ಆರ್​ಸಿಬಿಗೆ ಇಂದು ಕೆಕೆಆರ್​ ಚಾಲೆಂಜ್; ರಾಯ್ಪುರದಲ್ಲೇ​ ಪ್ಲೇಆಫ್​ ಒಲಿಸಿಕೊಳ್ಳುವ ತವಕ

ಆರ್​ಸಿಬಿ ಬೌಲಿಂಗ್​ ವಿಭಾಗ ಬಲಿಷ್ಠವಾಗಿದ್ದರೂ, ಕಳೆದ ಕೆಲ ಪಂದ್ಯಗಳಿಂದ ಬ್ಯಾಟಿಂಗ್​ ವಿಭಾಗ ಕೈಕೊಡುತ್ತಿದೆ. ಮುಂಬೈ ವಿರುದ್ಧದ ಕಳೆದ ಪಂದ್ಯದಲ್ಲಂತೂ ಎಲ್ಲ ಪ್ರಮುಖ ಬ್ಯಾಟರ್​ಗಳೂ ಕೈಕೊಟ್ಟಿದ್ದರು. ಕೃನಾಲ್​ ಪಾಂಡ್ಯ ಅರ್ಧಶತಕ ಮತ್ತು ಭುವನೇಶ್ವರ್​ ನಿರ್ಣಾಯಕ ಸಿಕ್ಸರ್​ ಸಿಡಿಸದಿದ್ದರೆ ಆರ್​ಸಿಬಿ 166 ರನ್​ಗಳ ಸ್ಪರ್ಧಾತ್ಮಕ ಮೊತ್ತವನ್ನು ಚೇಸಿಂಗ್​ ಮಾಡುವಲ್ಲಿ ಎಡವುತಿತ್ತು. ಜಿತೇಶ್​ ಶರ್ಮ, ಜೇಕಬ್​ ಬೆಥೆಲ್​ ಈಗಾಗಲೆ ರನ್​ ಗಳಿಸಲು ಪರದಾಡುತ್ತಿದ್ದರೆ, ನಾಯಕ ರಜತ್​ ಪಾಟೀದಾರ್​ ಕೂಡ ಇದೇ ಸಾಲಿಗೆ ಸೇರಿರುವ ಲಕ್ಷ ಕಾಣಿಸಿದೆ. ಕಳೆದ 6 ಇನಿಂಗ್ಸ್​ಗಳಲ್ಲಿ ಅವರು 1 ಅರ್ಧಶತಕವನ್ನಷ್ಟೇ ಗಳಿಸಿದ್ದಾರೆ. 

ಆರಂಭಿಕ 6 ಪಂದ್ಯಗಳಲ್ಲಿ ಗೆಲುವು ಕಾಣದ ಕೆಕೆಆರ್​ ಇದೀಗ ಸತತ 4 ಜಯದೊಂದಿಗೆ ಪುಟಿದೆದ್ದಿದ್ದು, ಪ್ರಮುಖವಾಗಿ ಬೌಲರ್​ಗಳ ಬಲಿಷ್ಠ ನಿರ್ವಹಣೆಯೇ ಗೆಲುವಿನಲ್ಲಿ ಪ್ರಮುಖ ಪಾತ್ರ ವಹಿಸಿದೆ. ಕಳೆದ 4 ಪಂದ್ಯಗಳಲ್ಲೂ ಎದುರಾಳಿಯನ್ನು 170ರ ಗಡಿ ದಾಟಲು ಬಿಡದ ಕೆಕೆಆರ್​ ಬೌಲಿಂಗ್​ ವಿಭಾಗ ರಾಯ್ಪುರದ ದೊಡ್ಡ ಮೈದಾನದಲ್ಲಿ ಆರ್​ಸಿಬಿ ಬ್ಯಾಟರ್​ಗಳಿಗೆ ಇನ್ನಷ್ಟು ಕಠಿಣ ಸವಾಲೊಡ್ಡಲಿದೆ. ದೇಶೀಯ ವೇಗಿಗಳ ಜತೆಗೆ ವರುಣ್​ ಚಕ್ರವರ್ತಿ&ಸುನೀಲ್​ ನಾರಾಯಣ್​ ಸ್ಪಿನ್​ ಜೋಡಿ ಕೆಕೆಆರ್​ಗೆ ಬಲ ತುಂಬಿದೆ. ಆರ್​ಸಿಬಿ ಕೂಡ ಬಲಿಷ್ಠ ಬೌಲಿಂಗ್​ ಹೊಂದಿರುವುದರಿಂದ ಇದು ಬೌಲರ್​ಗಳ ಪಂದ್ಯವಾಗುವ ನಿರೀಕ್ಷೆ ಇದೆ.

