ಅದೆಲ್ಲ ಬೇಡ... ಐಪಿಎಲ್​ ಶುರುವಿಗೂ ಮುನ್ನವೇ 'ಬೇಬಿ ಬಾಸ್'​ಗೆ ಆರ್​ಆರ್​ ಕ್ಯಾಪ್ಟನ್​ ವಾರ್ನಿಂಗ್​! | IPL 2026

IPL 2026: ಮಾ.28ರಂದು ಆರಂಭವಾಗಲಿರುವ ಐಪಿಎಲ್​ 19ನೇ ಆವೃತ್ತಿಗೆ ಅದ್ಧೂರಿ ಚಾಲನೆ ಸಿಗಲಿದ್ದು, ಬೆಂಗಳೂರಿನ ಎಂ. ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಆರ್​ಸಿಬಿ ಮತ್ತು ಸನ್​ರೈಸರ್ಸ್​ ಹೈದರಾಬಾದ್ ತಂಡಗಳು ಕಿಕ್​ಸ್ಟಾರ್ಟ್​​ ಪಂದ್ಯದಲ್ಲಿ ಮುಖಾಮುಖಿಯಾಗಲಿವೆ. ಈಗಾಗಲೇ ಮೈದಾನದಲ್ಲಿ ಬೆವರಿಳಿಸುತ್ತಿರುವ ತಂಡಗಳ ಪೈಕಿ ರಾಜಸ್ಥಾನ ರಾಯಲ್ಸ್ ಕ್ಯಾಪ್ಟನ್​ ರಿಯಾನ್ ಪರಾಗ್​ ನೀಡಿರುವ ಹೇಳಿಕೆಗಳು ಸದ್ಯ ಜಾಲತಾಣಗಳಲ್ಲಿ ವೈರಲ್ ಆಗಿದೆ. 

ಕಳೆದ ಆವೃತ್ತಿಯಲ್ಲಿ 1.1 ಕೋಟಿ ರೂ.ಗೆ ರಾಜಸ್ಥಾನ ರಾಯಲ್ಸ್ ಸೇರಿದ 14 ವರ್ಷದ ವೈಭವ್ ಸೂರ್ಯವಂಶಿ, ಕಿರಿಯ ವಯಸ್ಸಿನಲ್ಲೇ ತನ್ನ ಅಮೋಘ ಬ್ಯಾಟಿಂಗ್ ಪ್ರದರ್ಶನ ನೀಡಿ, ಇಡೀ ಕ್ರಿಕೆಟ್ ಜಗತ್ತನ್ನು ಬೆರಗುಗೊಳಿಸಿದರು. ತಂಡದ ಪರ ಆರಂಭಿಕ ಎಡಗೈ ಬ್ಯಾಟ್ಸ್‌ಮನ್ ಆಗಿ ಕಣಕ್ಕಿಳಿಯುವ ವೈಭವ್, ಮೈದಾನದ ಸುತ್ತಮುತ್ತ ಬೌಂಡರಿ ಮತ್ತು ಸಿಕ್ಸರ್​ಗಳನ್ನು ಬಾರಿಸುವ ಸರದಾರ. ಆರ್​ಆರ್​ ಪರ ಆತ ನೀಡಿದ ಸ್ಫೋಟಕ ಇನ್ನಿಂಗ್ಸ್ ಕ್ರಿಕೆಟ್​ ಪ್ರಿಯರ ಹುಬ್ಬೇರಿಸಿದ್ದು ಗಮನಾರ್ಹ. 

