ಧೋನಿಗೆ ಲಕ್ಕಿ ನಂ.7 ಅನ್ನೋದು ಮತ್ತೆ ಸಾಬೀತಾಯ್ತು.. ನಿನ್ನೆ ಇಡೀ ಪಂದ್ಯವನ್ನು ಆವರಿಸಿದ್ದು ಏಳನೇ ಸಂಖ್ಯೆ! MS Dhoni

MS Dhoni : ಪ್ರಸ್ತುತ ನಡೆಯುತ್ತಿರುವ ಟಿ20 ವಿಶ್ವಕಪ್​ ಟೂರ್ನಿಯಲ್ಲಿ ಟೀಮ್​ ಇಂಡಿಯಾ ಫೈನಲ್‌ಗೆ ಲಗ್ಗೆ ಇಟ್ಟಿದೆ. ಹಾಲಿ ಚಾಂಪಿಯನ್ಸ್​ ಮತ್ತೊಮ್ಮೆ ಟ್ರೋಫಿ ಗೆಲ್ಲಲು ಇನ್ನೊಂದು ಹೆಜ್ಜೆ ಬಾಕಿ ಇದೆ. ಗುರುವಾರ (ಮಾರ್ಚ್​ 05) ರಾತ್ರಿ ಇಂಗ್ಲೆಂಡ್ ತಂಡದ ವಿರುದ್ಧ ಮುಂಬೈನ ವಾಂಖೆಡೆ ಕ್ರೀಡಾಂಗಣದಲ್ಲಿ ನಡೆದ ರೋಚಕ ಪಂದ್ಯದಲ್ಲಿ ಭಾರತ ತಂಡ ಭರ್ಜರಿ ಜಯಗಳಿಸಿತು. ಕೇವಲ ಏಳು ರನ್‌ಗಳ ಅಂತರದಿಂದ ಗೆದ್ದು ಫೈನಲ್‌ ಪ್ರವೇಶಿಸಿದರು. ಮಾರ್ಚ್ 8 ರಂದು ನಡೆಯಲಿರುವ ಫೈನಲ್‌ನಲ್ಲಿ ಟೀಮ್ ಇಂಡಿಯಾ ನ್ಯೂಜಿಲೆಂಡ್ ತಂಡವನ್ನು ಎದುರಿಸಲಿದೆ.

ಅಂದಹಾಗೆ, ನಿನ್ನೆಯ ಪಂದ್ಯದಲ್ಲಿ ವಿಶೇಷ ಗಮನ ಸೆಳೆದಿದ್ದು 7ನೇ ಸಂಖ್ಯೆ. ಹೇಳಬೇಕೆಂದರೆ, ಇಡೀ ಪಂದ್ಯವನ್ನು ಆವರಿಸಿದ್ದು, ಇದೇ 7ನೇ ನಂಬರ್. ಪಂದ್ಯದ ಆರಂಭದಿಂದ ಹಿಡಿದು ಪಂದ್ಯದ ಅಂತ್ಯದರೆಗೂ 7ನೇ ನಂಬರ್​ ಪ್ರಾಬಲ್ಯ ಸಾಧಿಸಿತು. ಅದು ಹೇಗೆ ಅಂತೀರಾ? ಈ ಕುತೂಹಲಕಾರಿ ಪ್ರಶ್ನೆಗೆ ಉತ್ತರ ತಿಳಿಯುವ ಬಯಕೆ ಇದ್ದರೆ ಮುಂದೆ ಓದಿ.

ನಿಮಗೆ ಗೊತ್ತು ಕೂಲ್​ ಕ್ಯಾಪ್ಟನ್​ ಖ್ಯಾತಿಯ ಎಂ.ಎಸ್​. ಧೋನಿಯವರ ಲಕ್ಕಿ ನಂಬರ್​ 7 ಅನ್ನೋದು. ಅವರ ಜರ್ಸಿ ನಂಬರ್​ ಕೂಡ ಅದೇ. ನಿನ್ನೆ ಮುಂಬೈನ ವಾಂಖೆಡೆ ಕ್ರೀಡಾಂಗಣದಲ್ಲಿ ನಡೆದ ಸೆಮಿಫೈನಲ್​ ಪಂದ್ಯವನ್ನು ನೋಡಲು ಧೋನಿ ಅವರು ತಮ್ಮ ಪತ್ನಿಯ ಜತೆ ಆಗಮಿಸಿದ್ದರು. ಇಡೀ ಪಂದ್ಯವನ್ನು ವೀಕ್ಷಿಸಿದರು. ಧೋನಿ ಬಂದಿದ್ದೇ ತಡ, ಇಡೀ ಪಂದ್ಯಕ್ಕೆ 7ರ ನಂಟು ಬೆಸೆದುಕೊಂಡಿತು. ಅದು ಹೇಗೆಂದು ವಿವರಿಸುತ್ತೇನೆ ಮುಂದೆ ಓದಿ.

