ಸಂಜು ಏನೋ ಉತ್ತಮ ಇನ್ನಿಂಗ್ಸ್ ಆಡಿದರು! ಆದ್ರೆ, ಟೀಮ್ ಇಂಡಿಯಾ ಮಾತ್ರ... ಮತ್ತೊಮ್ಮೆ ನಾಲಿಗೆ ಹರಿಬಿಟ್ಟ ಅಮೀರ್

ಕರಾಚಿ: ನಿನ್ನೆ (ಮಾ.01) ಕೋಲ್ಕತದ ಈಡನ್​ ಗಾರ್ಡನ್ಸ್​ ಕ್ರೀಡಾಂಗಣದಲ್ಲಿ ನಡೆದ ಭಾರತ ಮತ್ತು ವೆಸ್ಟ್​ ಇಂಡೀಸ್​ ನಡುವಿನ ಕೊನೆಯ ಸೂಪರ್​-8 ಹಾಗೂ ಟಿ20 ವಿಶ್ವಕಪ್​ನ ನಿರ್ಣಾಯಕ ಪಂದ್ಯದಲ್ಲಿ ಭಾರತ ಸಂಜು ಸ್ಯಾಮನ್ಸ್​ ಅವರ ಅದ್ಭುತ ಇನ್ನಿಂಗ್ಸ್ ಸಹಾಯದಿಂದ ರೋಚಕ ಜಯ ಸಾಧಿಸಿತು. ತಂಡದ ಪರ ಕೊನೆಯವರೆಗೂ ಅಜೇಯರಾಗಿ ಉಳಿದ ಸಂಜು, ಕಡೆಗೂ ಟೀಮ್ ಇಂಡಿಯಾದ ಸೆಮೀಸ್ ಕನಸನ್ನು ಈಡೇರಿಸಿದರು. 

ಸಂಜು ಸ್ಯಾಮ್ಸನ್ ಅವರ ಅದ್ಭುತ ಬ್ಯಾಟಿಂಗ್ ಪ್ರದರ್ಶನಕ್ಕೆ ಮನಸೋತ ಕ್ರಿಕೆಟ್​ ಪ್ರಿಯರು ಮತ್ತು ಮಾಜಿ ಹಿರಿಯ ಕ್ರಿಕೆಟಿಗರು, ಸಾಮಾಜಿಕ ಜಾಲತಾಣಗಳಲ್ಲಿ ಮೆಚ್ಚುಗೆಗಳ ಸುರಿಮಳೆಯನ್ನೇ ಸುರಿಸುತ್ತಿದ್ದಾರೆ. ಮತ್ತೊಂದೆಡೆ, ಇತರೆ ದೇಶದ ಕ್ರಿಕೆಟಿಗರು ಕೂಡ ಸಂಜು ಅವರ ಆಕರ್ಷಕ ಇನ್ನಿಂಗ್ಸ್​ ಬಗ್ಗೆ ಗುಣಗಾನ ಮಾಡುತ್ತಿದ್ದಾರೆ.  ಇದೇ ವಿಚಾರಕ್ಕೆ ಮೂಗು ತೂರಿಸಿರುವ ಪಾಕ್​ ಕ್ರಿಕೆಟಿಗ ಮೊಹಮ್ಮದ್ ಅಮೀರ್​, ಸಂಜು ಬೆನ್ನುತಟ್ಟಿದ್ದೇ ಆದರೂ ಟೀಮ್ ಇಂಡಿಯಾ ಬ್ಯಾಟಿಂಗ್ ಪಡೆಯನ್ನು ಟೀಕಿಸಿದ್ದಾರೆ.    

