ಇಂಥಾ ಸ್ಥಿತಿ ಬರಬಾರದಿತ್ತು... ಕರಾಚಿ ಏರ್​ಪೋರ್ಟ್​ಗೆ ಬಂದಿಳಿದ ಪಾಕ್​ ಆಟಗಾರರಿಗೆ ಭಾರಿ ಅವಮಾನ! Pakistan Team

Pakistan Team : ಪ್ರತಿಷ್ಠಿತ ಟಿ20 ವಿಶ್ವಕಪ್ ಟೂರ್ನಿಯಿಂದ ಪಾಕಿಸ್ತಾನ ತಂಡ ಹೊರಬಿದ್ದಿರುವುದು ಎಲ್ಲರಿಗು ಗೊತ್ತೇ ಇದೆ. ಶ್ರೀಲಂಕಾ ವಿರುದ್ಧ ನಡೆದ ಸೂಪರ್​ 8 ಪಂದ್ಯದಲ್ಲಿ ಪಾಕಿಸ್ತಾನ ಭಾರಿ ಅಂತರದಿಂದ ಗೆಲ್ಲಬೇಕಿತ್ತು. ಆದರೆ, ಲಂಕಾ ಬ್ಯಾಟ್ಸ್​ಮನ್​ಗಳು ಆ ಅವಕಾಶವನ್ನು ಪಾಕಿಸ್ತಾನಕ್ಕೆ ನೀಡಲಿಲ್ಲ. ಇದರಿಂದಾಗಿ ಪಾಕಿಸ್ತಾನ ತವರಿಗೆ ಹೋಗಬೇಕಾಯಿತು ಮತ್ತು ನ್ಯೂಜಿಲೆಂಡ್ ಸೆಮಿಫೈನಲ್ ತಲುಪಿತು. ಸೋಮವಾರ ಬೆಳಗ್ಗೆ ಕೊಲಂಬೊದಿಂದ ಪಾಕಿಸ್ತಾನ ತಂಡ ಕರಾಚಿ ತಲುಪಿತು. ಆದರೆ, ಕರಾಚಿ ವಿಮಾನ ನಿಲ್ದಾಣದಲ್ಲಿ ಪಾಕಿಸ್ತಾನಿ ಆಟಗಾರರು ಭಾರಿ ಅವಮಾನ ಎದುರಿಸಿದ್ದಾರೆ ಎಂದು ಸಾಮಾಜಿಕ ಜಾಲತಾಣಗಳಲ್ಲಿ ವರದಿಯಾಗಿದೆ.

ವಿಶ್ವಕಪ್‌ನಿಂದ ಹಿಂತಿರುಗಿದ ಪಾಕಿಸ್ತಾನಿ ಆಟಗಾರರನ್ನು ನೋಡಲು ಯಾವೊಬ್ಬ ಅಭಿಮಾನಿಯೂ ಕೂಡ ವಿಮಾನ ನಿಲ್ದಾಣಕ್ಕೆ ಬರಲಿಲ್ಲ. ಪಾಕಿಸ್ತಾನಿ ಕ್ರಿಕೆಟಿಗರು ಸಾಮಾನ್ಯ ಪ್ರಯಾಣಿಕರಂತೆ ವಿಮಾನ ನಿಲ್ದಾಣದಲ್ಲಿ ಇಳಿದು ತಮ್ಮ ಮನೆಗಳಿಗೆ ಹೊರಟರು. ಇದಕ್ಕೆ ಸಂಬಂಧಿಸಿದ ವಿಡಿಯೋ ಸದ್ಯ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗುತ್ತಿದೆ. ಇದನ್ನು ನೋಡಿದ ಟೀಮ್​ ಇಂಡಿಯಾ ಅಭಿಮಾನಿಗಳು ಪಾಕ್​ ಆಟಗಾರರನ್ನು ಟ್ರೋಲ್​ ಮಾಡುತ್ತಿದ್ದಾರೆ.

