ಕ್ಷಮೆ ಇರಲಿ ಆ ದಿನ ನಾನು ರೋಹಿತ್​ ಶರ್ಮರನ್ನು ನಂಬಲಿಲ್ಲ...ಅಚ್ಚರಿ ಹೇಳಿಕೆ ನೀಡಿದ ಸಂಜು ಸ್ಯಾಮ್ಸನ್! Sanju Samson

Sanju Samson : ಟಿ20 ವಿಶ್ವಕಪ್‌ನ ಆರಂಭಿಕ ಪಂದ್ಯಗಳಲ್ಲಿ ಪ್ಲೇಯಿಂಗ್‌ ಇಲೆವೆನ್‌ನಿಂದ ಹೊರಗುಳಿದಾಗ ರೋಹಿತ್ ಶರ್ಮ ನೀಡಿದ್ದ ಭರವಸೆಯನ್ನು ತಕ್ಷಣಕ್ಕೆ ನಂಬಲು ಸಾಧ್ಯವಾಗಿರಲಿಲ್ಲ ಎಂದು ಭಾರತದ ಸ್ಟಾರ್ ಕ್ರಿಕೆಟಿಗ ಸಂಜು ಸ್ಯಾಮ್ಸನ್ ಮುಕ್ತವಾಗಿ ಹಂಚಿಕೊಂಡಿದ್ದಾರೆ. ಆರಂಭದಲ್ಲಿ ಅನುಮಾನಗಳಿದ್ದರೂ, ಅವರ ಮಾತುಗಳೇ ನಂತರ ತಮ್ಮಲ್ಲಿ ಹೊಸ ಆತ್ಮವಿಶ್ವಾಸ ತುಂಬಿ, ವೆಸ್ಟ್ ಇಂಡೀಸ್ ವಿರುದ್ಧದ ಅತ್ಯಂತ ನಿರ್ಣಾಯಕ ಪಂದ್ಯದಲ್ಲಿ ತಂಡವನ್ನು ಗೆಲುವಿನ ದಂಡೆಗೆ ತಲುಪಿಸಲು ನೆರವಾಯಿತು ಎಂದು ಸಂಜು ತಿಳಿಸಿದ್ದಾರೆ.

ನ್ಯೂಜಿಲೆಂಡ್ ವಿರುದ್ಧದ ಟಿ20 ಸರಣಿಯ ನಂತರ ತಾವು ಮಾನಸಿಕವಾಗಿ ತೀವ್ರ ಆಯಾಸಗೊಂಡಿದ್ದಾಗಿ ಮತ್ತು ರೋಹಿತ್ ಶರ್ಮ ತೋರಿಸಿದ ಮಾರ್ಗವನ್ನು ಗ್ರಹಿಸಲು ತಮಗೆ ಸಾಧ್ಯವಾಗಲಿಲ್ಲ ಎಂದು ಸಂಜು ಸ್ಯಾಮ್ಸನ್ ಮುಕ್ತವಾಗಿ ಒಪ್ಪಿಕೊಂಡಿದ್ದಾರೆ. ಪ್ರಾಮಾಣಿಕವಾಗಿ ಹೇಳಬೇಕೆಂದರೆ, ಆ ಸಮಯದಲ್ಲಿ ನನಗೆ ಅವರ ಮಾತುಗಳನ್ನು ನಂಬಲು ಸಾಧ್ಯವಾಗಲಿಲ್ಲ. ಅವರು ತಮ್ಮ ಅನುಭವದಿಂದ ಹೇಳಿರಬಹುದು, ಆದರೆ ಅವರು ಕಂಡಿದ್ದನ್ನು ಆ ಕ್ಷಣದಲ್ಲಿ ನನಗೆ ಕಾಣಲು ಸಾಧ್ಯವಾಗಲಿಲ್ಲ. ಪ್ಲೇಯಿಂಗ್‌ ಇಲೆವೆನ್‌ನಿಂದ ಹೊರಗುಳಿದ ನಿರಾಸೆ ನನ್ನ ಮುಖದಲ್ಲೇ ಎದ್ದು ಕಾಣುತ್ತಿತ್ತು ಎಂದು ಜಿಯೋಸ್ಟಾರ್ ನೀಡಿದ ಸಂದರ್ಶನದಲ್ಲಿ ಸಂಜು ತಿಳಿಸಿದ್ದಾರೆ.

