ನಾನೇನಾದರೂ ಕೋಚ್​ ಆಗಿದ್ದರೆ ಗಂಭೀರ್ ರೀತಿ ನಾಟಕ ಮಾಡುತ್ತಿರಲಿಲ್ಲ: ಗೌತಿ ವಿರುದ್ಧ ರವಿಶಾಸ್ತ್ರಿ ಕಿಡಿ! Ravi Shastri

ನವದೆಹಲಿ : ಟೀಮ್​ ಇಂಡಿಯಾದ ಮಾಜಿ ಮುಖ್ಯ ಕೋಚ್ ರವಿಶಾಸ್ತ್ರಿ ( Ravi Shastri ) ಅವರು ಹಾಲಿ ಕೋಚ್​ ಗೌತಮ್ ಗಂಭೀರ್ ಅವರನ್ನು ಟೀಕಿಸಿದ್ದಾರೆ. ನಾನೇನಾದರೂ ಕೋಚ್​ ಆಗಿದ್ದರೆ ಸೋಲಿನ ಹೊಣೆಯನ್ನು ನಾನೇ ಹೊರುತ್ತಿದ್ದೆ ಹೊರತು ಗಂಭೀರ್​ ರೀತಿ ನಾಟಕ ಮಾಡುತ್ತಿರಲಿಲ್ಲ ಎಂದಿದ್ದಾರೆ.

ದಕ್ಷಿಣ ಆಫ್ರಿಕಾ ವಿರುದ್ಧದ ಟೆಸ್ಟ್ ಸರಣಿಯನ್ನು ಟೀಂ ಇಂಡಿಯಾ 0-2 ಅಂತರದಿಂದ ಸೋತಿತು. ಈ ಕುರಿತು ಇದೇ ಮೊದಲ ಬಾರಿಗೆ ಮಾಜಿ ಕೋಚ್ ರವಿಶಾಸ್ತ್ರಿ ಪ್ರತಿಕ್ರಿಯಿಸಿದ್ದಾರೆ. ಈ ವಿಷಯದಲ್ಲಿ ನಾನು ಗೌತಮ್ ಗಂಭೀರ್ ಅವರನ್ನು ಬೆಂಬಲಿಸುವುದೇ ಇಲ್ಲ ಎಂದಿದ್ದಾರೆ. ಈ ಸೋಲಿಗೆ ಗೌತಮ್ ಗಂಭೀರ್ ಅವರು 100 ರಷ್ಟು ಜವಾಬ್ದಾರರಾಗಿರಬೇಕು ಎಂದು ರವಿಶಾಸ್ತ್ರಿ ಹೇಳಿದ್ದಾರೆ.

ದಕ್ಷಿಣ ಆಫ್ರಿಕಾ ವಿರುದ್ಧದ ಟೆಸ್ಟ್​ ಸರಣಿಯಲ್ಲಿ ಟೀಮ್ ಇಂಡಿಯಾ ವೈಟ್‌ವಾಶ್‌ಗೆ ಗೌತಮ್ ಗಂಭೀರ್ ಅವರೇ ಸಂಪೂರ್ಣ ಹೊಣೆಗಾರರು. ಇದಕ್ಕೆ ಟೀಮ್ ಇಂಡಿಯಾ ಆಟಗಾರರನ್ನು ದೂಷಿಸುವ ಅಗತ್ಯವಿಲ್ಲ. ಗಂಭೀರ್ ಅವರ ಸ್ಥಾನದಲ್ಲಿ ನಾನಿದ್ದಿದ್ದರೆ, ಸೋಲಿನ ಜವಾಬ್ದಾರಿಯನ್ನು ನಾನೇ ತೆಗೆದುಕೊಳ್ಳುತ್ತಿದ್ದೆ. ಏಕೆಂದರೆ, ವಾಸ್ತವದಲ್ಲಿ, ಟೀಮ್ ಇಂಡಿಯಾ ಅಷ್ಟು ಕೆಟ್ಟದಾಗಿಲ್ಲ. ಪ್ರಸ್ತುತ ಟೀಮ್​ ಇಂಡಿಯಾ ಬಲಿಷ್ಠವಾಗಿದೆ ಎನ್ನುವ ಮೂಲಕ ಗಂಭೀರ್​ ಅವರನ್ನು ರವಿಶಾಸ್ತ್ರಿ ಟೀಕಿಸಿದರು.

ಟೀಮ್ ಇಂಡಿಯಾ ಆಟಗಾರರು ಉತ್ತಮವಾಗಿ ಕಾರ್ಯನಿರ್ವಹಿಸುತ್ತಿದ್ದಾರೆ. ಆದರೆ, ಬ್ಯಾಟಿಂಗ್ ಕ್ರಮಾಂಕದಲ್ಲಿನ ಬದಲಾವಣೆಗಳು ಮತ್ತು ಕೆಲವು ಸಣ್ಣ ತಪ್ಪುಗಳಿಂದಾಗಿ ಟೀಮ್ ಇಂಡಿಯಾ ಸೋಲುತ್ತಿದೆ. ನಮ್ಮ ಗುವಾಹಟಿಯಲ್ಲಿ ನೂರು ರನ್‌ಗಳಿಗೆ ಒಂದು ವಿಕೆಟ್ ಬಿದ್ದಿತು. ನಂತರ ಟೀಮ್ ಇಂಡಿಯಾ 130 ರನ್‌ಗಳನ್ನು ತಲುಪಿದಾಗ 7 ವಿಕೆಟ್‌ಗಳನ್ನು ಕಳೆದುಕೊಂಡಿತು. ಹೀಗಾಗಿ, ಆಟಗಾರರು ಹೆಚ್ಚಿನ ಜವಾಬ್ದಾರಿಯಿಂದ ಆಡಿದರೆ ಪರಿಸ್ಥಿತಿ ವಿಭಿನ್ನವಾಗಿರುತ್ತದೆ ಎಂದು ರವಿಶಾಸ್ತ್ರಿ ಅವರು ಇದೇ ಸಂದರ್ಭದಲ್ಲಿ ಸಲಹೆ ನೀಡಿದರು. ಅಲ್ಲದೆ, ಗಂಭೀರ್ ಕೂಡ ಟೀಮ್ ಇಂಡಿಯಾ ಆಟಗಾರರಿಗೆ ಮಾರ್ಗದರ್ಶನ ನೀಡುವ ಜವಾಬ್ದಾರಿಯನ್ನು ಹೊಂದಿದ್ದಾರೆ ಎಂದರು.

ಒಂದು ವೇಳೆ ರವಿಶಾಸ್ತ್ರಿ ಅವರಿಗೆ ಕೋಚ್ ಜವಾಬ್ದಾರಿಯನ್ನು ನೀಡದಿದ್ದರೆ, ಮಹೇಂದ್ರ ಸಿಂಗ್ ಧೋನಿಯಂತಹವರಿಗೆ ಆ ಜವಾಬ್ದಾರಿಯನ್ನು ನೀಡಬೇಕೆಂದು ಟೀಮ್​ ಇಂಡಿಯಾದ ಅಭಿಮಾನಿಗಳು ಒತ್ತಾಯಿಸುತ್ತಿದ್ದಾರೆ, (ಏಜೆನ್ಸೀಸ್​).