ನಾನೇನಾದರೂ ಆಗಿದಿದ್ರೆ... ತಮ್ಮದೇ ತಂಡದ ಸ್ಟಾರ್ ಆಲ್​ರೌಂಡರ್​ಗೆ ಪಾಕ್ ಮಾಜಿ ನಾಯಕ ಛೀಮಾರಿ | ​Shahid Afridi

ಕರಾಚಿ: ಫೆ.28ರಂದು ಶ್ರೀಲಂಕಾ ವಿರುದ್ಧ ನಡೆದ ಟಿ20 ವಿಶ್ವಕಪ್​ ಟೂರ್ನಿಯ ನಿರ್ಣಾಯಕ ಸೂಪರ್-8 ಪಂದ್ಯದಲ್ಲಿ ಪಾಕಿಸ್ತಾನದ ಸೆಮಿಫೈನಲ್ ಕನಸು ನುಚ್ಚುನೂರಾಯಿತು. ಟೂರ್ನಿ ಆರಂಭದಿಂದಲೂ ಉತ್ತಮ ಪ್ರದರ್ಶನ ನೀಡುವಲ್ಲಿ ವಿಫಲವಾದ ಪಾಕ್​, ಕೊನೆಯ ಮ್ಯಾಚ್​ನಲ್ಲಿ ಮಾತ್ರ ಅಬ್ಬರದ ಬ್ಯಾಟಿಂಗ್ ಪ್ರದರ್ಶನ ನೀಡಿತು. ಇಷ್ಟಾದರೂ ಗೆದ್ದು ಸೆಮೀಸ್​ಗೆ ಹೋಗುವಲ್ಲಿ ಮುಗ್ಗರಿಸಿತು. ಸದ್ಯ ಇದೇ ಈಗ ಪಾಕಿಸ್ತಾನ ಕ್ರಿಕೆಟ್​ ಮಂಡಳಿ ಹಾಗೂ ಮಾಜಿ ಕ್ರಿಕೆಟಿಗರ ಛೀಮಾರಿಗೆ ಕಾರಣವಾಗಿದೆ.

ಇತ್ತ ಟೀಮ್ ಇಂಡಿಯಾ ಸೆಮೀಸ್​ ಎಂಟ್ರಿಕೊಟ್ಟ ಖುಷಿಯಲ್ಲಿ, ಮುಂದಿನ ಇಂಗ್ಲೆಂಡ್​ ವಿರುದ್ಧದ ಪಂದ್ಯಕ್ಕೆ ಭರ್ಜರಿ ತಯಾರಿ ನಡೆಸುತ್ತಿದೆ. ಅತ್ತ ಪಾಕಿಸ್ತಾನ ಆಟಗಾರರು, ಬೇಸರದ ಮುಖದಲ್ಲೇ ತಮ್ಮ ತವರಿಗೆ ವಾಪಾಸ್ ಆಗಿದ್ದಾರೆ. ಟಿ20 ವಿಶ್ವಕಪ್​ ಟೂರ್ನಿಯಿಂದ ಹೊರಬಿದ್ದ ಪಾಕ್​ ತಂಡದ ಪ್ರತಿ ಆಟಗಾರನಿಗೆ ಪಿಸಿಬಿ 50 ಲಕ್ಷ ರೂ.ಗಳ ಭಾರೀ ದಂಡವನ್ನು ವಿಧಿಸಿದೆ. ಮತ್ತೊಂದೆಡೆ, ನಾಯಕನ ಸ್ಥಾನದಿಂದ ಸಲ್ಮಾನ್ ಅಲಿ ಅಘಾ ಅವರನ್ನು ವಜಾಗೊಳಿಸಲಿದೆ ಎಂಬ ಸುದ್ದಿಗಳು ವರದಿಯಾಗಿವೆ.

ಶದಾಬ್ ಖಾನ್ ಮತ್ತು ಶಾಹೀನ್​ ಅಫ್ರಿದಿ ಪೈಕಿ ಯಾರಿಗೆ ಕ್ಯಾಪ್ಟನ್ ಸ್ಥಾನವನ್ನು ನೀಡಬೇಕು ಎಂಬ ಚರ್ಚೆಗಳು ಸದ್ಯ ಪಾಕ್​ ಕ್ರಿಕೆಟ್​ನಲ್ಲಿ ನಡೆಯುತ್ತಿವೆ ಎಂದು ಒಂದಷ್ಟು ಕ್ರಿಕೆಟ್​ ಮೂಲಗಳು ತಿಳಿಸಿವೆ. ಆದಾಗ್ಯೂ, ನಾಯಕತ್ವ ಬದಲಾವಣೆಯ ಊಹಾಪೋಹಗಳ ನಡುವೆ ಪಾಕಿಸ್ತಾನ ಕ್ರಿಕೆಟ್​ನ ಮಾಜಿ ನಾಯಕ ಶಾಹಿದ್ ಅಫ್ರಿದಿ, ತಮ್ಮದೇ ತಂಡದ ಆಲ್‌ರೌಂಡರ್ ಶದಾಬ್ ಖಾನ್ ಬಗ್ಗೆ ಕಟುವಾದ ಹೇಳಿಕೆ ನೀಡಿದ್ದಾರೆ.  

ಅವನ ಪ್ರದರ್ಶನವನ್ನು ನೋಡಿದರೆ, ಖಂಡಿತ ತಂಡದಲ್ಲಿ ಆತನಿಗೆ ಸ್ಥಾನ ಕೊಡುತ್ತಿರಲಿಲ್ಲ. ಇನ್ನೂ ನಾಯಕತ್ವದ ಬಗ್ಗೆ ಏನು ಮಾತನಾಡೋದು? ನಾಯಕನ ಸ್ಥಾನಕ್ಕೆ ಅವನು ಅನರ್ಹ ಎಂದು ಪಾಕಿಸ್ತಾನಿಯ ಸಮಾ ಟಿವಿಗೆ ನೀಡಿದ ಸಂದರ್ಶನದಲ್ಲಿ ಕಿಡಿಕಾರಿದ್ದಾರೆ. ಶದಾಬ್ ಆಡಿರುವ ಏಳು ಪಂದ್ಯಗಳಲ್ಲಿ 118 ರನ್‌ ಮತ್ತು ಐದು ವಿಕೆಟ್‌ಗಳನ್ನು ಪಡೆದಿದ್ದಾರೆ. ಆಲ್‌ರೌಂಡರ್‌ ವಿರುದ್ಧ ತೀವ್ರ ಅಸಮಾಧಾನ ಹೊರಹಾಕಿರುವ ಅಫ್ರಿದಿ, ಹೇಗೆ ಆತನಿಗೆ ಬ್ಯಾಕ್ ಟು ಬ್ಯಾಕ್​ ಅವಕಾಶಗಳನ್ನು ನೀಡಲಾಯಿತು ಎಂದು ಪ್ರಶ್ನಿಸಿದ್ದಾರೆ,(ಏಜೆನ್ಸೀಸ್).