ಸಂಜು ಬ್ಯಾಟಿಂಗ್​ಗೆ ಈ ಇಬ್ಬರು ದಿಗ್ಗಜರೇ ಸ್ಫೂರ್ತಿ! ಸ್ಯಾಮ್ಸನ್​ ಯಶಸ್ಸಿನ ಮಂತ್ರ ಬಿಚ್ಚಿಟ್ಟ​ ತಂದೆ ವಿಶ್ವನಾಥ್ | ​Sanju Samson

ಕೇರಳ: ನ್ಯೂಜಿಲೆಂಡ್​ ಎದುರು 96 ರನ್​ಗಳ ಭರ್ಜರಿ ಗೆಲುವು ದಾಖಲಿಸಿದ ಟೀಮ್ ಇಂಡಿಯಾ, ಮೂರನೇ ಬಾರಿಗೆ ಟಿ20 ವಿಶ್ವಕಪ್​ ಎತ್ತಿಹಿಡಿದಿದ್ದು ಇತಿಹಾಸ. ಫೈನಲ್ ಪಂದ್ಯದಲ್ಲಿಯೂ ತಂಡದ ಪರ ಅದ್ಭುತ ಇನ್ನಿಂಗ್ಸ್ ನೀಡಿದ ಸಂಜು (Sanju Samson), 46 ಎಸೆತಗಳಲ್ಲಿ 89 ರನ್​ಗಳ ಉತ್ತಮ ಕೊಡುಗೆ ನೀಡಿದ್ದು ವಿಶೇಷ. ಸೂಪರ್​-8, ಸೆಮಿಫೈನಲ್​ ಮತ್ತು ಫೈನಲ್​ನಂತಹ ಬಹುಮುಖ್ಯ​ ಪಂದ್ಯಗಳಲ್ಲಿ ಅಮೋಘ ಪ್ರದರ್ಶನ ಕೊಟ್ಟ ಸಂಜುಗೆ ಸದ್ಯ ಕ್ರಿಕೆಟ್​ ದಿಗ್ಗಜರಿಂದ ಹಿಡಿದು ರಾಜಕೀಯ, ಚಿತ್ರೋದ್ಯಮ ಸೇರಿ ಹಲವು ಕ್ಷೇತ್ರಗಳ ಗಣ್ಯರು ಬೆನ್ನುತಟ್ಟಿದ್ದಾರೆ. 

ವೆಸ್ಟ್​ ಇಂಡೀಸ್​ ವಿರುದ್ಧದ ಸೂಪರ್​-8 ನಿರ್ಣಾಯಕ ಪಂದ್ಯದಲ್ಲಿ 97 ರನ್​ ಮತ್ತು ಇಂಗ್ಲೆಂಡ್​ ವಿರುದ್ಧದ ಸೆಮಿಫೈನಲ್​ ಕಾಳಗದಲ್ಲಿ 89 ರನ್​ ಬಾರಿಸಿದ ಸಂಜು ಸ್ಯಾಮ್ಸನ್​, ತಾಳ್ಮೆ ಹಾಗೂ ಲೆಕ್ಕಾಚಾರದ ಬ್ಯಾಟಿಂಗ್​ ಮಾಡಿದ್ದು ಎಲ್ಲರ ಗಮನ ಸೆಳೆಯಿತು. ಇಡೀ ದೇಶವೇ ಸ್ಟಾರ್​ ಬ್ಯಾಟರ್​ನನ್ನು ಕೊಂಡಾಡುತ್ತಿರುವಾಗ ಸಂಜು ತಂದೆ ಸ್ಯಾಮ್ಸನ್ ವಿಶ್ವನಾಥ್​, ಮಗನ ಬ್ಯಾಟಿಂಗ್ ಶೈಲಿ​ ಬಗ್ಗೆ ತಮ್ಮ ಮನದಾಳದ ಮಾತುಗಳನ್ನು ಹಂಚಿಕೊಂಡಿದ್ದಾರೆ.  

