ಪಿಎಸ್​ಎಲ್ ಬಿಟ್ಟು ಐಪಿಎಲ್​... ಪಾಕಿಸ್ತಾನ ಟಿ20 ಲೀಗ್​ ಬಗ್ಗೆ ಶೋಯೆಬ್ ಅಖ್ತರ್ ಸ್ಫೋಟಕ ಹೇಳಿಕೆ ​

IPL: ಐಪಿಎಲ್​ 19ನೇ ಆವೃತ್ತಿಗೆ ಇನ್ನೇನು ಕೆಲವೇ ದಿನಗಳು ಬಾಕಿ ಉಳಿದಿದ್ದು, ಕ್ರಿಕೆಟ್​ ಪ್ರಿಯರಿಗಂತು ಭರಪೂರ ಮನರಂಜನೆ ಫಿಕ್ಸ್ ಆಗಿದೆ. ಇದೇ ಮಾ.18ರಿಂದ ಶುರುವಾಗಲಿರುವ ಬಹು ಜನಪ್ರಿಯ ಟಿ20 ಲೀಗ್​ಗೆ ದೊಡ್ಡ ಸಂಖ್ಯೆಯ ಅಭಿಮಾನಿ ಬಳಗವೇ ಇದೆ. ಕ್ರಿಕೆಟ್​ ಜಗತ್ತಿನಲ್ಲಿ ನಡೆಯುವ ಯಾವುದೇ ಟಿ20 ಲೀಗ್​ಗೂ ಈ ಮಟ್ಟಿಗಿನ ಅಭಿಮಾನ ಮತ್ತು ಕ್ರೇಜ್​ ಇಲ್ಲವೇ ಇಲ್ಲ ಎಂಬುದು ನಿಜಕ್ಕೂ ಗಮನಾರ್ಹ.

ಕೇವಲ ಮನರಂಜನೆಯಲ್ಲಿ ಮಾತ್ರವಲ್ಲ, ಪ್ರತಿ ವರ್ಷ ಅತಿ ಹೆಚ್ಚು ವೀಕ್ಷಣೆ, ಟಿಕೆಟ್​ ಖರೀದಿ ಮತ್ತು ಲಾಭದ ಹೊಳೆಯನ್ನೇ ನೋಡುವ ಇಂಡಿಯನ್​ ಪ್ರೀಮಿಯರ್​ ಲೀಗ್​, ಪಾಕಿಸ್ತಾನವನ್ನು ಹೊರತುಪಡಿಸಿ ಇನ್ನುಳಿದ ದೇಶಗಳ ಕ್ರಿಕೆಟ್​ ಆಟಗಾರರನ್ನು ತನ್ನ ಫ್ರಾಂಚೈಸಿಗೆ ಆಯ್ಕೆ ಮಾಡಿಕೊಳ್ಳುತ್ತದೆ. ದುಬಾರಿ ಹಣಕ್ಕೆ ಬಿಡ್​ ಆಗುವ ವಿದೇಶಿಯ ಸ್ಟಾರ್ ಕ್ರಿಕೆಟಿಗರು, ಐಪಿಎಲ್​ನಲ್ಲಿ ಉತ್ತಮ ಪ್ರದರ್ಶನ ಮೂಲಕ ಹೆಚ್ಚಿನ ಜನಪ್ರಿಯತೆ ಗಳಿಸುವುದು ಡಬಲ್​ ಧಮಾಕಾ ಎಂದೇ ಹೇಳಬಹುದು. ಇದನ್ನೆಲ್ಲ ದೂರದಿಂದಲೇ ನೋಡಿ ಉರಿದುಬೀಳುವ ಪಾಕಿಸ್ತಾನಕ್ಕೆ, ಸಪ್ಪೆ ಮುಖ ಬಿಟ್ಟರೆ ಬೇರೇನೂ ಉಳಿದಿಲ್ಲ.  

2008ರಲ್ಲಿ ಮುಂಬೈನ ತಾಜ್​ ಹೋಟೆಲ್​ ಮೇಲಿನ ಪಾಕ್​ ಉಗ್ರರ ದಾಳಿಯನ್ನು ಖಂಡಿಸಿ, ಬಿಸಿಸಿಐ ಪಾಕ್​ ಕ್ರಿಕೆಟಿಗರನ್ನು ಐಪಿಎಲ್​ನಿಂದ ಹೊರಗಿಟ್ಟಿತು. ಅಂದಿನಿಂದ, ಭಾರತದ ಮೇಲೆ ಕಿಡಿಕಾರುತ್ತಲೇ ಇದ್ದ ಪಾಕಿಸ್ತಾನ ಕ್ರಿಕೆಟ್​ ಮಂಡಳಿ, ಐಪಿಎಲ್​ಗೆ ಟಕ್ಕರ್​ ಕೊಡಲು ಪಿಎಸ್​ಎಲ್​ ಅನ್ನು ಪ್ರಾರಂಭಿಸಿತು. ಆದರೆ, ಭಾರತದಷ್ಟು ಜನಪ್ರಿಯತೆ, ಲಾಭ ಮತ್ತು ಆಟಗಾರರ ಲಭ್ಯತೆ ತಮ್ಮ ಲೀಗ್​ಗೆ ಸಿಗುತ್ತಿಲ್ಲ ಎಂಬ ಹೊಟ್ಟೆಕಿಚ್ಚು ಪಾಕ್​ ಆಟಗಾರರಿಗೆ ಸದಾ ಕಾಡುತ್ತಲೇ ಇರುತ್ತದೆ. ಇದಕ್ಕೆ ಸಾಕ್ಷಿ, ಇತ್ತೀಚೆಗೆ ಮಾಜಿ ಕ್ರಿಕೆಟಿಗ ಶೋಯೆಬ್ ಅಖ್ತರ್​ ಶಾಕಿಂಗ್ ಹೇಳಿಕೆ.       ​    

"ಪ್ರಾಮಾಣಿಕವಾಗಿ ಹೇಳಬೇಕೆಂದರೆ, ಆಟಗಾರರು ಪಿಎಸ್‌ಎಲ್ ತೊರೆದು ಐಪಿಎಲ್‌ಗೆ ಸೇರುತ್ತಿರುವ ರೀತಿ ನೋಡಿದರೆ, ಪಿಎಸ್‌ಎಲ್ ಇನ್ನೂ ಎಷ್ಟು ದಿನ ಉಳಿಯಲು ಸಾಧ್ಯ ಎಂದು ಅನಿಸಿದೆ. ಇದು ಹೀಗೇ ಮುಂದುವರಿದರೆ, ಪಿಎಸ್‌ಎಲ್ ಶೀಘ್ರದಲ್ಲೇ ಅಂತ್ಯಗೊಳ್ಳಲಿದೆ. ಏಕೆಂದರೆ, ಲೋಕಲ್​ ಪ್ಲೇಯರ್​ಗಳ ಆಟವನ್ನು ನೋಡಲು ಯಾರೂ ಬಯಸುವುದಿಲ್ಲ. ಕ್ರಿಕೆಟ್​ ಪ್ರಿಯರನ್ನು ಆಕರ್ಷಿಸಲು ನಮ್ಮಲ್ಲಿ ಆಂತಹ ಗುಣಮಟ್ಟದ ಪ್ರತಿಭೆಗಳು ಇಲ್ಲ" ಎಂದಿದ್ದಾರೆ.