ವಿಶ್ವಕಪ್ ಆರಂಭಿಕ ಹಂತದಲ್ಲಿ ತಂಡದಿಂದ ಹೊರಗುಳಿದಿದ್ದ ಬೇಸರದಿಂದ ಹೊರಬರಲು ತಮಗೆ ಕನಿಷ್ಠ ಒಂದು ವಾರ ಬೇಕಾಯಿತು ಎಂದು ಸಂಜು ವಿವರಿಸಿದ್ದಾರೆ. ನ್ಯೂಜಿಲೆಂಡ್ ಸರಣಿ ಮುಗಿದ ಎರಡೇ ದಿನಗಳಲ್ಲಿ ವಿಶ್ವಕಪ್ ಆರಂಭವಾಗಿತ್ತು. ಮನಸ್ಸು ಶಾಂತವಾಗಲು ನನಗೆ ನಾಲ್ಕೈದು ದಿನಗಳು ಬೇಕಾದವು. ನನಗೆ ಭಾವನೆಗಳನ್ನು ಮುಚ್ಚಿಟ್ಟುಕೊಳ್ಳಲು ಬರುವುದಿಲ್ಲ, ಸಂಪೂರ್ಣ ಸಂತೋಷವಾಗಿಲ್ಲದಿದ್ದರೆ ಅದು ನನ್ನ ಮುಖದಲ್ಲೇ ತಿಳಿಯುತ್ತದೆ. ಆದರೆ, ದಿನಗಳ ನಂತರ ನಾನು ಮತ್ತೆ ಹಳಿಗೆ ಮರಳಿದೆ ಎಂದಿದ್ದಾರೆ ಸಂಜು.

ಈ ಹಿನ್ನಡೆಯು ತಮ್ಮನ್ನು ತಾವು ಸ್ವ-ಮೌಲ್ಯಮಾಪನ ಮಾಡಿಕೊಳ್ಳಲು ಉತ್ತಮ ಅವಕಾಶವಾಯಿತು ಎಂದು ಸಂಜು ಹೇಳಿದ್ದಾರೆ. ಬಿದ್ದಾಗಿದೆ, ಇನ್ಮುಂದೆ ಮೇಲೇಳುವುದಷ್ಟೇ ದಾರಿ. ನಾನು ಕ್ರಿಕೆಟ್ ಏಕೆ ಆಡುತ್ತೇನೆ? ನನ್ನ ಉದ್ದೇಶವೇನು? ಎಂದು ನನ್ನನ್ನೇ ಪ್ರಶ್ನಿಸಿಕೊಳ್ಳಲು ಪ್ರಾರಂಭಿಸಿದೆ. ವಿಶ್ವಕಪ್ ಮಧ್ಯದಲ್ಲೇ ನನ್ನನ್ನು ನಾನು ಮರುಶೋಧಿಸಿಕೊಂಡಂತೆ ಅನಿಸಿತು. ಅಲ್ಲಿಂದ ನನ್ನಲ್ಲಿದ್ದ ಹಳೆಯ ಆತ್ಮವಿಶ್ವಾಸ ಮತ್ತು ಉತ್ಸಾಹ ಮತ್ತೆ ಮರಳಿಬಂದವು ಎಂದು ಸಂಜು ಅವರು ಹಂಚಿಕೊಂಡಿದ್ದಾರೆ.

ಈ ಹೊಸ ದೃಷ್ಟಿಕೋನವೇ ವೆಸ್ಟ್ ಇಂಡೀಸ್ ವಿರುದ್ಧದ ಕ್ವಾರ್ಟರ್ ಫೈನಲ್ ಪಂದ್ಯದಲ್ಲಿ ಸಂಜು ಅವರ ಪಂದ್ಯಶ್ರೇಷ್ಠ ಇನ್ನಿಂಗ್ಸ್‌ಗೆ ಅಡಿಪಾಯ ಹಾಕಿಕೊಟ್ಟಿತು. ಜಿಂಬಾಬ್ವೆ ಪಂದ್ಯದ ನಂತರ ನಾನು ಈ ಪಂದ್ಯಕ್ಕೆ ಇನ್ನಷ್ಟು ಉತ್ತಮವಾಗಿ ಸಿದ್ಧನಾಗಿದ್ದೆ. ಐಪಿಎಲ್ ಮತ್ತು ಭಾರತದ ಪರ ಶ್ರೇಷ್ಠ ಇನ್ನಿಂಗ್ಸ್ ಆಡಿದಾಗ ಎಲ್ಲವೂ ಸರಿಯಾಗಿ ಮೂಡಿಬರುವ ದಿನಗಳಿರುತ್ತವೆ. ವೆಸ್ಟ್ ಇಂಡೀಸ್ ವಿರುದ್ಧದ ದಿನವೂ ಹಾಗೆಯೇ ಇತ್ತು. ಪರಿಸ್ಥಿತಿಗೆ ತಕ್ಕಂತೆ ಆಟವನ್ನು ಆನಂದಿಸುವುದಷ್ಟೇ ನನ್ನ ಗುರಿಯಾಗಿತ್ತು ಎಂದಿದ್ದಾರೆ.