ಸಂಜು ಬ್ಯಾಟಿಂಗ್ ಕಲಿಕೆ ಯಾವಾಗ ಶುರುವಾಯಿತೋ, ಅಂದಿನಿಂದಲೂ ಅವನು ಟೀಮ್ ಇಂಡಿಯಾ ದಿಗ್ಗಜರಾದ ಸಚಿನ್ ತೆಂಡೂಲ್ಕರ್​ ಮತ್ತು ರಾಹುಲ್ ದ್ರಾವಿಡ್​ ಸರ್​ ಅವರ ಬ್ಯಾಟಿಂಗ್ ಶೈಲಿಯನ್ನು ಅನುಕರಿಸಲು ಪ್ರಾರಂಭಿಸಿದ. ಆತ ನಾಲ್ಕು ವರ್ಷದ ಮಗುವಿದ್ದಾಗ, ಮನೆಯಲ್ಲಿ ನಾನು ಭಾರತದ ಪಂದ್ಯಗಳನ್ನು ಅವರಿಗೂ ತೋರಿಸುತ್ತಿದ್ದೆ. ನನ್ನ ಜೊತೆ ಮಕ್ಕಳೊಂದಿಗೆ ಕೂತು ಪಂದ್ಯ ನೋಡ್ತಿದ್ದ ಸಂಜುಗೆ ನೋಡಿ ಸಚಿನ್​ ಮತ್ತು ದ್ರಾವಿಡ್​ ಅವರ ಬ್ಯಾಟಿಂಗ್ ಎಷ್ಟು ಅದ್ಭುತವಾಗಿದೆ ಎಂದು ಮೆಚ್ಚಿ, ಹೊಗಳುತ್ತಿದ್ದೆ. ಅದನ್ನು ಮನಸ್ಸಿಗೆ ತೆಗೆದುಕೊಂಡ ಮಗ, ಕಲಿಕೆಗೆ ಬಂದಾಗ ಅವರಿಬ್ಬರಂತೆ ಆಡಲು ಆರಂಭಿಸಿದ ಎಂದು ಹೇಳಿದ್ದಾರೆ.  

ಮೂರು ಇನ್ನಿಂಗ್ಸ್​ನಲ್ಲಿಯೂ ಸಂಜು ಬಹಳ ಕೂಲ್​ ಆಗಿ ಬ್ಯಾಟ್​ ಮಾಡಿದ. ಯಾವುದೇ ಬಾಲ್​ಗೂ ಅನವಶ್ಯಕವಾಗಿ ಆಡಲಿಲ್ಲ. ಎಲ್ಲಾ ಶಾಟ್ಸ್​ಗಳನ್ನು ಯೋಚಿಸಿ ಆಡಿದ. ಇದೇ ರೀತಿ ಅವನು ಬಾಲ್ಯದಲ್ಲಿ ಆಡುತ್ತಿದ್ದ. ಕಳೆದ ವರ್ಷಗಳಲ್ಲಿ, ಅದೆಷ್ಟೋ ಬಾರಿ ನೀನು ನಿನ್ನ ಹಳೆಯ ಸ್ಟೈಲ್​ಗೆ ಹಿಂತಿರುಗು ಎನ್ನುತ್ತಿದ್ದೆ. ಆದರೆ, ನನ್ನ ಮಾತನ್ನೇ ಕೇಳ್ತಿರಲಿಲ್ಲ ಸ್ಯಾಮ್ಸನ್​. ಯಾವಾಗ ಜನರು ಟೀಕಿಸಿದರೋ, ಆಗ ಅವರಿಂದ ಬಂದ ಸಲಹೆ, ಬುದ್ಧಿ ಮಾತುಗಳನ್ನು ಕೇಳಬೇಕಾಯಿತು ಅವನು ಎಂದಿದ್ದಾರೆ,(ಏಜೆನ್ಸೀಸ್).