ಭಾರತ ಟೆಸ್ಟ್​ ತಂಡದ ಉಪನಾಯಕನ ಹುದ್ದೆಯಿಂದ ರಿಷಭ್​ ಪಂತ್​ ಬಿಡುಗಡೆ?

ರಿಷಭ್​ ಪಂತ್​ ಐಪಿಎಲ್​ನಲ್ಲಿ ಕಳೆದ 2 ಆವೃತ್ತಿಗಳಿಂದ ಲಖನೌ ಸೂಪರ್​ಜೈಂಟ್ಸ್​ ನಾಯಕ ಮತ್ತು ವಿಕೆಟ್​ ಕೀಪರ್​-ಬ್ಯಾಟರ್​ ಆಗಿ ಹೆಚ್ಚಿನ ಯಶಸ್ಸು ಕಂಡಿಲ್ಲ. ಅಲ್ಲದೆ ಕಳೆದ ನವೆಂಬರ್​ನಲ್ಲಿ ದ. ಆಪ್ರಿಕಾ ವಿರುದ್ಧದ ಗುವಾಹಟಿ ಟೆಸ್ಟ್​ನಲ್ಲಿ ಶುಭಮಾನ್​ ಗಿಲ್​ ಗೈರಿನಲ್ಲಿ ನಾಯಕತ್ವ ನಿರ್ವಹಿಸಿದಾಗಲೂ ಅವರ ಕಾರ್ಯತಂತ್ರಗಳು ಹೆಚ್ಚಿನ ಪ್ರಭಾವ ಬೀರಿರಲಿಲ್ಲ.

"ಟೆಸ್ಟ್​ ತಂಡದಲ್ಲಿ ಪಂತ್​ ಬ್ಯಾಟರ್​ ಆಗಿ ಆಕ್ರಮಣಕಾರಿ ಆಟದೊಂದಿಗೆ ಹೆಚ್ಚಿನ ಯಶ ಸಾಧಿಸಿದ್ದಾರೆ. ಆದರೆ ಇದರೊಂದಿಗೆ ಹೆಚ್ಚುವರಿ ಜವಾಬ್ದಾರಿಯನ್ನು ನೀಡಿದಾಗ ಅವರಿಂದ ಅದೇ ರೀತಿಯ ನಿರ್ವಹಣೆ ಬಂದಿಲ್ಲ. ಹೀಗಾಗಿ ಅವರಿಗೆ ಸ್ವತಂತ್ರವಾಗಿ ಆಡುವ ಅವಕಾಶ ಕಲ್ಪಿಸಲು ಇತರೆಲ್ಲ ಜವಾಬ್ದಾರಿಯಿಂದ ಮುಕ್ತಗೊಳಿಸಲು ಆಯ್ಕೆ ಸಮಿತಿ ಬಯಸಿದೆ' ಎಂದು ಬಿಸಿಸಿಐ ಮೂಲಗಳು ತಿಳಿಸಿವೆ.

ಪಂತ್​ ಹಾಲಿ ಬ್ಯಾಟಿಂಗ್​ ಫಾರ್ಮ್​ನಲ್ಲಿ ಏಕದಿನ ತಂಡದಲ್ಲಿ 2ನೇ ವಿಕೆಟ್​ ಕೀಪರ್​ ಆಗಿ ಉಳಿದುಕೊಳ್ಳುವುದು ಕೂಡ ಕಠಿಣವೆನಿಸಿದೆ. ಸಂಜು ಸ್ಯಾಮ್ಸನ್​, ಇಶಾನ್​ ಕಿಶನ್​, ಧ್ರುವ ಜುರೆಲ್​ ಏಕದಿನ ತಂಡದ 2ನೇ ಕೀಪರ್​ ಸ್ಥಾನದ ರೇಸ್​ನಲ್ಲಿದ್ದಾರೆ.