ಇದೇ ಕಾರಣಕ್ಕೆ ನನಗೆ ಸಿಟ್ಟು! ಯುವ ವೇಗಿ ಬೆನ್ನಿಗೆ ನಿಂತ ಅಶ್ವಿನ್​; ಗೌತಿ ವಿರುದ್ಧ ಕೆಂಡಾಮಂಡಲ | IND vs NZ ODI

ನವದೆಹಲಿ: ಪ್ರಸಕ್ತ ನಡೆಯುತ್ತಿರುವ ನ್ಯೂಜಿಲೆಂಡ್ ವಿರುದ್ಧದ ಮೂರು ಪಂದ್ಯಗಳ ಏಕದಿನ ಸರಣಿಯಲ್ಲಿ ಟೀಮ್ ಇಂಡಿಯಾ ಒಂದು ಪಂದ್ಯ ಗೆದ್ದರೆ, ಕಿವೀಸ್ ಪಡೆ ಕೂಡ ಒಂದು ಪಂದ್ಯ ಗೆದ್ದಿದೆ. ಅಲ್ಲಿಗೆ, ಎರಡೂ ತಂಡಗಳು ಸರಣಿಯಲ್ಲಿ 1-1 ಅಂತರ ಕಾಯ್ದುಕೊಂಡಿದೆ.

ಮೊದಲೆರೆಡು ಪಂದ್ಯಗಳಿಂದ ಯುವ ವೇಗಿ ಅರ್ಷದೀಪ್​ ಸಿಂಗ್​ಗೆ ತಂಡದಲ್ಲಿ ಸ್ಥಾನ ಕೊಡದ ಹೆಡ್ ಕೋಚ್ ಗೌತಮ್ ಗಂಭೀರ್ ನೇತೃತ್ವದ ಟೀಮ್ ಮ್ಯಾನೇಜ್​ಮೆಂಟ್​ ವಿರುದ್ಧ ಇದೀಗ ಟೀಮ್ ಇಂಡಿಯಾ ಮಾಜಿ ಸ್ಪಿನ್ನರ್ ಆರ್​.ಅಶ್ವಿನ್​ ತೀವ್ರ ಕಿಡಿಕಾರಿದ್ದಾರೆ. ಮೂರನೇ ಹಾಗೂ ಕೊನೆಯ ನಿರ್ಣಾಯಕ ಪಂದ್ಯದಲ್ಲಿ ಸಿಂಗ್ ಆಡುವ ಸಾಧ್ಯತೆಗಳು ಹೆಚ್ಚಿವೆ ಎಂಬ ಮಾತುಗಳು ಕೇಳಿಬಂದಿದೆ. ಇದರೊಟ್ಟಿಗೆ ಹಲವರು ಅವರನ್ನು ಆಡಿಸುವುದು ಉತ್ತಮ ಎಂಬ ಸಲಹೆಗಳನ್ನು ನೀಡಿದ್ದಾರೆ. ಈ ಮಧ್ಯೆ, ಅರ್ಷದೀಪ್​ ಪರ ಬ್ಯಾಟ್​ ಬೀಸಿರುವ ಅಶ್ವಿನ್​, ಟೀಮ್ ಮ್ಯಾನೇಜ್​ಮೆಂಟ್​ ನಡೆಗೆ ಭಾರೀ ಅಸಮಾಧಾನ ಹೊರಹಾಕಿದ್ದಾರೆ. ​

"ಅರ್ಷದೀಪ್​ ಸಿಂಗ್​ನ ಈ ರೀತಿ ಮೂಲೆಯಲ್ಲಿ ಕೂರಿಸುವುದು ಸರಿಯಲ್ಲ. ಇದರಿಂದ ಅವರು ಲಯ ಕಳೆದುಕೊಳ್ಳುವ ಸಾಧ್ಯತೆಗಳು ಹೆಚ್ಚು. ಇಲ್ಲಿ ಬೌಲರ್​ಗಳ ನಡುವೆಯೇ ಪೈಪೋಟಿ ನಡೆಯುತ್ತಿದೆ. ಯಾಕಿಲ್ಲಿ, ಅರ್ಷದೀಪ್​ ಸಿಂಗ್​ ಸ್ಥಾನದಲ್ಲಿ ನಿಂತು ಅವರ ಪರಿಸ್ಥಿತಿಯನ್ನು ಅರ್ಥ ಮಾಡಿಕೊಳ್ಳುತ್ತಿಲ್ಲ? ಆತ ಎಷ್ಟು ಪಂದ್ಯಳನ್ನಾಡಿದ್ದಾನೆ ಅಥವಾ ಆಡಿಲ್ಲ ಎಂಬುದು ನಮ್ಮ ಪ್ರಶ್ನೆಯಲ್ಲ. ಈ ರೀತಿ ತಂಡದಲ್ಲಿ ಸ್ಥಾನ ಕೊಡದೆ ಬದಿಗಿಡುವುದು ಒಪ್ಪುವಂತದ್ದಲ್ಲ" ಎಂದಿದ್ದಾರೆ.

"ತನ್ನ ಸಾಮರ್ಥ್ಯವನ್ನು ಈಗಾಗಲೇ ಪ್ರದರ್ಶಿಸಿ, ಸಾಬೀತುಪಡಿಸಿರುವ ವೇಗಿ ಈತ. ತಂಡಕ್ಕೆ ಹೆಚ್ಚೆಚ್ಚು ಕೊಡುಗೆ ನೀಡಿದ್ದಾನೆ. ಇಷ್ಟಾದರೂ ಸಹ ತಂಡದಲ್ಲಿ ಸ್ಥಾನ ಗಿಟ್ಟಿಸಿಕೊಳ್ಳಲು ಆತ ಇಂದಿಗೂ ಪರದಾಡುವಂತಿದೆ. ನೀವೇನಾದರೂ ಹೇಳಿ, ಕ್ರಿಕೆಟ್​ ಒಂದು ಆತ್ಮವಿಶ್ವಾಸದ ಆಟ. ಹೀಗೆ ಮಾಡುವುದರಿಂದ ಆತನ ಆತ್ಮವಿಶ್ವಾಸ ಕುಗ್ಗುತ್ತದೆ. ಪ್ರತಿ ಬಾರಿ ಬೌಲರ್​ಗಳಿಗೇ ಏಕೆ? ಬ್ಯಾಟರ್​ಗಳಿಗೆ ಏಕಿಂತ ಸಮಸ್ಯೆ ಕಾಡಲ್ಲ" ಎಂದು ಅಶ್ವಿನ್​ ತಮ್ಮ ಯೂಟ್ಯೂಬ್​ ಚಾನೆಲ್​ನಲ್ಲಿ ಟೀಮ್ ಮ್ಯಾನೇಜ್​ಮೆಂಟ್​ ವಿರುದ್ಧ ಕಿಡಿಕಾರಿದ್ದಾರೆ,(ಏಜೆನ್ಸೀಸ್).