ನವದೆಹಲಿ: ಬ್ಯಾಟಿಂಗ್ ದಿಗ್ಗಜ ಸಚಿನ್ ತೆಂಡುಲ್ಕರ್ (Sachin Tendulkar) 1990ರ ಇಂಗ್ಲೆಂಡ್ ಪ್ರವಾಸದಲ್ಲಿ ಪಂದ್ಯಶ್ರೇಷ್ಠ ಪ್ರಶಸ್ತಿ ಗೆದ್ದಾಗ ಉಡುಗೊರೆಯಾಗಿ ಶಾಂಪೇನ್ ಬಾಟಲಿಯೊಂದನ್ನು ಪಡೆದಿದ್ದರು. ಆದರೆ ಆಗ ಅವರಿನ್ನೂ ಅಪ್ರಾಪ್ತರಾಗಿದ್ದ ಕಾರಣ ಅದನ್ನು ಕುಡಿಯುವಂತಿರಲಿಲ್ಲ. ಕೊನೆಗೆ 8 ವರ್ಷಗಳ ಬಳಿಕ 1998ರಲ್ಲಿ ಮಗಳ ಮೊದಲ ಜನ್ಮದಿನದಂದು ಅವರು ಆ ಶಾಂಪೇನ್ ಬಾಟಲಿಯನ್ನು ಕೊನೆಗೂ ಓಪನ್ ಮಾಡಿದ್ದರು. ಇದೀಗ ಭಾರತೀಯ ಕ್ರಿಕೆಟ್ನ ಹೊಸ ಬ್ಯಾಟಿಂಗ್ ಸೆನ್ಸೇಶನ್ ವೈಭವ್ ಸೂರ್ಯವಂಶಿ (Vaibhav Sooryavanshi) ಕೂಡ ಇಂಥದ್ದೇ ಇಕ್ಕಟ್ಟಿನಲ್ಲಿ ಸಿಲುಕಿದ್ದಾರೆ.
ಕಳೆದ ಐಪಿಎಲ್ನಲ್ಲಿ ರನ್ಮಳೆ ಹರಿಸಿ ಆರೆಂಜ್ ಕ್ಯಾಪ್, ಸರಣಿಶ್ರೇಷ್ಠ, ಉದಯೋನ್ಮುಖ ಆಟಗಾರ ಪ್ರಶಸ್ತಿಗಳನ್ನು ಗೆದ್ದ ಅವರಿಗೆ 12 ಲಕ್ಷ ರೂ. ಮೌಲ್ಯದ ಬ್ರ್ಯಾಂಡ್-ನ್ಯೂ ಟಾಟಾ ಸಿಯೇರಾ ಎಸ್ಯುವಿ ಉಡುಗೊರೆಯಾಗಿ ಲಭಿಸಿತ್ತು. ಆದರೆ 15 ವರ್ಷದ ಸೂರ್ಯವಂಶಿ ಡೆವಿಂಗ್ ಲೈಸೆನ್ಸ್ ಪಡೆಯಲು 18ನೇ ವಯಸ್ಸಿನವರೆಗೆ ಕಾಯಬೇಕಿದೆ ಮತ್ತು ಅಲ್ಲಿಯವರೆಗೆ ಅವರು ಆಟಿಕೆಯ ರಿಮೋಟ್ ಕಂಟ್ರೋಲ್ ಕಾರನ್ನಷ್ಟೇ ಬಿಡಬಹುದಾಗಿದೆ.
ರಾಜಸ್ಥಾನ ರಾಯಲ್ಸ್ ಫ್ರಾಂಚೈಸಿ ಸಾಮಾಜಿಕ ಜಾಲತಾಣದಲ್ಲಿ ಪ್ರಕಟಿಸಿರುವ ವಿಡಿಯೋದಲ್ಲಿ ಈ ಬಗ್ಗೆ ಮಾತನಾಡಿರುವ ಸೂರ್ಯವಂಶಿ, "3 ವರ್ಷಗಳ ವರೆಗೆ ಕಾಯುವೆ. ಲೈಸೆನ್ಸ್ ಸಿಕ್ಕ ಬಳಿಕ ಕಾರು ಚಲಾಯಿಸುವೆ. ಅಲ್ಲಿಯವರೆಗೆ ಅಪ್ಪ ಕಾರು ಬಿಡುವರು, ನಾನು ಪಕ್ಕದಲ್ಲೇ ಕುಳಿತುಕೊಳ್ಳುವೆ' ಎಂದಿದ್ದಾರೆ.
