ಬ್ಲ್ಯಾಕ್​ ಟಿಕೆಟ್, ಮೊಬೈಲ್​, ಚಿನ್ನ... ಚಿನ್ನಸ್ವಾಮಿಯಲ್ಲಿ ಆರ್​ಸಿಬಿಯ ಕೊನೇ ಪಂದ್ಯಕ್ಕೆ ಕ್ಷಣಗಣನೆ! ಖಾಕಿ ಹೈಅಲರ್ಟ್​

RCB vs GT: ಇಂದು (ಏ.24) ನಡೆಯಲಿರುವ 19ನೇ ಐಪಿಎಲ್​ ಆವೃತ್ತಿಯ ಪಂದ್ಯದಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಮತ್ತು ಗುಜರಾತ್ ಟೈಟನ್ಸ್ ತಂಡಗಳು ಮುಖಾಮುಖಿಯಾಗಲಿದ್ದು, ಆರ್​ಸಿಬಿ ತವರಾದ ಎಂ. ಚಿನ್ನಸ್ವಾಮಿಯಲ್ಲಿ ಈ ಪಂದ್ಯ ನಡೆಯಲಿದೆ. ತವರಿನಲ್ಲಿ ಮತ್ತೊಂದು ಗೆಲುವು ಸಾಧಿಸಲು ಎದುರುನೋಡುತ್ತಿರುವ ರಜತ್ ಪಾಟೀದಾರ್​ ಪಡೆಗೆ ಬೆಂಗಳೂರಿನಲ್ಲಿ ಇದೇ ಕೊನೆಯ ಪಂದ್ಯ ಎಂಬ ಸಂಗತಿ ಸದ್ಯ ಲಾಯಲ್​ ಫ್ಯಾನ್ಸ್​ಗೆ ಭಾರೀ ಬೇಸರ ತಂದಿದೆ.

ಐಪಿಎಲ್​ ಅಂಕಪಟ್ಟಿಯಲ್ಲಿ ಅಗ್ರ 3ನೇ ಸ್ಥಾನದಲ್ಲಿರುವ ಆರ್​ಸಿಬಿ, ಇಲ್ಲಿಯವರೆಗೆ ಆಡಿರುವ 6 ಪಂದ್ಯಗಳಲ್ಲಿ 4ರಲ್ಲಿ ಜಯ ಸಾಧಿಸಿ, ಇನ್ನೆರೆಡರಲ್ಲಿ ಸೋಲುಂಡಿದೆ. ಬ್ಯಾಟಿಂಗ್, ಬೌಲಿಂಗ್​ ಮತ್ತು ಫೀಲ್ಡಿಂಗ್​ ಒಟ್ಟಾರೆ ಉತ್ತಮ ಆಲ್​ರೌಂಡ್​ ಪ್ರದರ್ಶನ ನೀಡುತ್ತಿರುವ ರಜತ್ ಪಾಟೀದಾರ್​ ಪಡೆ ಇಂದಿನ ಪಂದ್ಯದಲ್ಲಿ ಹೇಗಾದರೂ ಗೆಲ್ಲಲೇಬೇಕು ಎಂದು ಪಣತೊಟ್ಟಿದೆ. ತವರಿನಲ್ಲಿ ಲೀಗ್​ನ ಕೊನೆಯ ಪಂದ್ಯ ಇದಾಗಿರುವ ಹಿನ್ನೆಲೆ ತಮ್ಮ ಅಭಿಮಾನಿಗಳನ್ನು ಸಂತೋಷ ಪಡಿಸುವ ನಿಟ್ಟಿನಲ್ಲಿ ಆರ್​ಸಿಬಿ ಗೆಲುವಿನತ್ತ ಕಣ್ಣಿಟ್ಟಿದೆ.

