ಬಿರುಗಾಳಿಗೆ ಹಾರಿಬಿದ್ದ ಸಿಬ್ಬಂದಿ, 5 ನಿಮಿಷದ ಮಳೆಗೆ ಚರಂಡಿಯಂತಾದ ಗಡಾಫಿ: PSL ಅವಾಂತರ ಒಂದೆರಡಲ್ಲ! PSL 2026

PSL 2026 : ಭಾರತದಲ್ಲಿ ವಿಶ್ವ ವಿಖ್ಯಾತಿ ಇಂಡಿಯನ್​ ಪ್ರೀಮಿಯರ್​ ಲೀಗ್ ( IPL ) ನಡೆಯುತ್ತಿದ್ದರೆ, ಪಾಕಿಸ್ತಾನದಲ್ಲಿ ಐಪಿಎಲ್​ ಖ್ಯಾತಿಯನ್ನು​ ಹಿಂದಿಕ್ಕಲು ಹೆಣಗಾಡುತ್ತಿರುವ ಪಾಕಿಸ್ತಾನ ಸೂಪರ್ ಲೀಗ್ ನಡೆಯುತ್ತಿದೆ. ಮಾರ್ಚ್ 26 ರಂದು ಪ್ರಾರಂಭವಾದ ಪಿಎಸ್​ಎಲ್​, ಅಭಿಮಾನಿಗಳಿಲ್ಲದೆ ನಡೆಯುತ್ತಿದೆ. ಇತ್ತೀಚೆಗೆ, ಈ ಟೂರ್ನಮೆಂಟ್‌ಗೆ ಮಳೆ ಅಡ್ಡಿಯಾಯಿತು. ಈ ವೇಳೆ ನಡೆದ ಒಂದು ಘಟನೆ ಸಾಮಾಜಿಕ ಜಾಲತಾಣದಲ್ಲಿ ವೈರಲ್​ ಆಗಿದೆ.

ಪಾಕಿಸ್ತಾನ ಸೂಪರ್ ಲೀಗ್​ನಲ್ಲಿ ಈಗಾಗಲೇ ಆರು ಪಂದ್ಯಗಳು ಪೂರ್ಣಗೊಂಡಿದೆ. ಈ ಟೂರ್ನಮೆಂಟ್ ಪ್ರಾರಂಭವಾದಾಗಿನಿಂದ ಒಂದಲ್ಲ ಒಂದು ವಿವಾದಗಳು ಟೂರ್ನಿಗೆ ಸುತ್ತಿಕೊಳ್ಳುತ್ತಲೇ ಇದೆ. ಕೇವಲ ಕ್ರಿಕೆಟ್​ಗಿಂತ ವಿವಾದಗಳೇ ಹೆಚ್ಚು ಸದ್ದು ಮಾಡುತ್ತಿದೆ. ಆದರೂ, ಟೂರ್ನಿ ಮುಂದುವರಿದಿದೆ. ನಿನ್ನೆ ಸಂಜೆ ಇಸ್ಲಾಮಾಬಾದ್ ಯುನೈಟೆಡ್ ಮತ್ತು ಪೇಶಾವರ್ ಝಲ್ಮಿ ನಡುವೆ ಗಡಾಫಿ ಕ್ರೀಡಾಂಗಣದಲ್ಲಿ ಪಂದ್ಯ ನಡೆಯಿತು. ಆದರೆ, ಈ ಪಂದ್ಯಕ್ಕೂ ಮುನ್ನ ಮೈದಾನದಲ್ಲಿ ಭಾರಿ ಗಾಳಿ ಆರಂಭವಾಯಿತು. 