ಸಾಮಾನ್ಯವಾಗಿ ಪವರ್ ಪ್ಲೇ ನಂತರ ಬಿರುಸಿನ ಬ್ಯಾಟಿಂಗ್ ನಡೆಸುವುದು ತಮ್ಮ ಶೈಲಿಯಾಗಿದ್ದರೂ, ಆ ಪಂದ್ಯದ ಪರಿಸ್ಥಿತಿ ಬೇರೆಯೇ ತಂತ್ರವನ್ನು ಬಯಸಿತ್ತು ಎಂದು ಸಂಜು ಚರ್ಚಿಸಿದ್ದಾರೆ. ನಾನು ದಾಳಿ ಮಾಡಲು ಯತ್ನಿಸಿದಾಗಲೆಲ್ಲಾ ಇನ್ನೊಂದು ತುದಿಯಲ್ಲಿ ವಿಕೆಟ್ ಬೀಳುತ್ತಿತ್ತು. ಆ ಕ್ಷಣದಲ್ಲಿ ಕ್ರಿಕೆಟ್‌ಗಿಂತ ದೊಡ್ಡ ಗುರು ಯಾವುದೂ ಇಲ್ಲ ಎಂಬುದು ನನಗೆ ಅರ್ಥವಾಯಿತು. ಆಟವೇ ನಮಗೆ ಏನು ಮಾಡಬೇಕೆಂದು ದಾರಿ ತೋರಿಸುತ್ತದೆ ಎಂಬುದನ್ನು ಆ ಪರಿಸ್ಥಿತಿ ನನಗೆ ಕಲಿಸಿಕೊಟ್ಟಿತು ಎಂದು ಅವರು ವಿವರಿಸಿದ್ದಾರೆ.

ಅಂತಿಮವಾಗಿ, ತಮ್ಮ ಆಕರ್ಷಕ ಇನ್ನಿಂಗ್ಸ್ ನಂತರದ ಭಾವನಾತ್ಮಕ ಸಂಭ್ರಮಾಚರಣೆಯು ವೈಯಕ್ತಿಕ ಗೆಲುವಿಗಿಂತ ಹೆಚ್ಚಾಗಿ ದೇವರಿಗೆ ಸಲ್ಲಿಸಿದ ಧನ್ಯವಾದವಾಗಿತ್ತು ಎಂದು ಸಂಜು ಹೇಳಿದ್ದಾರೆ. ಅದು ಅತ್ಯಂತ ವೈಯಕ್ತಿಕ ಸಂಭ್ರಮವಾಗಿತ್ತು, ಆದರೆ ಎಲ್ಲರ ಗಮನಸೆಳೆಯಿತು. ನಾನು ದೇವರಲ್ಲಿ ತೀವ್ರ ನಂಬಿಕೆ ಉಳ್ಳವನು. ತಂಡಕ್ಕೆ ನೆರವಾಗಲು ಸಾಧ್ಯವಾಗಿದ್ದಕ್ಕೆ ಕೃತಜ್ಞನಾಗಿದ್ದೇನೆ. ಆ ಅದ್ಭುತ ಕ್ಷಣ ನನ್ನ ಕೊನೆಯುಸಿರಿನವರೆಗೂ ನನ್ನ ನೆನಪಿನಲ್ಲಿರುತ್ತದೆ ಎಂದು ಸಂಜು ಸ್ಮರಿಸಿಕೊಂಡಿದ್ದಾರೆ, (ಏಜೆನ್ಸೀಸ್​).