ದಾಖಲೆಗಳ ಸರದಾರ ವಿರಾಟ್​ ಕೊಹ್ಲಿ ಮತ್ತು ತಂಡದ ಆಟಗಾರರನ್ನು ಕಣ್ತುಂಬಿಕೊಳ್ಳಲು ತೀವ್ರ ಕಾತರದಿಂದ ಕಾಯುತ್ತಿರುವ ಆರ್​ಸಿಬಿ ಅಭಿಮಾನಿಗಳು, ಸಂಜೆಯ ಪಂದ್ಯಕ್ಕೆ ಅದಾಗಲೇ ಚಿನ್ನಸ್ವಾಮಿ ಕ್ರೀಡಾಂಗಣಕ್ಕೆ ದೌಡಾಯಿಸಿದ್ದಾರೆ. ಗುಜರಾತ್ ಟೈಟನ್ಸ್​ ತಂಡದಲ್ಲಿರುವ ಕನ್ನಡಿಗ ಪ್ರಸಿದ್ಧ್​ ಕೃಷ್ಣ ಅವರಿಗೂ ಇದು ತವರೂರು ಎಂಬುದು ಲಾಯಲ್​ ಫ್ಯಾನ್ಸ್ ಮರೆತಿಲ್ಲ. ಬೆಂಗಳೂರು ಪಡೆಯ ಕೊನೇ ಐಪಿಎಲ್​ ಇದಾಗಿರುವ ಕಾರಣ, ಪೊಲೀಸರು ಸ್ಟೇಡಿಯಂ ಸುತ್ತಮುತ್ತ ಹದ್ದಿನ ಕಣ್ಣಿಟ್ಟಿದ್ದಾರೆ.

ಈ ಹಿಂದೆ, ಆರ್​ಸಿಬಿ ಅಭಿಮಾನಿಗಳಿಂದ ಒಂದು ಟಿಕೆಟ್​ಗೆ ಬರೋಬ್ಬರಿ 15ರಿಂದ 19000 ರೂ.ನಂತೆ ಹೆಚ್ಚಿನ ಹಣ ಪಡೆದು, ಬ್ಲ್ಯಾಕ್​ ಟಿಕೆಟ್​ ಮಾರಾಟ ಮಾಡಿದವರನ್ನು ಬಂಧಿಸಿದ ಬೆಂಗಳೂರು ಪೊಲೀಸರು, ಆ ರೀತಿ ಇಂದಿನ ಪಂದ್ಯದಲ್ಲಿ ಯಾರಾದರೂ ಮಾಡುತ್ತಿದ್ದಾರೆ ಎಂದು ಜೂಮ್​ ಮಾಡಿ ಹುಡುಕುತ್ತಿದೆ. ಈ ಮಧ್ಯೆ, ತಮ್ಮ ನೆಚ್ಚಿನ ತಂಡದ ಆಟಗಾರರನ್ನು ನೋಡುವ ಆತುರದಲ್ಲಿ ಬೆಲೆ ಬಾಳುವ ಚಿನ್ನಾಭರಣ, ಮೊಬೈಲ್ ಫೋನ್​, ಪರ್ಸ್​ ಸೇರಿದಂತೆ ಇನ್ನಿತರ ವಸ್ತುಗಳನ್ನು ಕಳೆದುಕೊಳ್ಳುವ ಜನರಿಗೆ ಖಾಕಿ ಎಚ್ಚರಿಕೆ ನೀಡುತ್ತಿರುವುದು ಗಮನಾರ್ಹ.

ಇಂದಿನ ಗುಜರಾತ್ ಟೈಟನ್ಸ್ ಪಂದ್ಯದಲ್ಲಿ ಆರ್​ಸಿಬಿ ಮತ್ತೊಂದು ಗೆಲುವು ಸಾಧಿಸಬೇಕು ಮತ್ತು ವಿರಾಟ್​ ಕೊಹ್ಲಿ ಅವರಿಂದ ಶತಕದಾಟ ನೋಡಬೇಕು ಎಂಬ ಹಂಬಲ, ಮಹಾದಾಸೆ ಫ್ರಾಂಚೈಸಿಯ ಲಾಯಲ್​ ಅಭಿಮಾನಿಗಳದ್ದು. ಸಂಜೆ 7:30ಕ್ಕೆ ಆರಂಭವಾಗಲಿರುವ ಮ್ಯಾಚ್​ ಎಷ್ಟು ರೋಚಕವಾಗಿರಲಿದೆ? ತವರಿನಲ್ಲಿ ನಡೆಯಲಿರುವ ಕೊನೇ ಪಂದ್ಯದಲ್ಲಿ ಆರ್​ಸಿಬಿ ಗೆಲ್ಲಲಿದೆಯೇ? ಎಂಬುದನ್ನು ಸದ್ಯ ಕಾದು ನೋಡಬೇಕಿದೆ.

​