ಮಳೆ ಬರುವ ಸೂಚನೆಗಳು ಸಿಕ್ಕ ತಕ್ಷಣ ಗಡಾಫಿ ಕ್ರೀಡಾಂಗಣದ ಸಿಬ್ಬಂದಿಗೆ ಮಾಹಿತಿ ನೀಡಲಾಯಿತು. ಹೀಗಾಗಿ, ಕ್ರೀಡಾಂಗಣದ ಪಿಚ್​ ಅನ್ನು ಸಂಪೂರ್ಣವಾಗಿ ಟಾರ್ಪಲ್​ಗಳಿಂದ ಮಚ್ಚಲಾಯಿತು. ಆದರೆ, ಗಾಳಿಯ ತೀವ್ರತೆ ಮಾತ್ರ ಕಡಿಮೆ ಆಗಲಿಲ್ಲ. ಗಾಳಿ ರಭಸವಾಗಿ ಬೀಸುತ್ತಿದ್ದಂತೆ ಟಾರ್ಪ್​ಗಳನ್ನು ಹಿಡಿದಿದ್ದ ಮೈದಾನದ ಸಿಬ್ಬಂದಿ ಗಾಳಿಯ ರಭಸಕ್ಕೆ ಹಾರಿ ಬಿದ್ದರು. ಈ ಘಟನೆಗೆ ಸಂಬಂಧಿಸಿದ ವಿಡಿಯೋಗಳು ಸಾಮಾಜಿಕ ಜಾಲತಾಣದಲ್ಲಿ ವೈರಲ್​ ಆಗುತ್ತಿವೆ.

ವೈರಲ್​ ವಿಡಿಯೋಗಳನ್ನು ನೋಡಿದ ಕ್ರಿಕೆಟ್ ಅಭಿಮಾನಿಗಳು ಜೋರಾಗಿ ನಗುತ್ತಿದ್ದಾರೆ. ಪಾಕಿಸ್ತಾನ ಸೂಪರ್ ಲೀಗ್‌ ವಿವಾದದಿಂದ ಮಾತ್ರವಲ್ಲ, ಬಿರುಗಾಳಿಯಿಂದಲೂ ಸಖತ್​ ಸುದ್ದಿ ಮಾಡುತ್ತಿದೆ ಎಂದು ಕೆಲವರು ಕಾಮೆಂಟ್ ಮಾಡುತ್ತಿದ್ದಾರೆ. 

ಅಂದಹಾಗೆ, ನಿನ್ನೆ ಸುರಿದ ಕೇವಲ ಐದು ನಿಮಿಷಗಳ ಭಾರೀ ಮಳೆಗೆ ಗಡಾಫಿ ಕ್ರೀಡಾಂಗಣವು ಚರಂಡಿಯಾಗಿ ಮಾರ್ಪಟ್ಟಿತು. ಇದಕ್ಕೆ ಸಂಬಂಧಿಸಿದ ಫೋಟೋ ಮತ್ತು ವಿಡಿಯೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್​ ಆಗುತ್ತಿವೆ. ಮೈದಾನದಲ್ಲಿದ್ದ ನೀರನ್ನು ತೆರವುಗೊಳಿಸಲು ಸಿಬ್ಬಂದಿ ಪರದಾಡಿದರು. ಈ ಕ್ರೀಡಾಂಗಣದಲ್ಲಿ ಕಳಪೆ ಚರಂಡಿ ವ್ಯವಸ್ಥೆ ಇದೆ ಮತ್ತು ಛಾವಣಿಗಳು ಸದಾ ಸೋರುತ್ತಿರುತ್ತವೆ. ಕ್ರೀಡಾಂಗಣದ ಬಹುತೇಕ ಭಾಗ ಹಾನಿಯಾಗಿದೆ. ಇಡೀ ಕ್ರೀಡಾಂಗಣ ಪಾಕ್​ ಆರ್ಥಿಕ ವ್ಯವಸ್ಥೆಗೆ ಹಿಡಿದ ಕನ್ನಡಿಯಾಗಿದೆ. ಹೀಗಾಗಿ ಸಾಮಾಜಿಕ ಜಾಲತಾಣದಲ್ಲಿ ಗಡಾಫಿ ಕ್ರೀಡಾಂಗಣವನ್ನು ಸಿಕ್ಕಾಪಟ್ಟೆ ಟ್ರೋಲ್​ ಮಾಡಲಾಗುತ್ತಿದೆ.