ಈಡನ್ ಗಾರ್ಡನ್‌ನಲ್ಲಿ ರಿಂಕು ಸಿಂಗ್ ಅಬ್ಬರ; ರಾಯಲ್ಸ್ ವಿರುದ್ಧ ಕೆಕೆಆರ್‌ಗೆ ರೋಚಕ ಜಯ! | KKRvsRR

ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ಆಯ್ದುಕೊಂಡ ರಾಜಸ್ಥಾನ್ ರಾಯಲ್ಸ್ ತಂಡಕ್ಕೆ ಯಶಸ್ವಿ ಜೈಸ್ವಾಲ್ (39) ಮತ್ತು ಯುವ ಆಟಗಾರ ವೈಭವ್ ಸೂರ್ಯವಂಶಿ (46) ಅದ್ಭುತ ಆರಂಭ ನೀಡಿದರು. ಕೇವಲ 8.3 ಓವರ್‌ಗಳಲ್ಲಿ ವಿಕೆಟ್ ನಷ್ಟವಿಲ್ಲದೆ 81 ರನ್ ಕಲೆಹಾಕಿದ್ದ ರಾಯಲ್ಸ್ ಪಡೆ ಒಂದು ಹಂತದಲ್ಲಿ 200ರ ಗಡಿ ದಾಟುವ ಮುನ್ಸೂಚನೆ ನೀಡಿತ್ತು. ಆದರೆ, ಕೆಕೆಆರ್‌ನ ಬೌಲರ್​ಗಳಾದ ವರುಣ್ ಚಕ್ರವರ್ತಿ, ಕಾರ್ತಿಕ್​ ಮತ್ತು ಸುನಿಲ್ ನರೈನ್ ಪಂದ್ಯದ ಗತಿಯನ್ನೇ ಬದಲಿಸಿದರು.

ವರುಣ್ ಚಕ್ರವರ್ತಿ ಕೇವಲ 14 ರನ್ ನೀಡಿ 3 ವಿಕೆಟ್ ಕಬಳಿಸಿದರೆ, ಕಾರ್ತಿಕ್​ ತ್ಯಾಗಿ 22 ಕ್ಕೆ 3, ನರೈನ್ 26 ರನ್ ನೀಡಿ 2 ವಿಕೆಟ್ ಕಿತ್ತರು. ತ್ರಿವಳಿ ದಾಳಿಗೆ ನಲುಗಿದ ರಾಯಲ್ಸ್, 16 ಓವರ್‌ಗಳಲ್ಲಿ 124 ರನ್ ಗಳಿಸುವಷ್ಟರಲ್ಲಿ 5 ವಿಕೆಟ್ ಕಳೆದುಕೊಂಡಿತು. ಶಿಮ್ರಾನ್ ಹೆಟ್ಮೆಯರ್ (15) ಮತ್ತು ರಿಯಾನ್ ಪರಾಗ್ (12) ಅಲ್ಪ ಕಾಣಿಕೆ ನೀಡಿದರೂ, ಕೆಕೆಆರ್​ ಬೌಲಿಂಗ್ ಮುಂದೆ ರಾಜಸ್ಥಾನ್ ಮಣಿಯಿತು. ಅಂತಿಮವಾಗಿ ರಾಯಲ್ಸ್ 20 ಓವರ್‌ಗಳಲ್ಲಿ 9 ವಿಕೆಟ್ ನಷ್ಟಕ್ಕೆ 155 ರನ್ ಗಳಿಸಲಷ್ಟೇ ಶಕ್ತವಾಯಿತು.

156 ರನ್‌ಗಳ ಸಾಧಾರಣ ಗುರಿ ಬೆನ್ನಟ್ಟಿದ ಕೆಕೆಆರ್ ತಂಡಕ್ಕೆ ಆರಂಭದಲ್ಲೇ ಆಘಾತ ಕಾದಿತ್ತು. ಕೇವಲ 2ನೇ ಓವರ್ ವೇಳೆಗೆ 5 ರನ್‌ಗಳಿಗೆ 2 ವಿಕೆಟ್ ಕಳೆದುಕೊಂಡು ತಂಡ ಸಂಕಷ್ಟಕ್ಕೆ ಸಿಲುಕಿತು. 11ನೇ ಓವರ್ ವೇಳೆಗೆ ಅರ್ಧದಷ್ಟು ಬ್ಯಾಟರ್‌ಗಳು (70 ರನ್) ಪೆವಿಲಿಯನ್ ಸೇರಿದ್ದರು. ಕ್ರೀಡಾಂಗಣದಲ್ಲಿ ಆತಂಕದ ವಾತಾವರಣ ನಿರ್ಮಾಣವಾದಾಗ ಕ್ರೀಸ್‌ಗೆ ಬಂದಿದ್ದು ಮ್ಯಾಚ್ ಫಿನಿಶರ್ ರಿಂಕು ಸಿಂಗ್.

ರಿಂಕು ಸಿಂಗ್ ತಮ್ಮ ಜವಾಬ್ದಾರಿಯುತ ಆಟದ ಮೂಲಕ ಪಂದ್ಯವನ್ನು ಕೆಕೆಆರ್ ಕಡೆಗೆ ತಿರುಗಿಸಿದರು. ಕೇವಲ 37 ಎಸೆತಗಳಲ್ಲಿ 76 ರನ್‌ಗಳ ನಿರ್ಣಾಯಕ ಜೊತೆಯಾಟವನ್ನು ಹಂಚಿಕೊಳ್ಳುವ ಮೂಲಕ ತಂಡವನ್ನು ಜಯದ ದಡ ಸೇರಿಸಿದರು. ರಿಂಕು ಅವರ ಬ್ಯಾಟ್‌ನಿಂದ ಸಿಡಿದ ಸಿಕ್ಸರ್ ಮತ್ತು ಬೌಂಡರಿಗಳು ಈಡನ್ ಗಾರ್ಡನ್‌ನಲ್ಲಿ ಅಕ್ಷರಶಃ ಹಬ್ಬದ ವಾತಾವರಣ ಸೃಷ್ಟಿಸಿದವು. ಅಂತಿಮವಾಗಿ ಕೆಕೆಆರ್ 4 ವಿಕೆಟ್‌ಗಳು ಬಾಕಿ ಇರುವಂತೆಯೇ ಗುರಿ ತಲುಪಿ ಸಂಭ್ರಮಿಸಿತು(ಏಜೆನ್ಸೀಸ್​).