ಚೆಪಾಕ್​ ಸ್ಟೇಡಿಯಂ ಒಳಗೆ ವಿಜಿಲ್​​ ಬ್ಯಾನ್​! ಟಿ20 ವಿಶ್ವಕಪ್​ ಮ್ಯಾಚ್​ ನೋಡಲು ಬಂದ ಫ್ಯಾನ್ಸ್​ಗೆ ಖಾಕಿ ಶಾಕ್​ | Whistle Podu

ತಮಿಳುನಾಡು: ಇಂದು (ಫೆ.08) ಎಂ.ಎ. ಚಿದಂಬರಂ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ನ್ಯೂಜಿಲೆಂಡ್​ ಮತ್ತು ಆಫ್ಘಾನಿಸ್ತಾನ ನಡುವಿನ ಟಿ20 ವಿಶ್ವಕಪ್​ ಪಂದ್ಯ ನೋಡಲು ಆಗಮಿಸಿದ ಕ್ರಿಕೆಟ್​ ಅಭಿಮಾನಿಗಳಿಗೆ ಪೊಲೀಸರ ಎಚ್ಚರಿಕೆ ಭಾರೀ ಬೇಸರ ಮೂಡಿಸಿತು. ಇದಕ್ಕೆ ಕಾರಣ, ಸ್ಟೇಡಿಯಂನೊಳಗೆ ವಿಜಿಲ್ (Whistle Podu)​ ಕೊಂಡೊಯ್ಯುವಂತಿಲ್ಲ ಎಂಬ ವಾರ್ನಿಂಗ್.

ಸ್ಟೇಡಿಯಂನೊಳಗೆ ವಿಜಿಲ್ ಊದುವ​ ಮೂಲಕ ಪಂದ್ಯವನ್ನು ವೀಕ್ಷಿಸುವ ತಮಿಳುನಾಡಿನ ಕ್ರಿಕೆಟ್​ ಅಭಿಮಾನಿಗಳು, ತಾವು ರೂಢಿಸಿಕೊಂಡು ಬಂದಿರುವ ಸಂಪ್ರದಾಯದಂತೆ ವಿಜಿಲ್​ಗಳನ್ನು ಕೊಂಡೊಯ್ದಿದ್ದರು. ಆದರೆ, ಚೆನ್ನೈ ಪೊಲೀಸರು, ಗೇಟ್​ನಲ್ಲೇ ವಿಜಿಲ್​ಗಳನ್ನು ಕಿತ್ತೆಸೆದಿದ್ದು, ಸ್ಥಳೀಯ ರಸ್ತೆಬದಿಯ ವ್ಯಾಪಾರಿಗಳಿಗೆ ಇದರ ಮಾರಾಟವನ್ನು ಮಾಡದಂತೆ ತಿಳಿಸಿರುವುದು ಸದ್ಯ ಅಚ್ಚರಿ ಮೂಡಿಸಿದೆ.

ಚೆನ್ನೈನ ಚೆಪಾಕ್​ ಕ್ರೀಡಾಂಗಣಗಳಲ್ಲಿ ನಡೆಯುವ ಯಾವುದೇ ಪಂದ್ಯವಿರಲಿ, ಅದು ಐಪಿಎಲ್​ ಆಗಿರಲಿ ಅಥವಾ ವಿಶ್ವಕಪ್​ ಇರಲಿ ಕ್ರಿಕೆಟ್​ ಪ್ರಿಯರು ಮಾತ್ರ ವಿಜಿಲ್​ ಪೋಡು ಎಂಬುದನ್ನೂ ಎಂದಿಗೂ ಮರೆಯೋದಿಲ್ಲ. ಇದನ್ನು ತಮ್ಮ ಸಂಪ್ರದಾಯಗಳಲ್ಲಿ ಒಂದು ಎನ್ನುವಂತೆ ಪಾಲಿಸಿಕೊಂಡು ಬಂದಿದ್ದಾರೆ. ಅಂತೆಯೇ, ಭಾನುವಾರದ ಟಿ20 ವಿಶ್ವಕಪ್ ಪಂದ್ಯ ನೋಡಲು ಬಂದಾಗ ಈ ವಿಷಯ ತಿಳಿದು ಕೆರಳಿದ್ದಾರೆ.

