ಹೆಸರು ಬದಲಾಗಲ್ಲ, ಆರ್​ಸಿಬಿ ನಮಗೂ ಇಷ್ಟ: ಹೊಸ ಮಾಲೀಕ ಆರ್ಯಮಾನ್​ ಬಿರ್ಲಾ ಸ್ಪಷ್ಟನೆ

ನವದೆಹಲಿ: ವಿಶ್ವದ ಶ್ರೀಮಂತ ಟಿ20 ಲೀಗ್​ ಐಪಿಎಲ್​ (IPL) ಟೂರ್ನಿಯ ಸತತ 2 ಬಾರಿಯ ಚಾಂಪಿಯನ್​ ರಾಯಲ್​ ಚಾಲೆಂಜರ್ಸ್​ ಬೆಂಗಳೂರು (RCB) ಈಗ ಹೊಸ ಮಾಲೀಕರ ಕೈಸೇರಿದೆ. ಇದರಿಂದ ತಂಡದ ಹೆಸರು ಬದಲಾಗುವುದೇ ಎಂಬ ಬಗ್ಗೆ ಅಭಿಮಾನಿಗಳಲ್ಲಿ ಅನುಮಾನ ಮೂಡಿತ್ತು. ಈ ಬಗ್ಗೆ ತಂಡದ ಹೊಸ ಮಾಲೀಕ ಆರ್ಯಮಾನ್​ ಬಿರ್ಲಾ ಸಂದರ್ಶನವೊಂದರಲ್ಲಿ ಸ್ಪಷ್ಟನೆ ನೀಡಿದ್ದು, ತಂಡದ ಹೆಸರು ಬದಲಾವಣೆಯ ಸಾಧ್ಯತೆಯನ್ನು ಸಂಪೂರ್ಣವಾಗಿ ತಳ್ಳಿಹಾಕಿದ್ದಾರೆ.

"ರಾಯಲ್​ ಚಾಲೆಂಜರ್ಸ್​ ಬೆಂಗಳೂರು- ಈ ಹೆಸರು ಬದಲಾಗುವುದಿಲ್ಲ. ಇದೊಂದು ದೊಡ್ಡ ಬ್ರ್ಯಾಂಡ್​ ಮತ್ತು ನಮಗೂ ಈ ಹೆಸರು ಇಷ್ಟ. ತಂಡದ ಹೆಸರು ಬದಲಾಯಿಸುವ ಯಾವ ಯೋಚನೆಯೂ ನಮಗಿಲ್ಲ' ಎಂದು ಆರ್​ಸಿಬಿ ಫ್ರಾಂಚೈಸಿಯ ಹೊಸ ಚೇರ್ಮನ್​ ಆರ್ಯಮಾನ್​ ಬಿರ್ಲಾ ಹೇಳಿದ್ದಾರೆ. ಆರ್​ಸಿಬಿ ತಂಡ ಕಳೆದ ಮಾರ್ಚ್​ನಲ್ಲಿ ಆದಿತ್ಯಾ ಬಿರ್ಲಾ ಗ್ರೂಪ್​ ಒಳಗೊಂಡ ವಾಣಿಜ್ಯ ಒಕ್ಕೂಟಕ್ಕೆ 16,660 ಕೋಟಿ ರೂ. ಮೊತ್ತಕ್ಕೆ ಮಾರಾಟವಾಗಿತ್ತು.

ಮಾಜಿ ಕ್ರಿಕೆಟಿಗರೂ ಆಗಿರುವ ಆರ್ಯಮಾನ್​ ಬಿರ್ಲಾ ದೇಶೀಯ ಕ್ರಿಕೆಟ್​ನಲ್ಲಿ ಮಧ್ಯಪ್ರದೇಶ ಪರ ಆಡಿದ್ದರು ಮತ್ತು ಐಪಿಎಲ್​ನಲ್ಲಿ ರಾಜಸ್ಥಾನ ರಾಯಲ್ಸ್​ ತಂಡದ ಆಟಗಾರರಾಗಿದ್ದರು. ಮೊದಲ ಆವೃತ್ತಿಯಿಂದಲೂ ಐಪಿಎಲ್​ ಭಾಗವಾಗಿರುವ ಆರ್​ಸಿಬಿ ತಂಡದ ಮಾಲೀಕತ್ವ 3ನೇ ಬಾರಿ ಬದಲಾಗುತ್ತಿದ್ದರೂ ತಂಡದ ಹೆಸರು ಮಾತ್ರ ಹಾಗೆಯೇ ಮುಂದುವರಿಯಲಿರುವುದು ಖಚಿತಗೊಂಡಿದೆ. ಆರ್​ಸಿಬಿ ಮೊದಲಿಗೆ ಕರ್ನಾಟಕದ ಉದ್ಯಮಿ ವಿಜಯ್​ ಮಲ್ಯ ಒಡೆತನದಲ್ಲಿತ್ತು. ನಂತರ ಬ್ರಿಟನ್​ ಮೂಲದ ಯುನೈಟೆಡ್​ ಸ್ಪಿರಿಟ್ಸ್​ ಕಂಪನಿಯ ಮಾಲೀಕತ್ವಕ್ಕೆ ಒಳಪಟ್ಟಿತ್ತು.