮೊದಲ ಬಾರಿಗೆ ಸರಣಿ ಗೆದ್ದ ದಾಖಲೆ ಬರೆದ ಐರ್ಲೆಂಡ್, ಟೀಮ್ ಇಂಡಿಯಾದ ಸತತ 16 ಟಿ20 ಸರಣಿಗಳ ಭರ್ಜರಿ ಅಜೇಯ ಓಟಕ್ಕೆ ಬ್ರೇಕ್ ಹಾಕಿದೆ.

ಈ ಪಂದ್ಯದಲ್ಲಿ ಮೊದಲು ಬ್ಯಾಟ್ ಮಾಡಿದ ಐರ್ಲೆಂಡ್, ಹ್ಯಾರಿ ಟೆಕ್ಟರ್ (53 ರನ್) ಅವರ ಅರ್ಧಶತಕದ ನೆರವಿನಿಂದ 8 ವಿಕೆಟ್‌ಗೆ 154 ರನ್ ಕಲೆಹಾಕಿತು, ಆದರೆ ಈ ಸಾಧಾರಣ ಗುರಿಯನ್ನು ಬೆನ್ನಟ್ಟಿದ ಭಾರತ, ತಿಲಕ್ ವರ್ಮಾ (55 ರನ್) ಅವರ ಹೋರಾಟದ ಹೊರತಾಗಿಯೂ, ಭಾರತೀಯ ಮೂಲದ ಜೈ ಮುದ್ರಾ (3/32) ಮತ್ತು ಹಲ್ಲಾರ್ಡ್ (3/26) ಅವರ ಮಾರಕ ಬೌಲಿಂಗ್ ದಾಳಿಗೆ ಸಿಲುಕಿ 9 ವಿಕೆಟ್ ನಷ್ಟಕ್ಕೆ 153 ರನ್ ಗಳಿಸಲಷ್ಟೇ ಶಕ್ತವಾಗಿ ಭಾರಿ ನಿರಾಶೆ ಮೂಡಿಸಿತು.

ವಿಶ್ವ ಚಾಂಪಿಯನ್ ಭಾರತ ತಂಡ ಬರೋಬ್ಬರಿ 1050 ದಿನಗಳ ನಂತರ ಟಿ20 ಅಂತಾರಾಷ್ಟ್ರೀಯ ದ್ವಿಪಕ್ಷೀಯ ಸರಣಿಯೊಂದರಲ್ಲಿ ಸೋಲಿನ ಮುಖಭಂಗ ಅನುಭವಿಸಿದೆ. ಕೊನೆಯದಾಗಿ ಆಗಸ್ಟ್ 2023 ರಲ್ಲಿ ವೆಸ್ಟ್ ಇಂಡೀಸ್ ವಿರುದ್ಧ ಟಿ20 ಸರಣಿ ಸೋತಿದ್ದ ಭಾರತ, ಅಂದಿನಿಂದ ಸತತವಾಗಿ ಸರಣಿಗಳನ್ನು ಗೆಲ್ಲುತ್ತಾ ಭರ್ಜರಿ ಫಾರ್ಮ್‌ನಲ್ಲಿತ್ತು. ಆದರೆ, ಇದೀಗ ಯುವ ಐರ್ಲೆಂಡ್ ತಂಡವು ತನ್ನ ಅದ್ಭುತ ಆಟದ ಮೂಲಕ ಟೀಮ್ ಇಂಡಿಯಾಕ್ಕೆ ಭಾರಿ ಶಾಕ್ ನೀಡಿದ್ದು, ಭಾರತದ ಸತತ 16 ಟಿ20 ಸರಣಿಗಳ ಐತಿಹಾಸಿಕ ಅಜೇಯ ಓಟಕ್ಕೆ ಬ್ರೇಕ್ ಹಾಕಿದೆ. ಪೂರ್ಣ ಪ್ರಮಾಣದ ಐಸಿಸಿ ಸದಸ್ಯ ರಾಷ್ಟ್ರಗಳ ಪೈಕಿ 2016-2018ರ ಅವಧಿಯಲ್ಲಿ ಸತತ 11 ಸರಣಿಗಳನ್ನು ಗೆದ್ದು ಪಾಕಿಸ್ತಾನ ನಿರ್ಮಿಸಿದ್ದ ದಾಖಲೆಯನ್ನು ಹಿಂದಿಕ್ಕಿ ಮುನ್ನುಗ್ಗುತ್ತಿದ್ದ ಭಾರತದ ಈ ದಿಗ್ವಿಜಯದ ಸರಣಿ ಓಟಕ್ಕೆ ಕೊನೆಗೂ ಐರ್ಲೆಂಡ್ ಬ್ರೇಕ್​ ಹಾಕಿದೆ.

