ನವದೆಹಲಿ: ಐಪಿಎಲ್ 19ನೇ ಆವೃತ್ತಿಯ ಉದಯೋನ್ಮುಖ ಆಟಗಾರರ ಪ್ರಶಸ್ತಿ (Emerging Player of the Season award) ರೇಸ್ನಲ್ಲಿರುವ ಯುವ ಕ್ರಿಕೆಟಿಗರ ಪಟ್ಟಿಯನ್ನು ಬಿಸಿಸಿಐ ಬಿಡುಗಡೆಗೊಳಿಸಿದ್ದು, ಆನ್ಲೈನ್ ಮತದಾನದ ಮೂಲಕ ಅವರಲ್ಲಿ ಒಬ್ಬರನ್ನು ಪ್ರಶಸ್ತಿಗೆ ಆರಿಸುವ ಅವಕಾಶವನ್ನೂ ಅಭಿಮಾನಿಗಳಿಗೆ ಕಲ್ಪಿಸಿದೆ.
2000ದ ಏಪ್ರಿಲ್ 1ರ ನಂತರ ಜನಿಸಿರುವವರು, ಅಂತಾರಾಷ್ಟ್ರೀಯ ಕ್ರಿಕೆಟ್ ಆಡದವರು, 25ಕ್ಕಿಂತ ಕಡಿಮೆ ಐಪಿಎಲ್ ಪಂದ್ಯ ಆಡಿರುವವರು ಮತ್ತು ಹಿಂದೆ ಈ ಪ್ರಶಸ್ತಿ ಗೆಲ್ಲದಿರುವವರನ್ನು ಬಿಸಿಸಿಐ ನಾಮನಿರ್ದೇಶನ ಮಾಡಿದೆ. ಐಪಿಎಲ್ ವೆಬ್ಸೈಟ್ನಲ್ಲಿ ಅಭಿಮಾನಿಗಳು ಮತದಾನ ಮಾಡಬಹುದು.
ರಾಜಸ್ಥಾನ ರಾಯಲ್ಸ್ ತಂಡದ ಸ್ಟಾರ್ ವೈಭವ್ ಸೂರ್ಯವಂಶಿ, ಕನ್ನಡಿಗ ಯಶ್ರಾಜ್ ಪೂಂಜಾ, ಪಂಜಾಬ್ನ ಪ್ರಿಯಾಂಶ್ ಆರ್ಯ, ಆರ್ಸಿಬಿಯ ರಸಿಕ್ ದಾರ್, ಸನ್ರೈಸರ್ಸ್ನ ಸಾಕಿಬ್ ಹುಸೈನ್, ಪ್ರಫುಲ್ ಹಿಂಗೆ, ಲಖನೌದ ಪ್ರಿನ್ಸ್ ಯಾದವ್, ಮುಕುಲ್ ಚೌಧರಿ, ಡೆಲ್ಲಿಯ ಸಮೀರ್ ರಿಜ್ವಿ, ಸಿಎಸ್ಕೆಯ ಆಯುಷ್ ಮಹಾತ್ರೆ, ಗುಜರಾತ್ನ ಅಶೋಕ್ ಶರ್ಮ, ಕೆಕೆಆರ್ನ ಅಂಗಕೃಷ್ ರುವಂಶಿ ಪ್ರಶಸ್ತಿ ರೇಸ್ನಲ್ಲಿರುವ ಪ್ರಮುಖರಾಗಿದ್ದಾರೆ.
