Shoaib Akhtar: ಪಾಕಿಸ್ತಾನ ಕ್ರಿಕೆಟ್ನಲ್ಲಿ ಯಾವುದೂ ಸರಿಯಲ್ಲ ಎನ್ನಲು ಇತ್ತೀಚಿನ ಬೆಳವಣಿಗೆಗಳೇ ಜ್ವಲಂತ ಸಾಕ್ಷಿ. ಇತ್ತೀಚೆಗಷ್ಟೇ ಮುಕ್ತಾಯಗೊಂಡ ಏಷ್ಯನ್ ಗೇಮ್ಸ್ನಲ್ಲಿ, ಟೀಮ್ ಇಂಡಿಯಾ ವಿರುದ್ಧ ಚಿನ್ನದ ಪದಕ ಗೆಲ್ಲಲು ಮುಗ್ಗರಿಸಿದ್ದು ಸದ್ಯ ಭಾರಿ ಟೀಕೆ, ಮುಖಭಂಗಕ್ಕೆ ಗುರಿಯಾಗಿದೆ. ಈ ಮಧ್ಯೆ, ತಮ್ಮದೇ ಕ್ರಿಕೆಟ್ ಮಂಡಳಿಯಿಂದ ಬಂದ ಬಿಗ್ ಆಫರ್ ಎಂಬ ವದಂತಿಯನ್ನು ತಳ್ಳಿಹಾಕಿದ ಮಾಜಿ ಹಿರಿಯ ಕ್ರಿಕೆಟಿಗ ಶೋಯೆಬ್ ಅಖ್ತರ್, ಅಕಸ್ಮಾತ್ ಸಿಕ್ಕರೂ ಅದನ್ನು ರಿಜೆಕ್ಟ್ ಮಾಡುವುದಾಗಿ ಹೇಳಿದ್ದಾರೆ.
ಏಷ್ಯನ್ ಗೇಮ್ಸ್ನಲ್ಲಿ ಸಿಗಲಿಲ್ಲ ಚಿನ್ನ
ಪುರುಷ, ಮಹಿಳಾ ತಂಡಗಳು ಉತ್ತಮ ಪ್ರದರ್ಶನ ನೀಡಿ, ಗೆಲುವು ಸಾಧಿಸುವಲ್ಲಿ ಸಂಪೂರ್ಣವಾಗಿ ಎಡವುತ್ತಿದ್ದು, ಮಂಡಳಿಯು ಮಹತ್ವದ ಬದಲಾವಣೆಗಳನ್ನು ಜಾರಿಗೆ ತರುವ ನಿಟ್ಟಿನಲ್ಲಿ ಹೊಸ ಮುಖ್ಯ ಆಯ್ಕೆಗಾರರನ್ನಾಗಿ ಶೋಯೆಬ್ ಅಖ್ತರ್ರನ್ನು ನೇಮಕ ಮಾಡಿಕೊಳ್ಳಲು ಆಫರ್ ನೀಡಿತು. ಆದರೆ, ಈ ಅವಕಾಶವನ್ನು ಇದೀಗ ಶೋಯೆಬ್ ತಿರಸ್ಕರಿಸಿದ್ದಾರೆ ಎಂದು ಪಾಕ್ ಮೂಲದ ಕ್ರಿಕೆಟ್ ವರದಿಗಳು ತಿಳಿಸಿವೆ. ಈ ವಿಷಯಗಳು ಭಾರಿ ಚರ್ಚೆಗೆ ಗ್ರಾಸವಾಗುತ್ತಿದ್ದಂತೆ, ಸ್ವತಃ ಅಖ್ತರ್ ಸ್ಪಷ್ಟನೆ ನೀಡಿದ್ದಾರೆ.
ಪಾಕ್ ತಂಡಗಳಿಂದ ಕಳಪೆ ಪ್ರದರ್ಶನ
"ಇದರಲ್ಲಿ ಯಾವುದೇ ಸತ್ಯವಿಲ್ಲ. ಚರ್ಚೆ ಆಗುತ್ತಿರುವ ವಿಷಯಗಳೆಲ್ಲವೂ ಕೇವಲ ಊಹೆಗಳಷ್ಟೇ. ಪಾಕಿಸ್ತಾನದ ರಾಜಕೀಯ ಮತ್ತು ಪಿಸಿಬಿಯಿಂದ ದೂರವಿರುವಂತೆ ನನ್ನ ತಾಯಿ ನನಗೆ ಎಚ್ಚರಿಸಿದ್ದಾರೆ. ಹೀಗಿರುವಾಗ, ಅವರ ಸಲಹೆ, ಮಾತುಗಳನ್ನು ಪಾಲಿಸಲಷ್ಟೇ ನಾನು ಬದ್ಧ. ಪಾಕಿಸ್ತಾನ ಕ್ರಿಕೆಟ್ಗೆ ಕೊಡುಗೆ ನೀಡುವುದು ನನಗೂ ಇಷ್ಟವೇ. ಹಾಗಂತ, ಅದಕ್ಕೆ ಮುಖ್ಯ ಆಯ್ಕೆಗಾರ ಹುದ್ದೆಯನ್ನೇ ಮಾಡಬೇಕು ಅಂತೇನಿಲ್ಲ ಎಂದು ಅಖ್ತರ್ 'ಪಿಟಿವಿ ಸ್ಪೋರ್ಟ್ಸ್' ಸಂದರ್ಶನದಲ್ಲಿ ಹೇಳಿದ್ದಾರೆ.
