ಸಂಜು ಮೊದಲು ಬಳಸಿದ ಮೊಬೈಲ್​, ನೆಚ್ಚಿನ ಸಿನಿಮಾ, ಮೊದಲು ಆಡಿದ ವಿಡಿಯೋ ಗೇಮ್​ ಯಾವುದು? ಇಲ್ಲಿದೆ ಅಚ್ಚರಿ ಉತ್ತರ... Sanju Samson

Sanju Samson : ಟೀಮ್​ ಇಂಡಿಯಾದ ಆರಂಭಿಕ ಆಟಗಾರ ಸಂಜು ಸ್ಯಾಮ್ಸನ್ ಇದೀಗ ಎಲ್ಲರ ನೆಚ್ಚಿನ ಆಟಗಾರ. ಭಾರತ ತಂಡ ಟಿ20 ವಿಶ್ವಕಪ್ ಗೆಲ್ಲುವಲ್ಲಿ ಸಂಜು ಪ್ರಮುಖ ಪಾತ್ರ ವಹಿಸಿದ್ದನ್ನು ವಿಶೇಷವಾಗಿ ಹೇಳಬೇಕಾಗಿಲ್ಲ ಏಕೆಂದರೆ, ಎಲ್ಲರು ಕಣ್ಣಾರೆ ಕಂಡಿದ್ದಾರೆ. ಪ್ರತಿಷ್ಠಿತ ಟೂರ್ನಿಯಲ್ಲಿ ಸತತ ಮೂರು ಪ್ರಮುಖ ಪಂದ್ಯಗಳಲ್ಲಿ ಅರ್ಧಶತಕಗಳನ್ನು ಗಳಿಸುವ ಮೂಲಕ ತನ್ನ ಸಾಮರ್ಥ್ಯ ಏನು ಅನ್ನೋದನ್ನು ಸಂಜು ಸಾಬೀತುಪಡಿಸಿದರು.

ವಿಶ್ವಕಪ್‌ನಲ್ಲಿ ಆಡಿದ 5 ಪಂದ್ಯಗಳಲ್ಲಿ 3 ಅರ್ಧಶತಕಗಳನ್ನು ಸಂಜು ಗಳಿಸಿದರು ಮತ್ತು 'ಸರಣಿಯ ಆಟಗಾರ' ಪ್ರಶಸ್ತಿಗೆ ಭಾಜನರಾದರು. ಇತ್ತೀಚೆಗೆ ಸಂಜು, ಇಂಡಿಯಾ ಟುಡೇ ಕಾನ್​ಕ್ಲೇವ್​ಗೆ ಹಾಜರಾಗಿದ್ದರು. ಈ ವೇಳೆ ರ್ಯಾಪಿಡ್ ಫೈರ್ ಸೆಷನ್‌ನಲ್ಲಿ, ತಮ್ಮ ವೈಯಕ್ತಿಕ ಜೀವನಕ್ಕೆ ಸಂಬಂಧಿಸಿದ ಅನೇಕ ಆಸಕ್ತಿದಾಯಕ ವಿಷಯಗಳನ್ನು ಅಭಿಮಾನಿಗಳೊಂದಿಗೆ ಸಂಜು ಹಂಚಿಕೊಂಡರು. ಬಾಲ್ಯದಿಂದಲೂ ತಮಗೆ ಸ್ಫೂರ್ತಿ ನೀಡಿದ ಆಟಗಾರ ಯಾರು? ಐಪಿಎಲ್​ನಲ್ಲಿ ತಮ್ಮ ಮೊದಲ ಸಿಕ್ಸರ್​ ಹೊಡೆದದ್ದು ಯಾವಾಗ? ಮುಂತಾದ ಪ್ರಶ್ನೆಗಳಿಗೆ ಸಂಜು, ಬಹಳ ಮೋಜಿನ ಉತ್ತರಗಳನ್ನು ನೀಡಿದರು.