ನಿನ್ನೆಯ ಪಂದ್ಯ ಶುರುವಾಗಿದ್ದು 7 ಗಂಟೆಗೆ. ಈ ಪಂದ್ಯಲ್ಲಿ ಭಾರತ ಕಳೆದುಕೊಂಡಿದ್ದು 7 ವಿಕೆಟ್​. ಅದೇ ರೀತಿ ಇಂಗ್ಲೆಂಡ್​ ಕೂಡ 7 ವಿಕೆಟ್​ ಕಳೆದುಕೊಂಡಿತು. ಭಾರತದ ಸ್ಫೋಟಕ ಇನ್ನಿಂಗ್ಸ್​ ಆಡಿದ ಸಂಜು ಸ್ಯಾಮ್ಸನ್​ (42 ಎಸೆತ 89 ರನ್​) 7 ಸಿಕ್ಸರ್​ ಬಾರಿಸಿದರು. ಅತ್ತ ಇಂಗ್ಲೆಂಡ್​ ಪರ ಅಮೋಘ ಬ್ಯಾಟಿಂಗ್​ ಪ್ರದರ್ಶನ ನೀಡಿದ ಜಾಕೋಬ್​ ಬೆಥೆಲ್​ ( 48 ಎಸೆತ 105 ರನ್​) ಕೂಡ 7 ಸಿಕ್ಸರ್​ ಬಾರಿಸಿದರು. ಈ 7ರ ನಂಟು ಇಷ್ಟಕ್ಕೆ ನಿಲ್ಲುವುದಿಲ್ಲ, ಅಭಿಷೇಕ್​ ಶರ್ಮಾ 7 ಎಸೆತಗಳನ್ನು ಆಡಿದರು. ಅದೇ ರೀತಿ ತಿಲಕ್​ ವರ್ಮಾ ಕೂಡ 7 ಎಸೆತಗಳನ್ನು ಆಡಿದರು. ಇಂಗ್ಲೆಂಡ್​ ತಂಡದ ನಾಯಕ ಹ್ಯಾರಿ ಬ್ರೂಕ್​ 7 ರನ್​ಗಳಿಗೆ ಔಟಾದರು. ಆರಂಭಿಕ ಆಟಗಾರ ಫಿಲ್​ ಸಾಲ್ಟ್​ ಇನ್ನಿಂಗ್ಸ್​ನ 7ನೇ ಎಸೆತಕ್ಕೆ ಔಟಾದರು. ಅಂತಿಮವಾಗಿ ಟೀಮ್​ ಇಂಡಿಯಾ ಗೆಲುವು ಕಂಡಿದ್ದು ಕೂಡ 7 ರನ್​ಗಳಿಂದ.

ಒಟ್ಟಾರೆಯಾಗಿ ನಿನ್ನೆಯ ಪಂದ್ಯ ಏಳನೇ ನಂಬರ್​ಗಳಿಂದಲೇ ತುಂಬಿತ್ತು. ಎಲ್ಲ ಏಳನೇ ಸಂಖ್ಯೆಯ ಡಾಟ್​ ಕನೆಕ್ಟ್​ ಮಾಡಿದರೆ ಅದು ನೇರವಾಗಿ ಕನೆಕ್ಟ್​ ಆಗೋದು ದಿಗ್ಗಜ ಆಟಗಾರ ಎಂ.ಎಸ್​. ಧೋನಿ ಅವರಿಗೆ. ಅಲ್ಲಿಗೆ, ಎಂ.ಎಸ್​. ಧೋನಿ ಅವರಿಗೆ ನಂಬರ್​ 7 ಲಕ್ಕಿ ಅನ್ನೋದು ಮತ್ತೊಮ್ಮೆ ಸಾಬೀತಾಯ್ತು ಅಂತಾ ಅಭಿಮಾನಿಗಳು ಸಾಮಾಜಿಕ ಜಾಲತಾಣದಲ್ಲಿ ಕಾಮೆಂಟ್​ಗಳ ಸುರಿಮಳೆಗೈಯುತ್ತಿದ್ದಾರೆ.

