ಅ.4ರಿಂದ 2027 ಏಕದಿನ ವಿಶ್ವಕಪ್ ಆರಂಭ; ಈ ದಿನಾಂಕದಂದೇ ನಡೆಯಲಿದೆ ಫೈನಲ್: ಹೀಗಿದೆ ವರದಿ​ ​

ನವದೆಹಲಿ: ಕ್ರಿಕೆಟ್​ ದಿಗ್ಗಜರಾದ ರೋಹಿತ್ ಶರ್ಮ ಮತ್ತು ವಿರಾಟ್​ ಕೊಹ್ಲಿ ಅವರನ್ನು ಟೀಮ್ ಇಂಡಿಯಾದಲ್ಲಿ ನೋಡಲು ತೀವ್ರ ಕುತೂಹಲದಿಂದ ಕಾಯುತ್ತಿರುವ ಕ್ರಿಕೆಟ್​ ಅಭಿಮಾನಿಗಳು, 2027ರ ಏಕದಿನ ವಿಶ್ವಕಪ್ ಯಾವಾಗ ಆರಂಭ? ಎಂಬ ಪ್ರಶ್ನೆಗಳನ್ನು ಮುಂದಿಟ್ಟಿದ್ದಾರೆ. ಅಂತೆಯೇ, ಇದಕ್ಕೆ ಉತ್ತರ ಲಭಿಸಿದ್ದು, ಮುಂದಿನ ವರ್ಷ ಅಕ್ಟೋಬರ್​ 04ರಿಂದ ಟೂರ್ನಿ ಪ್ರಾರಂಭವಾಗಲಿದೆ ಎಂದು ಇಎಸ್​ಪಿನ್​ ಕ್ರಿಕ್​ ಇನ್ಫೋ ವರದಿ ಮಾಡಿದೆ.

​

ಐಸಿಸಿ ಪುರುಷರ ಏಕದಿನ ವಿಶ್ವಕಪ್ 2027ರ ವೇಳಾಪಟ್ಟಿಯ ಕುರಿತು ಹೊಸ ಅಪ್ಡೇಟ್​ ಹೊರಬಿದ್ದಿದ್ದು, ಪ್ರತಿಷ್ಠಿತ ಮೆಗಾ ಟೂರ್ನಮೆಂಟ್‌ನ ದಿನಾಂಕಗಳನ್ನು 2027ರ ಅಕ್ಟೋಬರ್ 4ರಿಂದ ನವೆಂಬರ್ 21 ರವರೆಗೆ ತಾತ್ಕಾಲಿಕವಾಗಿ ಅಂತಿಮಗೊಳಿಸಲಾಗಿದೆ ಎಂದು ವರದಿಯಾಗಿದೆ. ದಕ್ಷಿಣ ಆಫ್ರಿಕಾ, ಜಿಂಬಾಬ್ವೆ ಮತ್ತು ನಮೀಬಿಯಾ ಜಂಟಿಯಾಗಿ ಈ ಟೂರ್ನಿಯನ್ನು ಆಯೋಜಿಸಲಿವೆ ಎಂದೂ ತಿಳಿಸಲಾಗಿದೆ.

ಅಹಮದಾಬಾದ್‌ನಲ್ಲಿ ನಡೆದ ಐಸಿಸಿ ಮಂಡಳಿ ಸಭೆಯಲ್ಲಿ ಈ ದಿನಾಂಕಗಳ ಕುರಿತು ಪ್ರಾಥಮಿಕ ಒಪ್ಪಂದಕ್ಕೆ ಮಾತುಕತೆ ಮಾಡಲಾಗಿದೆ ಮತ್ತು ಜುಲೈನಲ್ಲಿ ಎಡಿನ್‌ಬರ್ಗ್‌ನಲ್ಲಿ ನಡೆಯಲಿರುವ ಐಸಿಸಿ ವಾರ್ಷಿಕ ಸಾಮಾನ್ಯ ಸಭೆಯಲ್ಲಿ ಅಧಿಕೃತವಾಗಿ ಘೋಷಿಸುವ ಸಾಧ್ಯತೆಯಿದೆ ಎಂದು ವರದಿಗಳು ಉಲ್ಲೇಖಿಸಿವೆ.

ಈ ಟೂರ್ನಿಯಲ್ಲಿ ಒಟ್ಟು 54 ಪಂದ್ಯಗಳು ನಡೆಯಲಿದ್ದು, ಅದರಲ್ಲಿ 41 ಪಂದ್ಯಗಳನ್ನು ದಕ್ಷಿಣ ಆಫ್ರಿಕಾದ 8 ತಾಣಗಳು ಆಯೋಜಿಸಲಿವೆ. 8ರಿಂದ 10 ಪಂದ್ಯಗಳು ಜಿಂಬಾಬ್ವೆಯ ಹರಾರೆ ಸ್ಪೋರ್ಟ್ಸ್ ಕ್ಲಬ್, ಬುಲವಾಯೊದ ಕ್ವೀನ್ಸ್ ಮತ್ತು ವಿಕ್ಟೋರಿಯಾ ಫಾಲ್ಸ್​ನಂತಹ 3 ಪ್ರಮುಖ ಸ್ಥಳಗಳಲ್ಲಿ ನಡೆಯಲಿವೆ ಎನ್ನಲಾಗಿದೆ. ಉಳಿದ 3 ಪಂದ್ಯಗಳನ್ನು ನಮೀಬಿಯಾ ಆಯೋಜನೆ ಮಾಡಲಿದೆ.

