ಕ್ರಿಕೆಟ್ ಲೋಕದಲ್ಲಿ ಸಂಚಲನ: IPL ಬಗ್ಗೆ ಕೆವಿನ್ ಪೀಟರ್ಸನ್ ನೀಡಿದ ಆ ಒಂದು ಹೇಳಿಕೆ ಈಗ ಭಾರಿ ಚರ್ಚೆ! Kevin Pietersen

Kevin Pietersen : ಇಂಡಿಯನ್ ಪ್ರಿಮಿಯರ್​ ಲೀಗ್​ ( IPL ) ಗಾಗಿ ನನ್ನ ವೃತ್ತಿಜೀವನವನ್ನೇ ತ್ಯಾಗ ಮಾಡಬೇಕಾಯಿತು ಎಂದು ಇಂಗ್ಲೆಂಡ್ ತಂಡದ ಮಾಜಿ ಕ್ರಿಕೆಟಿಗ ಕೆವಿನ್ ಪೀಟರ್ಸನ್ ಬಹಿರಂಗಪಡಿಸಿದ್ದಾರೆ.

ತಮ್ಮ ಅಂತಾರಾಷ್ಟ್ರೀಯ ವೃತ್ತಿಜೀವನದ ಅನಿರೀಕ್ಷಿತ ಅಂತ್ಯದ ಬಗ್ಗೆ ಮಾತನಾಡಿರುವ ಪೀಟರ್ಸನ್​, ಐಪಿಎಲ್​ನಲ್ಲಿ ಆಡುವ ನನ್ನ ನಿರ್ಧಾರವು ಇಂಗ್ಲೆಂಡ್ ಕ್ರಿಕೆಟ್ ಮಂಡಳಿ (ಇಸಿಬಿ) ಜೊತೆ ವಿವಾದಕ್ಕೆ ಕಾರಣವಾಯಿತು ಮತ್ತು ಆ ವಿವಾದವೇ ನನ್ನ ವೃತ್ತಿಜೀವನವನ್ನು ಹಾಳುಮಾಡಿತು ಎಂದು ಪೀಟರ್ಸನ್ ಬಹಿರಂಗಪಡಿಸಿದ್ದಾರೆ. ಇತ್ತೀಚೆಗೆ ಯೂಟ್ಯೂಬರ್​ ರಣವೀರ್ ಅಲ್ಲಾಬಾಡಿಯಾ ಅವರೊಂದಿಗೆ ನಡೆದ ಸಂದರ್ಶನದಲ್ಲಿ ಪೀಟರ್ಸ್​ ಈ ಸಂಗತಿಯನ್ನು ಬಹಿರಂಗಪಡಿಸಿದ್ದಾರೆ.

2009 ರಲ್ಲಿ, ಇಂಗ್ಲೆಂಡ್ ಕ್ರಿಕೆಟ್ ಮಂಡಳಿಯು ಇಂಗ್ಲೆಂಡ್ ಆಟಗಾರರು ಐಪಿಎಲ್‌ನಲ್ಲಿ ಆಡುವುದನ್ನು ಬಲವಾಗಿ ವಿರೋಧಿಸಿತ್ತು. ಆದರೆ, ನಾನು ಐಪಿಎಲ್‌ ಪರ ಧ್ವನಿ ಎತ್ತಿದ್ದಕ್ಕೆ ಹೆಚ್ಚಿನ ಬೆಲೆಯನ್ನು ಪಾವತಿಸಿದ್ದೇನೆ. ನಾನು ದೊಡ್ಡ ತ್ಯಾಗಗಳನ್ನು ಮಾಡಿದ್ದೇನೆ. ನನ್ನ ವೃತ್ತಿಜೀವನವನ್ನು ಸಹ ನಾನು ಹಾಳು ಮಾಡಿಕೊಂಡೆ. ನಾನು ಐಪಿಎಲ್‌ ಪರವಾಗಿ ಮಾತನಾಡಿದ್ದಕ್ಕೆ ಇಂಗ್ಲೆಂಡ್ ಕ್ರಿಕೆಟ್‌ನ ಗಣ್ಯರು ನನ್ನ ವಿರುದ್ಧ ತಿರುಗಿಬಿದ್ದರು ಎಂದು ಪೀಟರ್ಸನ್ ಹೇಳಿದ್ದಾರೆ.

