ಅಭ್ಯಾಸ ಪಂದ್ಯದಲ್ಲಿ ಕನ್ನಡಿಗ ಪಡಿಕ್ಕಲ್​ ಶತಕದಾಟ; ಕೊಲಂಬೊ ಟೆಸ್ಟ್​ಗೆ ಸ್ಥಾನ ಪಕ್ಕಾ!

ಪಂದ್ಯದ ಮೊದಲ ದಿನ ಲಂಕಾ ಇಲೆವೆನ್​ 90 ಓವರ್​ ಆಡಿ 8 ವಿಕೆಟ್​ಗೆ 363 ರನ್​ ಗಳಿಸಿದ್ದರೆ, ಎರಡನೇ ದಿನ ಭಾರತ ತಂಡ ಕೂಡ 90 ಓವರ್​ ಆಡಿ 6 ವಿಕೆಟ್​ಗೆ 357 ರನ್​ ಗಳಿಸಿತು. ಪಡಿಕ್ಕಲ್​ ಮಿಂಚಿದ ನಡುವೆ ಮತ್ತೋರ್ವ ಕನ್ನಡಿಗ ಹಾಗೂ ಹಂಗಾಮಿ ನಾಯಕ ಕೆಎಲ್​ ರಾಹುಲ್​ (40) ಮತ್ತು ರವೀಂದ್ರ ಜಡೇಜಾ (63) ಕೂಡ ಉತ್ತಮ ಅಭ್ಯಾಸ ನಡೆಸಿದರೆ, ಆರಂಭಿಕ ಯಶಸ್ವಿ ಜೈಸ್ವಾಲ್​ (0), ವಿಕೆಟ್​ ಕೀಪರ್​-ಬ್ಯಾಟರ್​ಗಳಾದ ರಿಷಭ್​ ಪಂತ್​ (2) ಮತ್ತು ಧ್ರುವ ಜುರೆಲ್​ (1) ಬೇಗನೆ ಔಟ್​ ಆಗಿ ನಿರಾಸೆ ಮೂಡಿಸಿದರು. ಸ್ಪಿನ್ನರ್​ ಮಾನವ್​ ಸುಥರ್​ (41) ಮತ್ತು ವೇಗಿ ಗುರುನೂರ್​ ಬ್ರಾರ್​ (36*) ಉಪಯುಕ್ತ ಆಟವಾಡಿ ಗಮನಸೆಳೆದರು. ದಿಲುಮ್​ ಸುಧೀರ ಎಸೆದ ದಿನದ ಕೊನೇ ಓವರ್​ನಲ್ಲಿ ಗುರುನೂರ್​ 4 ಸಿಕ್ಸರ್​ (6,6,0,6,6) ಸಿಡಿಸಿ ಮಿಂಚಿದರು.

ಪಂದ್ಯದ 3ನೇ ಹಾಗೂ ಅಂತಿಮ ದಿನವಾದ ಭಾನುವಾರ ಉಭಯ ತಂಡಗಳು ತಲಾ 45 ಓವರ್​ ಬ್ಯಾಟಿಂಗ್​ ಮಾಡಲಿವೆ. ಬಳಿಕ ಸೋಮವಾರ ಭಾರತ ತಂಡ ಗಾಲೆಗೆ ತೆರಳಲಿದ್ದು, ಆ.15ರಿಂದ ಮೊದಲ ಟೆಸ್ಟ್​ ನಡೆಯಲಿದೆ.

ಒಂದೆಡೆ ಸಾಯಿ ಸುದರ್ಶನ್​ ಅಲಭ್ಯತೆ ಮತ್ತು ಮತ್ತೊಂದೆಡೆ ದೇವದತ್​ ಪಡಿಕ್ಕಲ್​ ಶತಕದಾಟ ಭಾರತ ತಂಡದ ಮ್ಯಾನೇಜ್​ಮೆಂಟ್​ಗೆ ದೊಡ್ಡ ಗೊಂದಲವೊಂದನ್ನು ಬಗೆಹರಿಸಿದೆ. ಮೊದಲ ಟೆಸ್ಟ್​ ಪಂದ್ಯದ ಆಡುವ 11ರ ಬಳಗದಲ್ಲಿ ಪಡಿಕ್ಕಲ್​ ಸ್ಥಾನ ಪಡೆಯುವುದು ಮತ್ತು 3ನೇ ಕ್ರಮಾಂಕದಲ್ಲಿ ಆಡುವುದು ಪಕ್ಕಾ ಆಗಿದೆ. ಜೈಸ್ವಾಲ್​ ದಿನದ 2ನೇ ಎಸೆತದಲ್ಲೇ ಔಟಾದ ಬಳಿಕ ಪಡಿಕ್ಕಲ್​, ರಾಹುಲ್​ ಜತೆಗೂಡಿ 2ನೇ ವಿಕೆಟ್​ಗೆ 96 ರನ್​ ಜತೆಯಾಟವಾಡಿದರು. ಬಳಿಕ ಜಡೇಜಾ ಜತೆ 3ನೇ ವಿಕೆಟ್​ಗೆ 72 ರನ್​ ಸೇರಿಸಿದರು. ಪಡಿಕ್ಕಲ್​ 121 ಎಸೆತಗಳಲ್ಲಿ ಶತಕ ಪೂರೈಸಿದ ಬೆನ್ನಲ್ಲೇ ಸ್ವಯಂ ನಿವೃತ್ತಿ ಪಡೆದು ಇತರರಿಗೆ ಬ್ಯಾಟಿಂಗ್​ ಮಾಡಲು ಅವಕಾಶ ಕಲ್ಪಿಸಿದರು. ಬಳಿಕ ದಿನದ ಕೊನೆಯಲ್ಲಿ 17 ಓವರ್​ ಬಾಕಿ ಇದ್ದಾಗ ಮತ್ತೆ ಬ್ಯಾಟಿಂಗ್​ಗೆ ಇಳಿದರು.

