ದೇವರ ಮೇಲೆ ಆಣೆ! ಭಾರತ ಮತ್ತು ಪಾಕಿಸ್ತಾನ... ಶಾಕಿಂಗ್ ಹೇಳಿಕೆ ನೀಡಿದ ಶೋಯೆಬ್​ ಆಖ್ತರ್ | PAK vs SL ​

ಕೊಲೊಂಬೊ: ಟಿ20 ವಿಶ್ವಕಪ್ 2026ರ ಭಾಗವಾಗಿ ನಡೆಯುತ್ತಿರುವ ಪ್ರತಿಯೊಂದು ಸೂಪರ್​-8 ಪಂದ್ಯಗಳು ಸದ್ಯ ಭಾರೀ ಕುತೂಹಲ ಕೆರಳಸುತ್ತಿವೆ. ಈ ಟೂರ್ನಮೆಂಟ್ ಅತ್ಯಂತ ರೋಮಾಂಚಕಾರಿ ಹಾದಿಯಲ್ಲಿ ಸಾಗುತ್ತಿದೆ. ಈಗಾಗಲೇ ಎರಡು ತಂಡಗಳು ಸೆಮಿಫೈನಲ್​ಗೆ ಲಗ್ಗೆಯಿಟ್ಟಿದ್ದು, ಇನ್ಯಾವ ಎರಡು ತಂಡಗಳು ಎಂಟ್ರಿಕೊಡಲಿವೆ ಎಂಬ ಕೌತುಕ ಕ್ರಿಕೆಟ್​ ಪ್ರಿಯರನ್ನು ಬೆಂಬಿಡದೆ ಕಾಡುತ್ತಿದೆ. ಈ ಮಧ್ಯೆ, ಪಾಕಿಸ್ತಾನದ ಮಾಜಿ ಕ್ರಿಕೆಟಿಗ ಶೋಯೆಬ್ ಅಖ್ತರ್​ ನೀಡಿರುವ ಹೇಳಿಕೆ ಇದೀಗ ಹಲವರ ಅಚ್ಚರಿಗೆ ಕಾರಣವಾಗಿದೆ.

ಇಂದು ಪಲ್ಲೆಕಲೆ ಕ್ರೀಡಾಂಗಣದಲ್ಲಿ ಶ್ರೀಲಂಕಾ ಮತ್ತು ಪಾಕಿಸ್ತಾನ ಮಧ್ಯೆ ನಡೆಯುತ್ತಿರುವ ನಿರ್ಣಾಯಕ ಸೂಪರ್​-8 ಪಂದ್ಯದಲ್ಲಿ ಶ್ರೀಲಂಕಾ ಮತ್ತು ಪಾಕಿಸ್ತಾನ ತಂಡಗಳು ಗೆಲುವಿಗಾಗಿ ಸೆಣಸಾಡುತ್ತಿವೆ. ಹೇಗಾದರೂ ಮಾಡಿ ಈ ಪಂದ್ಯದಲ್ಲಿ ಗೆಲುವು ಸಾಧಿಸಲೇಬೇಕು ಎಂದು ಪಣತೊಟ್ಟಿರುವ ಪಾಕ್​ ಒಂದೆಡೆಯಾದರೆ, ನಾಳಿನ ಮ್ಯಾಚ್​ನಲ್ಲಿ ವೆಸ್ಟ್​ ಇಂಡೀಸ್​ ಎದುರು ಜಯ ಸಾಧಿಸಲು ಭಾರತ ಸನ್ನದ್ಧವಾಗಿದೆ. ಈ ಸಂದರ್ಭದಲ್ಲಿ, ಶೋಯೆಬ್ ಅಖ್ತರ್ ಮಾತನಾಡಿ, ಮತ್ತೊಮ್ಮೆ ಟೀಮ್ ಇಂಡಿಯಾ ಮತ್ತು ಪಾಕಿಸ್ತಾನ ಫೈನಲ್​ ತಲುಪಲಿದೆ ಎಂದಿದ್ದಾರೆ. ​

ಇಂದಿನ ಶ್ರೀಲಂಕಾ-ಪಾಕ್​ ಪಂದ್ಯದ ನಡುವೆ ಮಾತನಾಡಿದ ಶೋಯೆಬ್​, ಭಾರತ ಮತ್ತು ಪಾಕಿಸ್ತಾನ ಎರಡೂ ತಂಡಗಳು ಸೆಮಿಫೈನಲ್ ತಲುಪಬೇಕು. ಮತ್ತು ಇಲ್ಲಿಂದ ನೇರವಾಗಿ ಫೈನಲ್‌ಗೂ ಹೋಗಬೇಕು. ಅಲ್ಲಾಹನ ಮೇಲೆ ನಂಬಿಕೆಯಿದೆ, ಅಂತಿಮ ಹಣಾಹಣಿಯಲ್ಲಿ ಖಂಡಿತವಾಗಿಯೂ ಭಾರತ-ಪಾಕ್ ನಡುವೆ ಪೈಪೋಟಿ ನಡೆಯಲಿದೆ. ಈ ಮ್ಯಾಚ್​ನಲ್ಲಿ ಪಾಕ್​ ಗೆದ್ದು ಬೀಗಲಿದೆ ಎಂದು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ,(ಏಜೆನ್ಸೀಸ್).

ಪಾಕಿಸ್ತಾನ ಸೆಮಿಫೈನಲ್ ರೇಸ್‌ನಲ್ಲಿರಬೇಕೇ? ಅಥವಾ ಗಂಟುಮೂಟೆ ಕಟ್ಟಿಕೊಂಡು ತವರಿಗೆ ಹೋಗಬೇಕೇ? ಎಂಬುದನ್ನು ನಿರ್ಧರಿಸುವ ಬಹುಮುಖ್ಯ ನಿರ್ಣಾಯಕ ಪಂದ್ಯ ಇಂದಿನದ್ದು. ಲೆಕ್ಕಾಚಾರಗಳ ಪ್ರಕಾರ, ಪಾಕಿಸ್ತಾನ ಈ ಪಂದ್ಯವನ್ನು ಭಾರಿ ಅಂತರದಿಂದ ಗೆದ್ದರೆ, ನ್ಯೂಜಿಲೆಂಡ್ ಅನ್ನು ಹಿಂದಿಕ್ಕಿ ನೇರವಾಗಿ ಸೆಮಿಫೈನಲ್‌ಗೆ ಹೋಗುತ್ತದೆ. ಅಸಲಿಗೆ, ಈ ಪಂದ್ಯವನ್ನು 65 ರನ್‌ಗಳಿಂದ ಪಾಕ್​ ಗೆಲ್ಲಲೇಬೇಕಿದೆ. ಇಲ್ಲವೇ ಚೇಸಿಂಗ್​ನಲ್ಲಿ ಕೇವಲ 12.4 ಓವರ್‌ಗಳಲ್ಲಿ ಗುರಿಯನ್ನು ಬೆನ್ನಟ್ಟಿ, ಮಣಿಸಬೇಕು. ಈ ಎರಡರಲ್ಲಿ ಯಾವುದೇ ಸಂಭವಿಸಿದರೂ, ಸಲ್ಮಾನ್​ ಅಲಿ ಅಘಾ ಪಡೆ ತನ್ನ ಸೆಮಿಫೈನಲ್ ಸ್ಥಾನವನ್ನು ಖಚಿತಪಡಿಸುತ್ತದೆ.