33ನೇ ವಯಸ್ಸಿನಲ್ಲಿ ತನ್ನ ವೃತ್ತಿಜೀವನವನ್ನು ಕೊನೆಗೊಳಿಸದೇ ಇದ್ದಿದ್ದರೆ, ಸುಮಾರು 150 ಟೆಸ್ಟ್‌ಗಳನ್ನು ಆಡುತ್ತಿದ್ದೆ ಮತ್ತು ಸುಮಾರು 13,000 ರನ್‌ಗಳನ್ನು ಗಳಿಸುತ್ತಿದ್ದೆ ಎಂದು ಪೀಟರ್ಸನ್​ ಹೇಳಿದ್ದಾರೆ. ಅಂದಹಾಗೆ, ಪೀಟರ್ಸನ್ ಅವರು 104 ಟೆಸ್ಟ್‌ಗಳಲ್ಲಿ 23 ಶತಕಗಳು ಮತ್ತು 35 ದ್ವಿಶತಕಗಳು ಸೇರಿದಂತೆ 8181 ರನ್‌ಗಳನ್ನು ಗಳಿಸಿದ್ದಾರೆ.

ಅಂದಹಾಗೆ, ನಾನು ನಡೆಸಿದ ಹೋರಾಟದಿಂದಲೇ ಇಂಗ್ಲೆಂಡ್ ಆಟಗಾರರಿಗೆ ಇಂದಿನ ಐಪಿಎಲ್‌ನಲ್ಲಿ ಮುಕ್ತವಾಗಿ ಆಡಲು ಅವಕಾಶ ಸಿಕ್ಕಿತು ಎಂದು ಪೀಟರ್ಸನ್​ ಹೇಳಿದರು. ನಾನು ಒಂದು ದಿನ ಜೋಸ್ ಬಟ್ಲರ್ ಅವರನ್ನು ಸಂದರ್ಶಿಸಿದೆ. ನಾನು ಮಾಡಿದ ತ್ಯಾಗಗಳಿಗೆ ಅವರು ನನಗೆ ಧನ್ಯವಾದ ಅರ್ಪಿಸಿದರು. ನನ್ನ ಹೋರಾಟದಿಂದ ಇಂದಿನ ಆಟಗಾರರು ಪ್ರಯೋಜನ ಪಡೆಯುತ್ತಿದ್ದಾರೆ ಎಂದು ಪೀಟರ್ಸನ್​ ತಿಳಿಸಿದರು.

ಆ ಸಮಯದಲ್ಲಿ ಇಂಗ್ಲೆಂಡ್ ಕ್ರಿಕೆಟ್ ಮಂಡಳಿಯು ದಿ ಟೆಲಿಗ್ರಾಫ್ ನಂತಹ ಮಾಧ್ಯಮಗಳನ್ನು ಬಳಸಿಕೊಂಡು ನನ್ನ ಮೇಲೆ ಅಪಪ್ರಚಾರವನ್ನು ನಡೆಸಿತು. ಆದರೆ, ನಾನೀಗ ಶಾಂತಿಯುತ ಜೀವನವನ್ನು ನಡೆಸುತ್ತಿದ್ದೇನೆ ಮತ್ತು ಇನ್ನು ಮುಂದೆ ಹಿಂದಿನದನ್ನು ಚರ್ಚಿಸಲು ಬಯಸುವುದಿಲ್ಲ ಎಂದು ಪೀಟರ್ನಸ್​ ಹೇಳಿದರು.

ಅಂದಹಾಗೆ, ಪೀಟರ್ಸನ್ 2009 ರಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದೊಂದಿಗೆ ಐಪಿಎಲ್‌ಗೆ ಪಾದಾರ್ಪಣೆ ಮಾಡಿದರು. ಇಂಗ್ಲೆಂಡ್ ತಂಡದಿಂದ ಕೈಬಿಟ್ಟ ನಂತರ, ಈ ಆಟಗಾರ ಪ್ರಪಂಚದಾದ್ಯಂತ ಟಿ20 ಲೀಗ್‌ಗಳಲ್ಲಿ ಸಕ್ರಿಯವಾಗಿ ಪಾಲ್ಗೊಂಡರು. ಇದೀಗ ಅವರು ನೀಡಿರುವ ಹೇಳಿಕೆ ಕ್ರಿಕೆಟ್​ ಲೋಕದಲ್ಲಿ ಭಾರಿ ಸಂಚಲನ ಮೂಡಿಸಿದೆ. ಪೀಟರ್ಸನ್​ ನೀಡಿರುವ ಈ ಹೇಳಿಕೆ ಬಗ್ಗೆ ನಿಮ್ಮ ಅಭಿಪ್ರಾಯ ಏನೆಂದು ಕಾಮೆಂಟ್​ ಮೂಲಕ ನಮ್ಮೊಂದಿಗೆ ಹಂಚಿಕೊಳ್ಳಿ, (ಏಜೆನ್ಸೀಸ್​).