ಇನ್ನು ಪಂದ್ಯದ ವಿಚಾರಕ್ಕೆ ಬಂದರೆ, ಟಾಸ್ ಗೆದ್ದು ಮೊದಲು ಬೌಲಿಂಗ್ ಆಯ್ಕೆ ಮಾಡಿಕೊಂಡ ಇಂಗ್ಲೆಂಡ್​, ಭಾರತಕ್ಕೆ ಬ್ಯಾಟ್​ ಮಾಡುವಂತೆ ಆಹ್ವಾನಿಸಿತು. ಅಂತೆಯೇ ಬ್ಯಾಟಿಂಗ್ ಮಾಡಿದ ಟೀಮ್ ಇಂಡಿಯಾಗೆ ಸಂಜು ಸ್ಯಾಮ್ಸನ್ (42 ಎಸೆತ 89 ರನ್​) ಇಶಾನ್ ಕಿಶನ್ (39), ​ಶಿವಂ ದುಬೆ (43) ಮತ್ತು ಹಾರ್ದಿಕ್​ ಪಾಂಡ್ಯ (27) ಅವರ ಸ್ಪೋಟಕ ಇನ್ನಿಂಗ್ಸ್​ ತಂಡದ ಮೊತ್ತವನ್ನು 250ರ ಗಡಿದಾಟಿಸಿತು. 20 ಓವರ್​ನಲ್ಲಿ 7 ವಿಕೆಟ್​ ನಷ್ಟಕ್ಕೆ ಭಾರತ 253 ರನ್ ಕಲೆಹಾಕಿತು. ಈ ಬೃಹತ್ ಗುರಿಯನ್ನು ಬೆನ್ನತ್ತಿದ ಇಂಗ್ಲೆಂಡ್​ಗೆ ಆರಂಭದಲ್ಲೇ ಫಿಲ್​ ಸಾಲ್ಟ್​ ಅವರ ವಿಕೆಟ್​ ದೊಡ್ಡ ಸಂಕಷ್ಟಕ್ಕೆ ದೂಡಿತು. ಅವರ ನಂತರದಲ್ಲಿ, ಜಾಸ್​ ಬಟ್ಲರ್​ ಮತ್ತು ನಾಯಕ ಹ್ಯಾರಿ ಬ್ರೂಕ್​ ವಿಕೆಟ್​ಗಳು ಆಂಗ್ಲರಿಗೆ ಸೋಲಿನ ಭೀತಿ ತಂದಿಟ್ಟಿತು. ಇಲ್ಲಿಗೆ ಭಾರತ ಗೆಲ್ಲುವುದು ಬಹುತೇಕ ಖಚಿತ ಎಂದು ಕ್ರಿಕೆಟ್​ ಪ್ರಿಯರು ಖುಷಿಯಾಗಿದ್ದರು. ಆದರೆ, ಟೀಮ್ ಇಂಡಿಯಾ ಅಭಿಮಾನಿಗಳಿಗೆ ಜಾಕೆಬ್​ ಬೆಥಲ್​ ಮತ್ತು ವಿಲ್​ ಜ್ಯಾಕ್ಸ್​ ತಮ್ಮ ಸ್ಫೋಟಕ ಬ್ಯಾಟಿಂಗ್ ಮೂಲಕ ಬಿಗ್​ ಶಾಕ್ ನೀಡಿದರು. ಆದರೆ, ಅಂತಿಮ ಘಟ್ಟದಲ್ಲಿ ಬುಮ್ರಾ ಮತ್ತು ಹಾರ್ದಿಕ್​ ಪಾಂಡ್ಯ ಬೌಲಿಂಗ್ ದಾಳಿ ಆಂಗ್ಲರ ಲೆಕ್ಕಾಚಾರಗಳನ್ನೇ ತಲೆಕೆಳಗಾಗಿಸಿತು.

ಕೊನೆಯ ಓವರ್​ವರೆಗೂ ಹೋದ ಪಂದ್ಯದಲ್ಲಿ ಭಾರತ ರೋಚಕ ಗೆಲುವು ಸಾಧಿಸಿದ್ದು, ಕ್ರೀಡಾಂಗಣದಲ್ಲಿ ತುಂಬಿದ್ದ ಕ್ರಿಕೆಟ್​ ಪ್ರೇಮಿಗಳು ಮತ್ತು ಮಹೇಂದ್ರ ಸಿಂಗ್ ಧೋನಿ, ರೋಹಿತ್ ಶರ್ಮ ಸೇರಿದಂತೆ ಕ್ರಿಕೆಟ್​ ದಿಗ್ಗಜರ ಸಂಭ್ರಮಕ್ಕೆ ಸಾಕ್ಷಿಯಾಯಿತು. ಈ ಪಂದ್ಯವನ್ನು ಕೇವಲ 7 ರನ್​ಗಳಿಂದ ಗೆದ್ದ ಭಾರತ ಈಗ ಫೈನಲ್​ನಲ್ಲಿ ನ್ಯೂಜಿಲೆಂಡ್​ ವಿರುದ್ಧ ಟಿ20 ವಿಶ್ವಕಪ್​​ ಪಟ್ಟಕ್ಕಾಗಿ ಸೆಣಸಲಿದೆ, (ಏಜೆನ್ಸೀಸ್​).