ಈ ಗೊಂದಲಕ್ಕೆ ಕುರಿತು ಪ್ರತಿಕ್ರಿಯಿಸಿರುವ ಹಿರಿಯ ಪೊಲೀಸ್​ ಅಧಿಕಾರಿಯೊಬ್ಬರು, ವಿಜಿಲ್​ ತರಬಾರದು ಎಂಬ ನಿಯಮ ಅಥವಾ ನಿರ್ಬಂಧ ಏನೂ ಹಾಕಿಲ್ಲ. ಇದು ನಮ್ಮ ಪೊಲೀಸ್​ ಸಿಬ್ಬಂದಿಗಳಲ್ಲೇ ಆಗಿರುವ ಗೊಂದಲ ಅಷ್ಟೇ ಎಂದು ಹೇಳುವ ಮೂಲಕ ವಿವಾದವನ್ನು ತಪ್ಪಿಸಿದ್ದಾರೆ ಎಂಬುದು ಇಲ್ಲಿ ಸ್ಪಷ್ಟವಾಗಿದೆ.

ಮಹೇಂದ್ರ ಸಿಂಗ್ ಧೋನಿ ಅವರ ನಾಯಕತ್ವದಲ್ಲಿ ಹುಟ್ಟಿಕೊಂಡ ಚೆನ್ನೈ ಸೂಪರ್ ಕಿಂಗ್ಸ್ ತಂಡಕ್ಕೆ ಇಂದು ಅಪಾರ ಸಂಖ್ಯೆಯಲ್ಲಿ ಅಭಿಮಾನಿಗಳಿದ್ದಾರೆ. ಪ್ರತಿಬಾರಿ ಈ ತಂಡ ಐಪಿಎಲ್​ನಲ್ಲಿ ಕಣಕ್ಕಿಳಿದಾಗಲೆಲ್ಲ ಕ್ರಿಕೆಟ್​ ಪ್ರಿಯರು, ವಿಜಿಲ್​ ಪೋಡು ಎಂಬಂತೆ ವಿಜಿಲ್​ಗಳನ್ನು ತಂದಿರುತ್ತಾರೆ. ಅಂತೆಯೇ, ಲೆಕ್ಕವಿಲ್ಲದಷ್ಟು ಶಿಳ್ಳೆಗಳನ್ನು ಊದುತ್ತಾರೆ. ಹೀಗಿರುವಾಗ, ಇದನ್ನೇ ಬೇಡ ಎಂದು ತೆಡೆದಿರುವುದು ಅನೇಕರನ್ನು ಕೆರಳಿಸಿದೆ.

ತಮಿಳುನಾಡು ಚುನಾವಣೆಗೆ ನಿಂತಿರುವ ಕಾಲಿವುಡ್​ ನಟ, ತಮಿಳಗ ವೆಟ್ರಿ ಕಳಗಂ (ಟಿವಿಕೆ) ಪಕ್ಷದ ನಾಯಕ ವಿಜಯ್​ಗೆ, ಚುನಾವಣಾ ಆಯೋಗವು ಅಧಿಕೃತ ಚುನಾವಣಾ ಚಿಹ್ನೆಯಾಗಿ ಸೀಟಿಯನ್ನು ನೀಡಿದ್ದೇ ಪೊಲೀಸರ ಈ ನಿರ್ಧಾರಕ್ಕೆ ಕಾರಣ ಎಂಬ ಮಾತುಗಳು ಕೇಳಿಬಂದಿವೆ. ಇದಕ್ಕೆ ಸೋಷಿಯಲ್ ಮೀಡಿಯಾದಲ್ಲಿ ನೆಟ್ಟಿಗರಿಂದ ಟೀಕೆಗಳು ವ್ಯಕ್ತವಾಗಿದೆ,(ಏಜೆನ್ಸೀಸ್).