ಪಿಎಸ್​ಎಲ್​ನಲ್ಲಿ ಬಿಳಿ ಚೆಂಡು ಪಿಂಕ್​ ಬಣ್ಣಕ್ಕೆ ತಿರುಗಿದ್ದೇಕೆ? ಆಸಿಸ್​ ಕ್ರಿಕೆಟಿಗನ ಹೇಳಿಕೆಯಿಂದ ಪಾಕ್​ ಮಾನ ಹರಾಜು! PSL

PSL : ಪ್ರಸ್ತುತ ನಡೆಯುತ್ತಿರುವ ಪಾಕಿಸ್ತಾನ ಸೂಪರ್ ಲೀಗ್ - 2026ರ ಆವೃತ್ತಿಯು ಕೇವಲ ಚೆಂಡಿನ ವಿಷಯದಿಂದಲೇ ವಿವಾದಕ್ಕೆ ಗುರಿಯಾಗಿದೆ. ನಿನ್ನೆ (ಮಾರ್ಚ್​ 26) ಲಾಹೋರ್ ಖಲಂದರ್ಸ್ ಮತ್ತು ಹೈದರಾಬಾದ್ ಕಿಂಗ್ಸ್‌ಮೆನ್ ತಂಡಗಳ ನಡುವೆ ಲಾಹೋರ್​ನ ಗಡಾಫಿ ಕ್ರೀಡಾಂಗಣದಲ್ಲಿ ನಡೆದ ಪಂದ್ಯದ ವೇಳೆ ಬಿಳಿ ಚೆಂಡು ಆಶ್ಚರ್ಯಕರ ರೀತಿಯಲ್ಲಿ ತಿಳಿ ಗುಲಾಬಿ ಬಣ್ಣಕ್ಕೆ ತಿರುಗಿದ ಬಳಿಕ ಕೆಂಪು ಬಣ್ಣಕ್ಕೆ ಬದಲಾಯಿತು. ಇದನ್ನು ನೋಡಿ ಆಸ್ಟ್ರೇಲಿಯಾದ ಸ್ಟಾರ್ ಆಟಗಾರ ಮಾರ್ನಸ್ ಲುಬುಶೇನ್ ಅಚ್ಚರಿ ವ್ಯಕ್ತಪಡಿಸಿದ್ದಾರೆ.

ಚೆಂಡು ತನ್ನ ಬಣ್ಣ ಬದಲಾಯಿಸಿದ್ದರ ಬಗ್ಗೆ ಮಾತನಾಡಿದ ಹೈದರಾಬಾದ್ ಕಿಂಗ್ಸ್‌ಮೆನ್ಸ್ ತಂಡದ ನಾಯಕ ಹಾಗೂ ಆಸಿಸ್​ ಆಟಗಾರ ಮಾರ್ನಸ್ ಲಬುಶೇನ್​, ತಮ್ಮ ಕ್ರಿಕೆಟ್ ವೃತ್ತಿಜೀವನದಲ್ಲಿ ಚೆಂಡು ಈ ರೀತಿ ಬಣ್ಣ ಬದಲಾಯಿಸುವುದನ್ನು ನಾನು ನೋಡಿಯೇ ಇಲ್ಲ ಎಂದರು.

ವಾಸ್ತವವಾಗಿ, ಎರಡನೇ ಓವರ್‌ನಲ್ಲಿಯೇ ಚೆಂಡು ಬಣ್ಣ ಬದಲಾಯಿಸುವುದನ್ನು ನಾನು ಗಮನಿಸಿದೆ. ನಾನು ಈ ವಿಷಯವನ್ನು ಅಂಪೈರ್‌ಗಳ ಗಮನಕ್ಕೂ ತಂದಿದ್ದೇನೆ. ನಿಜವಾಗಿಯೂ ಏನಾಗುತ್ತಿದೆ? ಚೆಂಡು ಏಕೆ ಬಣ್ಣ ಬದಲಾಯಿಸುತ್ತಿದೆ ಎಂದು ನಾನು ಅಂಪೈರ್‌ಗಳನ್ನು ಪ್ರಶ್ನೆ ಮಾಡಿದೆ. ನಮ್ಮ ಜರ್ಸಿಯ ಮೇಲೆ ಚೆಂಡನ್ನು ಉಜ್ಜಿದ್ದರಿಂದ ಬಣ್ಣ ಅಂಟಿಕೊಂಡಿರಬಹುದೆಂದು ನಾನು ಭಾವಿಸುತ್ತೇನೆ. ಮೊದಲು ಗುಲಾಬಿ, ಆನಂತರದಲ್ಲಿ ಸಂಪೂರ್ಣ ಕೆಂಪು ಬಣ್ಣಕ್ಕೆ ತಿರುಗಿತು ಎಂದು ಲಬುಶೇನ್​ ತಿಳಿಸಿದ್ದಾರೆ.