ಭಾರತ ತಂಡದ ನಾಯಕ ಶುಭಮಾನ್​ ಗಿಲ್​, ಲಂಕಾದಲ್ಲಿ ಬ್ಯಾಟಿಂಗ್​ ತರಬೇತಿಯ ವೇಳೆ ಆಗಿರುವ ಬಲಗೈ ಉಂಗುರ ಬೆರಳಿನ ಗಾಯದಿಂದಾಗಿ ತ್ರಿದಿನ ಅಭ್ಯಾಸ ಪಂದ್ಯದ 2ನೇ ದಿನವೂ ಮೈದಾನಕ್ಕಿಳಿಯಲಿಲ್ಲ. ಅವರ ಬದಲಿಗೆ ರವೀಂದ್ರ ಜಡೇಜಾ 4ನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್​ ಮಾಡಿದರು. ಗಿಲ್​ ಗೈರಿನಲ್ಲಿ ಕನ್ನಡಿಗ ಕೆಎಲ್​ ರಾಹುಲ್​ ಭಾರತ ತಂಡವನ್ನು ಮುನ್ನಡೆಸುತ್ತಿದ್ದಾರೆ.

ಶ್ರೀಲಂಕಾ ಇಲೆವೆನ್​: 8 ವಿಕೆಟ್​ಗೆ 363 ಡಿಕ್ಲೇರ್​; ಭಾರತ: 90 ಓವರ್​ಗಳಲ್ಲಿ 8 ವಿಕೆಟ್​ಗೆ 357 (ಜೈಸ್ವಾಲ್​ 0, ರಾಹುಲ್​ 40, ಪಡಿಕ್ಕಲ್​ 142*, ಜಡೇಜಾ 63, ಪಂತ್​ 2, ಜುರೆಲ್​ 1, ಸುಥರ್​ 41, ಕುಲದೀಪ್​ 1, ಸಿರಾಜ್​ 1, ಸಾರಾಂಶ್​ ಜೈನ್​ 22, ಗುರುನೂರ್​ 36*, ರಮೇಶ್​ ಮೆಂಡಿಸ್​ 77ಕ್ಕೆ 2, ಅಸಂಕ ಮನೋಜ್​ 32ಕ್ಕೆ 2, ವಿಶ್ವ ಫೆರ್ನಾಂಡೊ 42ಕ್ಕೆ 1).

ಎಡಗೈ ಬ್ಯಾಟರ್​ ಸಾಯಿ ಸುದರ್ಶನ್​ ಶ್ರೀಲಂಕಾ ವಿರುದ್ಧದ 2 ಪಂದ್ಯಗಳ ಟೆಸ್ಟ್​ ಸರಣಿಯಿಂದ ಹೊರಬಿದ್ದಿದ್ದಾರೆ. ಕಾಲಿನ ಹೆಬ್ಬೆರಳು ಗಾಯದ ಸಮಸ್ಯೆಯಿಂದ ಬಳಲುತ್ತಿರುವ ಅವರು ಇನ್ನೂ ಸಂಪೂರ್ಣವಾಗಿ ಚೇತರಿಸಿಕೊಂಡಿಲ್ಲ. ಕಳೆದ ತಿಂಗಳು ಶ್ರೀಲಂಕಾದಲ್ಲಿ ಭಾರತ ಎ ಪರ 2ನೇ ಚತುರ್ದಿನ ಪಂದ್ಯ ಆಡುವ ವೇಳೆ ಅವರು ಈ ಗಾಯಕ್ಕೊಳಗಾಗಿದ್ದರು. ಬಳಿಕ ಬೆಂಗಳೂರಿನ ಬಿಸಿಸಿಐ ಶ್ರೇಷ್ಠತಾ ಕೇಂದ್ರದಲ್ಲಿ ಪುನಶ್ಚೇತನ ಶಿಬಿರದಲ್ಲಿದ್ದರು. ಆದರೆ ಅವರಿನ್ನೂ ಟೆಸ್ಟ್​ ಕ್ರಿಕೆಟ್​ ಆಡುವಷ್ಟು ಗುಣಮುಖರಾಗಿಲ್ಲ ಎಂದು ಮೂಲಗಳು ತಿಳಿಸಿವೆ. ಸುದರ್ಶನ್​ ಬದಲಿಗೆ ಬೇರೆ ಬ್ಯಾಟರ್​ಅನ್ನು ಬಿಸಿಸಿಐ ಇನ್ನಷ್ಟೇ ಆರಿಸಬೇಕಾಗಿದೆ.