ಆರ್​ಸಿಬಿ: ಇದುವರೆಗೆ ಆಡಿರುವ 11 ಪಂದ್ಯಗಳಲ್ಲಿ 7 ಜಯದೊಂದಿಗೆ 14 ಅಂಕ ಕಲೆಹಾಕಿರುವ ಆರ್​ಸಿಬಿ, ಉಳಿದ 3 ಪಂದ್ಯಗಳಲ್ಲಿ ಒಂದರಲ್ಲಿ ಗೆದ್ದರೂ ಪ್ಲೇಆಫ್​ ಸ್ಥಾನ ಒಲಿಸಿಕೊಳ್ಳಬಹುದು. ಉತ್ತಮ ರನ್​ರೇಟ್​ ಕೂಡ ಆರ್​ಸಿಬಿಗೆ ಪ್ಲಸ್​ ಪಾಯಿಂಟ್​ ಆಗಿದೆ. ಎದುರಾಳಿ ನೆಲದ ಕೊನೇ 2 ಪಂದ್ಯಗಳಲ್ಲಿ ಆರ್​ಸಿಬಿ, ಪಂಜಾಬ್​ (ಮೇ 17) ಮತ್ತು ಸನ್​ರೈಸರ್ಸ್​ (ಮೇ 22) ವಿರುದ್ಧ ಆಡಲಿದೆ. ಇನ್ನೆರಡು ಪಂದ್ಯ ಗೆದ್ದರೆ ಅಗ್ರ 2ರಲ್ಲಿ ಸ್ಥಾನ ಉಳಿಸಿಕೊಳ್ಳಬಹುದಾದ ಅವಕಾಶವೂ ಇದೆ. 

ಕೆಕೆಆರ್​: ಇದುವರೆಗೆ ಆಡಿರುವ 10 ಪಂದ್ಯಗಳಲ್ಲಿ 4ರಲ್ಲಿ ಮಾತ್ರ ಗೆದ್ದಿದ್ದರೂ, ಕೆಕೆಆರ್​ಗೆ ಪ್ಲೇಆಫ್​ ಆಸೆ ಜೀವಂತವಿದೆ. ಉಳಿದ 4ರಲ್ಲೂ ಗೆದ್ದರೆ ಕೆಕೆಆರ್​ ಪ್ಲೇಆ್​ಗೇರುವುದು ಖಚಿತ. ಈ ಪಂದ್ಯದ ನಂತರ ಕೊನೇ 3 ಪಂದ್ಯಗಳನ್ನು ತನ್ನ ತವರಾದ ಈಡನ್​ ಗಾರ್ಡನ್ಸ್​ನಲ್ಲೇ ಗುಜರಾತ್​ (ಮೇ 16), ಮುಂಬೈ (ಮೇ 20) ಮತ್ತು ಡೆಲ್ಲಿ (ಮೇ 24) ವಿರುದ್ಧ ಆಡುವ ಅನುಕೂಲವೂ ಇದೆ. ಆದರೆ ರನ್​ರೇಟ್​ ಹಿನ್ನಡೆಯಿಂದಾಗಿ ಉಳಿದ 4ರಲ್ಲಿ ಒಂದರಲ್ಲಿ ಸೋತರೂ, ಅವಕಾಶ ತಪ್ಪಬಹುದು.

*14: ವಿರಾಟ್​ ಕೊಹ್ಲಿ ಇನ್ನು 78 ರನ್​ ಗಳಿಸಿದರೆ ಟಿ20 ಕ್ರಿಕೆಟ್​ನಲ್ಲಿ 14 ಸಾವಿರ ರನ್​ ಪೂರೈಸಿದ ಮೊದಲ ಭಾರತೀಯ ಮತ್ತು ವಿಶ್ವದ 6ನೇ ಬ್ಯಾಟರ್​ ಎನಿಸಲಿದ್ದಾರೆ.