ಮಾತು ಮುಂದುವರಿಸಿದ ಲಬುಶೇನ್, ಕ್ರಿಕೆಟ್​ನಲ್ಲಿ ಚೆಂಡನ್ನು ಬಟ್ಟೆಯಿಂದ ಒರೆಸುವುದು ಮತ್ತು ಬಟ್ಟೆಯ ಮೇಲೆ ಉಜ್ಜುವುದು ಸಾಮಾನ್ಯ. ಚೆಂಡಿನ ಒಂದು ಭಾಗ ಹೊಳೆಯಲು ಈ ರೀತಿ ಮಾಡಲಾಗುತ್ತದೆ. ಆದರೆ, ನನ್ನ ವೃತ್ತಿಪರ ವೃತ್ತಿಜೀವನದಲ್ಲಿ ಚೆಂಡು ಈ ರೀತಿ ಬಣ್ಣ ಬದಲಾಯಿಸುವುದನ್ನು ನಾನೆಂದಿಗೂ ನೋಡೇ ಇಲ್ಲ. ಆದಾಗ್ಯೂ, ಮುಂಬರುವ ಪಂದ್ಯಗಳಲ್ಲಿ ಇಂತಹ ಘಟನೆಗಳು ನಡೆಯದಂತೆ ಲೀಗ್ ಸಂಘಟಕರು ಎಚ್ಚರಿಕೆ ವಹಿಸುತ್ತಾರೆ ಎಂದು ನಾನು ಭಾವಿಸುತ್ತೇನೆ ಎಂದು ಲಬುಶೇನ್​ ಹೇಳಿದರು.

ಇನ್ನು ಪಂದ್ಯದ ವಿಚಾರಕ್ಕೆ ಬರುವುದಾದರೆ, ಲಾಹೋರ್ ಖಲಂದರ್ ತಂಡವು 69 ರನ್‌ಗಳಿಂದ ಪಂದ್ಯವನ್ನು ಗೆದ್ದುಕೊಂಡಿತು. ಮೊದಲು ಬ್ಯಾಟಿಂಗ್ ಮಾಡಿದ ಲಾಹೋರ್ ಖಲಂದರ್ ತಂಡವು 20 ಓವರ್‌ಗಳಲ್ಲಿ 6 ವಿಕೆಟ್‌ಗಳ ನಷ್ಟಕ್ಕೆ 199 ರನ್ ಗಳಿಸಿತು. ಆರಂಭಿಕ ಫಖರ್ ಜಮಾನ್ (53) ಅರ್ಧಶತಕ ಗಳಿಸಿದರೆ, ಹಸಿಬುಲ್ಲಾ ಖಾನ್ (ಔಟಾಗದೆ 40) ಕೊನೆಯಲ್ಲಿ ಅದ್ಭುತ ಇನ್ನಿಂಗ್ಸ್ ಆಡಿದರು. ಹೈದರಾಬಾದ್ ಕಿಂಗ್ಸ್​ಮೆನ್​ ಪರ ರೈಲಿ ಮೆರೆಡಿತ್ ಮತ್ತು ಹಸನ್ ಖಾನ್ ತಲಾ 2 ವಿಕೆಟ್ ಪಡೆದರು.

ಬ್ಯಾಟಿಂಗ್ ಮಾಡಲು ಬಂದ ಹೈದರಾಬಾದ್ ಕಿಂಗ್ಸ್‌ಮೆನ್ಸ್ ತಂಡವು 20 ಓವರ್‌ಗಳಲ್ಲಿ 130 ರನ್‌ಗಳಿಗೆ ಆಲೌಟ್ ಆಯಿತು. ನಾಯಕ ಲಬುಶೇನ್ (26) ಗರಿಷ್ಠ ಸ್ಕೋರರ್ ಎನಿಸಿಕೊಂಡರು. ಲಾಹೋರ್ ಖಲಂದರ್ ಬೌಲರ್‌ಗಳಾದ ಹ್ಯಾರಿಸ್ ರೌಫ್, ಸಿಕಂದರ್ ರಜಾ ಮತ್ತು ಉಬೈದ್ ಶಾ ತಲಾ ಎರಡು ವಿಕೆಟ್ ಪಡೆದರು. ಇಂದಿನ ಪಂದ್ಯದಲ್ಲಿ ಕ್ವೆಟ್ಟಾ ಗ್ಲಾಡಿಯೇಟರ್ಸ್ ಮತ್ತು ಕರಾಚಿ ಕಿಂಗ್ಸ್ ತಂಡಗಳು ಮುಖಾಮುಖಿಯಾಗಲಿವೆ, (ಏಜೆನ್ಸೀಸ್​).