ತಮ್ಮ ತಂಡ ಶ್ರೀಲಂಕಾ ವಿರುದ್ಧ ಅಬ್ಬರಿಸಲು ಹೋಗಿ ಮುಗ್ಗರಿಸಿದ್ದೇ ತಡ, ಟಿ20 ವಿಶ್ವಕಪ್​ ಟೂರ್ನಿಯಿಂದ ಎಕ್ಸಿಟ್​ ಆಯಿತು. ಇದನ್ನು ಮರೆತ ಅಮೀರ್​, ಟೀಮ್ ಇಂಡಿಯಾ ಯಾವುದೇ ಕಾರಣಕ್ಕೂ ಸೆಮೀಸ್​ಗೆ ಹೋಗುವುದಿಲ್ಲ ಎಂದು ಭವಿಷ್ಯ ನುಡಿದಿದ್ದರು. ಆದರೀಗ, ಆ ಭವಿಷ್ಯವಾಣಿ ಮತ್ತು ಲೆಕ್ಕಾಚಾರಗಳೆಲ್ಲವೂ ಇದೀಗ ತಲೆಕೆಳಗಾಗಿದೆ. ಭಾರತ ಕಡೆಗೂ ಸೆಮೀಸ್​ ಕನಸನ್ನು ಈಡೇರಿಸಿಕೊಂಡಿದೆ. ಇದನ್ನು ಸಹಿಸಲಾರದ ಅಮೀರ್​, ಮತ್ತೊಮ್ಮೆ ನಾಲಿಗೆ ಹರಿಬಿಟ್ಟಿದ್ದಾರೆ. 

'ಹಾರ್ನ ಮನ ಹೇ' ಪಾಡ್​ಕಾಸ್ಟ್​ನಲ್ಲಿ ಈ ಕುರಿತಂತೆ ಮಾತನಾಡಿದ ಅಮೀರ್​, "ನನ್ನ ಮಾತನ್ನು ಅವರು ಸುಳ್ಳು ಮಾಡಿದರು. ಇಲ್ಲಿ ಆ ಕ್ರೆಡಿಟ್​ ಯಾರಿಗೆ ಸಲ್ಲುತ್ತೆ. ಕೇವಲ ಸಂಜು ಸ್ಯಾಮ್ಸನ್​ಗೆ ಮಾತ್ರ. ತಮ್ಮ ಕರಿಯರ್​ನಲ್ಲಿ ಇದು ಸ್ಯಾಮ್ಸನ್​ ಅವರ ಅತ್ಯುತ್ತಮ ಇನ್ನಿಂಗ್ಸ್​. ಐಪಿಎಲ್​ ಮತ್ತು ಬೇರೆ ಫಾರ್ಮೆಟ್​ನ ಕ್ರಿಕೆಟ್​ನಲ್ಲಿ ಅವರ ಆಟ ನೋಡಿದ್ದೀನಿ. ಆದರೆ, ವೆಸ್ಟ್ ಇಂಡೀಸ್​ ವಿರುದ್ಧ ಆಡಿದ ರೀತಿ ಗಮನಾರ್ಹ. ಅದರಲ್ಲೂ, ಮಾಡು ಇಲ್ಲವೇ ಮಡಿ ಎನ್ನುವಂತ ಪರಿಸ್ಥಿತಿಯಲ್ಲಿ ಖಂಡಿತ ಮೆಚ್ಚುವಂತದ್ದು" ಎಂದರು. 

"ಇದನ್ನು ಪೂರ್ತಿಯಾಗಿ ಕ್ರಿಕೆಟ್​ ಆ್ಯಂಗಲ್​ನಲ್ಲಿ ನೋಡಿ ಹೇಳುವುದಾದರೆ, ಟೀಮ್ ಇಂಡಿಯಾ ಒಳ್ಳೆಯ ಕ್ರಿಕೆಟ್​ ಆಡುತ್ತಿಲ್ಲ. ಅವರ ಫೀಲ್ಡಿಂಗ್​​ ನೋಡಿ. ಮೂರರಿಂದ ನಾಲ್ಕು ಕ್ಯಾಚ್​ಗಳನ್ನು ಬಿಟ್ಟರು. ಫೀಲ್ಡ್​ ಮಾಡಲು ಒದ್ದಾಡಿದರು. ಬುಮ್ರಾ ಬಿಟ್ಟರೆ ಉಳಿದೆಲ್ಲ ಬೌಲರ್​ಗಳು ರನ್​ಗಳನ್ನು ನೀಡಿದರು. ಭಾರತ ಕೇವಲ ಒಬ್ಬ ಬಲಿಷ್ಠ ಬೌಲರ್​ ಮೇಲೆಯೇ ಹೆಚ್ಚು ಅವಲಂಬಿಸಿದೆ" ಎಂದು ಅಮೀರ್ ಹೇಳಿದ್ದಾರೆ,(ಏಜೆನ್ಸೀಸ್).