ಜಿಂಬಾಬ್ವೆಯಲ್ಲಿ ಹೊಸದಾಗಿ ನಿರ್ಮಿಸಲಾದ 'ಫೇಲ್ ಮೋಸಿ-ಒ-ತುನ್ಯಾ' ಅಂತಾರಾಷ್ಟ್ರೀಯ ಕ್ರಿಕೆಟ್ ಕ್ರೀಡಾಂಗಣವು ಮುಂದಿನ ವರ್ಷ ಮೇ ತಿಂಗಳಲ್ಲಿ ಅಧಿಕೃತವಾಗಿ ಉದ್ಘಾಟನೆಗೊಳ್ಳಲಿದೆ. ಈ ನಿಟ್ಟಿನಲ್ಲಿ, 2003ರ ನಂತರ ಆಫ್ರಿಕನ್ ಖಂಡದಲ್ಲಿ ನಡೆಯಲಿರುವ ಮೊದಲ ಪುರುಷರ ಏಕದಿನ ವಿಶ್ವಕಪ್ ಇದಾಗಿದೆ.

ವಿಶ್ವಕಪ್‌ನ ಕೊನೆಯ ಎರಡು ಆವೃತ್ತಿಗಳಲ್ಲಿ ಕೇವಲ 10 ತಂಡಗಳು ಮಾತ್ರ ಸ್ಪರ್ಧಿಸಿತ್ತು. ಅದೇ 2027ರ ಟೂರ್ನಿಗೆ ಐಸಿಸಿ ಹಳೆಯ 14 ತಂಡಗಳ ಫಾರ್ಮೆಟ್​ ಅನ್ನು ಮರಳಿ ತರುತ್ತಿದೆ. ಈ 14 ಟೀಮ್​ಗಳು ತಲಾ ಏಳು ತಂಡಗಳ ಎರಡು ಗ್ರೂಪ್​ಗಳಾಗಿ ವಿಂಗಡಣೆಯಾಗಲಿದೆ. ಪ್ರತಿ ಗುಂಪಿನಿಂದ ಅಗ್ರ ಮೂರು ತಂಡಗಳು ಸೂಪರ್ ಸಿಕ್ಸ್ ಹಂತಕ್ಕೆ ಅರ್ಹತೆ ಪಡೆಯುತ್ತವೆ. ಐಸಿಸಿಯ ಆತಿಥೇಯರು ಮತ್ತು ಪೂರ್ಣ ಸದಸ್ಯ ರಾಷ್ಟ್ರಗಳಾಗಿ, ದಕ್ಷಿಣ ಆಫ್ರಿಕಾ ಮತ್ತು ಜಿಂಬಾಬ್ವೆ ನೇರವಾಗಿ ಅರ್ಹತೆ ಪಡೆಯಲಿವೆ. ಆದರೆ, ನಮೀಬಿಯಾ ಅರ್ಹತಾ ಪಂದ್ಯಗಳನ್ನು ಆಡಬೇಕಾಗುತ್ತದೆ.

ಇದು 2027ರಿಂದ 2031 ಫ್ಯೂಚರ್ ಟೂರ್ಸ್ ಪ್ರೋಗ್ರಾಂ (ಎಫ್‌ಟಿಪಿ) ಅಡಿಯಲ್ಲಿ ನಡೆಯಲಿರುವ ಮೊದಲ ಐಸಿಸಿ ಈವೆಂಟ್ ಆಗಿರಲಿದೆ. ಮುಂಬರುವ ದಿನಗಳಲ್ಲಿ, ಹಾಂಗ್ ಕಾಂಗ್‌ನಲ್ಲಿ ನಡೆಯುವ ಐಸಿಸಿ ಸಭೆಗಳಲ್ಲಿ ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್ (ಡಬ್ಲ್ಯೂಟಿಸಿ) ವಿಸ್ತರಣೆ ಮತ್ತು ಫಾರ್ಮೆಟ್​ ಬದಲಾವಣೆಗಳ ಕುರಿತು ಅಂತಿಮ ನಿರ್ಧಾರಗಳನ್ನು ಕೈಗೊಳ್ಳಲಾಗುವುದು ಎಂದು ವರದಿಯಾಗಿದೆ,(ಏಜೆನ್ಸೀಸ್).