ಆಡಿದ 7 ಪಂದ್ಯಗಳಲ್ಲಿ 252 ರನ್‌ ಕಲೆಹಾಕಿದ ಸೂರ್ಯವಂಶಿ, ಐಪಿಎಲ್​ ಮಾತ್ರವಲ್ಲದೇ ದೇಶಿಯ ಹಾಗೂ ಅಂಡರ್​-19 ಏಕದಿನ ವಿಶ್ವಕಪ್​ ತಂಡದಲ್ಲಿ ಸಹ ಅದ್ಭುತ ಪ್ರದರ್ಶನ ನೀಡಿದ್ದಾರೆ. ಕಳೆದ ವರ್ಷದ ಐಪಿಎಲ್​ನಲ್ಲಿ 206.56 ಸ್ಟ್ರೈಕ್ ರೇಟ್​ನಲ್ಲಿ ಅಂತಾರಾಷ್ಟ್ರೀಯ ಬೌಲರ್​ಗಳಿಗೆ ಶಾಕ್​ ನೀಡಿದ 'ಬೇಬಿ ಬಾಸ್​', ಗಾಯದಿಂದ ಬಳಲುತ್ತಿದ್ದ ಸಂಜು ಸ್ಯಾಮ್ಸನ್ ಬದಲಿಗೆ ತಂಡದಲ್ಲಿ ಸ್ಥಾನ ಪಡೆದಿದ್ದರು. ಕೇವಲ 35 ಎಸೆತಗಳಲ್ಲಿ ಶತಕ ಗಳಿಸಿದ ಅವರು, ಐಪಿಎಲ್ ಇತಿಹಾಸದಲ್ಲಿ ಶತಕ ಗಳಿಸಿದ ಅತ್ಯಂತ ಕಿರಿಯ ಆಟಗಾರ ಮತ್ತು ಅತ್ಯಂತ ವೇಗವಾಗಿ ಸೆಂಚುರಿ ಬಾರಿಸಿದ ಭಾರತೀಯ ಆಟಗಾರ ಎಂಬ ಹೆಗ್ಗಳಿಕೆಗೂ ಪಾತ್ರರಾದರು.

ಇನ್ನು 19ನೇ ಆವೃತ್ತಿಗಾಗಿ ಕಾದು ಕುಳಿತಿರುವ ಕ್ರಿಕೆಟ್​ ಪ್ರೇಮಿಗಳಿಗಂತು ವೈಭವ್ ಸೂರ್ಯವಂಶಿ ಮೇಲೆ ದುಪ್ಪಟ್ಟು ನಿರೀಕ್ಷೆಗಳಿವೆ. ಈ ಸಂದರ್ಭದಲ್ಲಿ ಮಾತನಾಡಿದ ಆರ್​ಆರ್​ ತಂಡದ ನಾಯಕ ರಿಯಾನ್ ಪರಾಗ್, ವೈಭವ್ ಮೇಲೆ ಯಾವುದೇ ಒತ್ತಡವಿಲ್ಲದಂತೆ ನೋಡಿಕೊಳ್ಳುವುದು ನನ್ನ ಕೆಲಸ. ಈ ಬಾರಿ, ಪ್ರಚೋದನೆ ಮತ್ತು ಒತ್ತಡಗಳು ಬರುವುದು ಸಹಜ. ಆದರೆ, ಯಶಸ್ವಿ ಜೈಸ್ವಾಲ್ ಆ ಒತ್ತಡವನ್ನು ತೆಗೆದುಕೊಳ್ಳಲಿದ್ದಾರೆ. ಅವರ ಮೇಲೆ ಹೆಚ್ಚಿನ ಜವಾಬ್ದಾರಿಯನ್ನು ನಾವು ನೀಡುತ್ತಿದ್ದೇವೆ. ಇಲ್ಲಿ ಸೂರ್ಯವಂಶಿ ಆರಾಮದಾಯಕವಾಗಿ ಆಡಲಿ. ಆದಷ್ಟು, ಆತನನ್ನು ಮೀಡಿಯಾದಿಂದ ದೂರವಿಟ್ಟು, ಪಂದ್ಯವನ್ನು ಎಂಜಾಯ್​ ಮಾಡಲು ಬಿಡುತ್ತೇನೆ ಎಂದು ಹೇಳಿದ್ದಾರೆ,(ಏಜೆನ್ಸೀಸ್).