ಪಂದ್ಯದ ಮುಕ್ತಾಯದ ನಂತರ ಭಾರತ ತಂಡದ ಸೋಲನ್ನು ಪ್ರಾಮಾಣಿಕವಾಗಿ ಒಪ್ಪಿಕೊಂಡ ನಾಯಕ ಶ್ರೇಯಸ್ ಅಯ್ಯರ್, ಈ ಸರಣಿ ಸೋಲು ನಮಗೆ ತೀವ್ರ ನಿರಾಶೆ ಮೂಡಿಸಿದೆ, ನಾವು ಅತ್ಯಂತ ಕಳಪೆ ಪ್ರದರ್ಶನ ನೀಡಿದೆವು ಮತ್ತು ನಮ್ಮ ಬ್ಯಾಟಿಂಗ್ ವೈಫಲ್ಯವೇ ಈ ಸೋಲಿಗೆ ಪ್ರಮುಖ ಕಾರಣ ಎಂದು ಬೇಸರ ವ್ಯಕ್ತಪಡಿಸಿದರು. ಇದೇ ವೇಳೆ ಎದುರಾಳಿ ತಂಡವನ್ನು ಮುಕ್ತ ಕಂಠದಿಂದ ಶ್ಲಾಘಿಸಿದ ಅವರು, ಐರ್ಲೆಂಡ್ ತಂಡವು ಅದ್ಭುತವಾಗಿ ಆಡಿತು, ಇಲ್ಲಿನ ಪಿಚ್‌ನಲ್ಲಿ ಹೇಗೆ ಆಡಬೇಕೆಂಬ ಸ್ಪಷ್ಟ ಅರಿವು ಅವರಿಗಿತ್ತು. ಅವರ ಫೀಲ್ಡಿಂಗ್ ಹಾಗೂ ಬೌಲರ್‌ಗಳು ತಮ್ಮ ಯೋಜನೆಗಳನ್ನು ಮೈದಾನದಲ್ಲಿ ನಿಖರವಾಗಿ ಕಾರ್ಯಗತಗೊಳಿಸಿದ ರೀತಿ ಅಪ್ರತಿಮವಾಗಿತ್ತು, ಅವರು ಎಲ್ಲಾ ವಿಭಾಗಗಳಲ್ಲೂ ನಮಗಿಂತ ಮೇಲುಗೈ ಸಾಧಿಸಿದರು ಎಂದು ತಿಳಿಸಿದರು.

ಭಾರತದ ವಿರುದ್ಧದ ಐತಿಹಾಸಿಕ ಸರಣಿ ಗೆಲುವಿನ ನಂತರ ಐರ್ಲೆಂಡ್ ತಂಡದ ನಾಯಕ ಲೋರ್ಕನ್ ಟಕರ್ ಅವರು ಅಪಾರ ಸಂತೋಷವನ್ನು ವ್ಯಕ್ತಪಡಿಸುತ್ತಾ, ನನಗೆ ಇನ್ನೂ ಈ ಅದ್ಭುತ ಗೆಲುವನ್ನು ನಂಬಲು ಸಾಧ್ಯವಾಗುತ್ತಿಲ್ಲ, ಮೊದಲ ಪಂದ್ಯದ ಜಯ ಕೇವಲ ಕಾಕತಾಳೀಯವಲ್ಲ ಎಂಬುದನ್ನು ಜಗತ್ತಿಗೆ ತೋರಿಸಿಕೊಡಿ ಎಂದು ನಾನು ಆಟಗಾರರಿಗೆ ಹೇಳಿದ್ದೆ, ಅದಕ್ಕೆ ಅವರು ಸಿದ್ಧರಾಗಿ ಮೈದಾನಕ್ಕಿಳಿದರು. ಕ್ರಿಕೆಟ್ ಅನ್ನು ಸರಳವಾಗಿ ಆಡಿದರೆ ಮಾತ್ರ ಯಶಸ್ಸು ಸಿಗುತ್ತದೆ ಎಂಬುದನ್ನು ನಾವು ಸಾಬೀತುಪಡಿಸಿದ್ದೇವೆ ಎಂದು ಹೆಮ್ಮೆಯಿಂದ ಹೇಳಿದರು. ಮುಂದುವರಿದು ಮಾತನಾಡಿದ ಅವರು, ನಮ್ಮ ತಂಡದಲ್ಲಿ ಅಂತಾರಾಷ್ಟ್ರೀಯ ಮಟ್ಟದ ಅನುಭವ ಕಡಿಮೆ ಇರುವ ಹಲವು ಆಟಗಾರರಿದ್ದರೂ, ಅವರು ಮೈದಾನದಲ್ಲಿ ತೋರಿದ ಧೈರ್ಯ ಅಪ್ರತಿಮವಾಗಿತ್ತು. ಭಾರತದಂತಹ ಬಲಿಷ್ಠ ತಂಡದ ವಿರುದ್ಧ ಇಂತಹ ಸರಣಿಯನ್ನು ಆಡುವ ಅವಕಾಶ ಸಿಕ್ಕಿದ್ದು ನಮ್ಮ ಅದೃಷ್ಟ ಮತ್ತು ಪ್ರಸ್ತುತ ಐರ್ಲೆಂಡ್‌ನ ವೃತ್ತಿಪರ ಕ್ರಿಕೆಟರ್ ಆಗಿರುವುದಕ್ಕೆ ನನಗೆ ಹೆಮ್ಮೆ ಎನಿಸುತ್ತಿದೆ ಎಂದು ಭಾವನಾತ್ಮಕವಾಗಿ ನುಡಿದರು, (ಏಜೆನ್ಸೀಸ್​).