ಪಾಕಿಸ್ತಾನ ತಂಡವು ಸೂಪರ್ 8 ಹಂತಕ್ಕೆ ತಲುಪಿದ ನಂತರ ಟಿ20 ವಿಶ್ವಕಪ್ ಪಂದ್ಯಾವಳಿಯಲ್ಲಿ ಹೊರಬಿತ್ತು. ಗ್ರೂಪ್​ ಹಂತದಲ್ಲಿ, ನಮೀಬಿಯಾ, ನೆದರ್ಲ್ಯಾಂಡ್ಸ್ ಮತ್ತು ಯುನೈಟೆಡ್ ಸ್ಟೇಟ್ಸ್ ಆಫ್ ಅಮೆರಿಕದಂತಹ ತಂಡಗಳ ವಿರುದ್ಧ ಮಾತ್ರ ಗೆಲುವು ಸಾಧಿಸಿದ ಪಾಕ್​, ಟೀಮ್ ಇಂಡಿಯಾ ವಿರುದ್ಧ ಹೀನಾಯ ಸೋಲು ಅನುಭವಿಸಿತು. ಸೂಪರ್​ 8 ಪಂದ್ಯದಲ್ಲಿ ಶ್ರೀಲಂಕಾವನ್ನು 147 ರನ್‌ಗಳಿಗೆ ನಿರ್ಬಂಧಿಸುವಲ್ಲಿ ವಿಫಲವಾದ ಪಾಕ್​, ಟೂರ್ನಿಯಿಂದಲೇ ಹೊರಬಿದ್ದಿತು. ಇದರಿಂದ ನ್ಯೂಜಿಲೆಂಡ್ ಸೆಮಿಫೈನಲ್ ತಲುಪಿತು.

ಸೋಲಿನ ಕಹಿಯಿಂದ ತಮ್ಮ ತವರಿಗೆ ಬಂದು ಪಾಕ್​ ಆಟಗಾರರಿಗೆ ಕರಾಚಿ ವಿಮಾನ ನಿಲ್ದಾಣದಲ್ಲಿ ಮತ್ತಷ್ಟು ನೋವಾಯಿತು. ಪಾಕ್​ ಆಟಗಾರರನ್ನು ಬರಮಾಡಿಕೊಳ್ಳಲು ಯಾರೊಬ್ಬರು ಬಂದಿರಲಿಲ್ಲ. ಅಲ್ಲದೆ, ಪಾಕ್​ ಸರ್ಕಾರ ತಮ್ಮ ಆಟಗಾರರಿಗೆ ಯಾವುದೇ ಭದ್ರತೆಯನ್ನು ಸಹ ಒದಗಿಸಲಿಲ್ಲ. ಇದರಿಂದಾಗಿ, ವಿಮಾನ ನಿಲ್ದಾಣದಲ್ಲಿ ಕೆಲವರು ಪಾಕ್​ ಆಟಗಾರರ ಹೆಗಲ ಮೇಲೆ ಕೈ ಹಾಕಿ ತಮ್ಮಿಷ್ಟದಂತೆ ಸೆಲ್ಫಿ ತೆಗೆದುಕೊಂಡರು. ಅಭಿಮಾನಿಗಳ ವರ್ತನೆಯನ್ನು ನಿಯಂತ್ರಿಸಲು ಭದ್ರತೆ ಕೂಡ ಅಲ್ಲಿರಲಿಲ್ಲ. ಇದಕ್ಕೆ ಸಂಬಂಧಿಸಿದ ವಿಡಿಯೋಗಳು ವೈರಲ್ ಆಗುತ್ತಿದ್ದಂತೆ ಭಾರತೀಯ ಅಭಿಮಾನಿಗಳು ಪಾಕ್​ ಕ್ರಿಕೆಟಿಗರನ್ನು ಟ್ರೋಲ್ ಮಾಡುತ್ತಿದ್ದಾರೆ. ಅವರ ದೇಶದಲ್ಲಿ ನಾಯಿ ಕೂಡ ಪಾಕಿಸ್ತಾನಿ ಆಟಗಾರರನ್ನು ಮುಟ್ಟುವುದಿಲ್ಲ ಎಂದು ವ್ಯಂಗ್ಯವಾಡುತ್ತಿದ್ದಾರೆ. ಅಲ್ಲದೆ, ಪಾಕ್​ ಆಟಗಾರರಿಗೆ ತಮ್ಮ ತವರಿಯಲ್ಲಿ ಕಿಂಚಿತ್ತೂ ಗೌರವ ಇಲ್ಲ ಎಂದು ಕಿಚಾಯಿಸುತ್ತಿದ್ದಾರೆ.