ಬಾಲ್ಯದಿಂದಲೂ ಸ್ಫೂರ್ತಿ ನೀಡಿದ ಕ್ರಿಕೆಟಿಗ ಯಾರು ಎಂದು ಕೇಳಿದಾಗ, ಸಂಜು ಸ್ಯಾಮ್ಸನ್ ಅವರು ಸಚಿನ್ ತೆಂಡೂಲ್ಕರ್ ಎಂದು ಹೇಳಿದರು. ಸಚಿನ್ ಅವರಂತಹ ದಂತಕಥೆಯ ಆಟಗಾರನನ್ನು ನೋಡುವ ಮೂಲಕ ನಾನು ಕ್ರಿಕೆಟ್‌ಗೆ ಬಂದೆ ಎಂದು ಸಂಜು ಹೇಳಿದರು.

ಸಂಜು ಸ್ಯಾಮ್ಸನ್ ಅವರು ಅಂದಿನ ಕಿಂಗ್ಸ್ ಇಲೆವೆನ್ ಪಂಜಾಬ್ ತಂಡದ ವಿರುದ್ಧ ತಮ್ಮ ಐಪಿಎಲ್ ವೃತ್ತಿಜೀವನದ ಮೊದಲ ಸಿಕ್ಸ್ ಹೊಡೆದದ್ದನ್ನು ನೆನಪಿಸಿಕೊಂಡರು. ಐಪಿಎಲ್‌ನ ಆರಂಭಿಕ ಹಂತಗಳಲ್ಲಿ ಬಂದ ಆ ಸಿಕ್ಸ್ ಅವರಿಗೆ ವಿಶೇಷ ಭಾವನೆಯನ್ನು ನೀಡಿತು ಎಂದು ಅವರು ಹೇಳಿದರು.

ಸಂಜು ಸ್ಯಾಮ್ಸನ್ ಅವರು ಆಡಿದ ಮೊದಲ ವಿಡಿಯೋ ಗೇಮ್ "ಜಿಟಿಎ ವೈಸ್ ಸಿಟಿ" ಎಂದು ಉಲ್ಲೇಖಿಸಿದ್ದಾರೆ. ಅವರು ತಮ್ಮ ಮೊದಲ ಮೊಬೈಲ್ ಫೋನ್ ಆಗಿ ಮೊಟೊರೊಲಾ ಕಂಪನಿಯ ಫೋನ್ ಅನ್ನು ಬಳಸಿದ್ದಾರೆ ಎಂದು ಹೇಳಿದರು.

ಸಿನೆಮಾಗಳ ವಿಷಯಕ್ಕೆ ಬಂದರೆ, ಸೂಪರ್‌ಸ್ಟಾರ್ ರಜನಿಕಾಂತ್ ನಟಿಸಿದ ಎಲ್ಲಾ ಚಲನಚಿತ್ರಗಳನ್ನು ನಾನು ಇಷ್ಟಪಡುತ್ತೇನೆ ಎಂದು ಸಂಜು ಹೇಳಿದರು. ರಜನಿಕಾಂತ್ ಅವರ ಚಲನಚಿತ್ರಗಳು ನನಗೆ ಬಹಳಷ್ಟು ಮನರಂಜನೆಯನ್ನು ನೀಡುತ್ತವೆ ಎಂದರು.

ಸಂಜು ಸ್ಯಾಮ್ಸನ್ ಅವರು ಮೊದಲ ಬಾರಿಗೆ ಕ್ರೀಡಾಂಗಣಕ್ಕೆ ಹೋದದ್ದು ಐಪಿಎಲ್ ಪಂದ್ಯಕ್ಕಾಗಿ ಎಂದು ಬಹಿರಂಗಪಡಿಸಿದರು. ಐಪಿಎಲ್‌ನಲ್ಲಿ ಆಡುವವರೆಗೂ ಕ್ರೀಡಾಂಗಣದಲ್ಲಿ ಲೈವ್​ ಆಗಿ ಪಂದ್ಯವನ್ನು ವೀಕ್ಷಣೆ ಮಾಡಿರಲಿಲ್ಲ ಎಂಬ ಸಂಜು ಮಾತು ಆಸಕ್ತಿದಾಯಕವಾಗಿತ್ತು. ಅಂದಹಾಗೆ, ಈ ರ್ಯಾಪಿಡ್​ ಉತ್ತರಗಳು ಅಭಿಮಾನಿಗಳಿಗೆ ಸಂಜು ಅವರ ವೈಯಕ್ತಿಕ ಜೀವನದ ಬಗ್ಗೆ ಒಂದು ಇಣುಕು ನೋಟವನ್ನು ನೀಡಿತು, (ಏಜೆನ್ಸೀಸ್​).