ರಾಹುಲ್​​-ಗೋಯೆಂಕಾ ವಿವಾದ: LSG ಓನರ್​ ಪರ ಬ್ಯಾಟ್​ ಬೀಸಿ, ಕನ್ನಡಿಗನ ಬಗ್ಗೆ ಶಾಕಿಂಗ್​ ಹೇಳಿಕೆ ನೀಡಿದ ಶಮಿ! Mohammed Shami

Mohammed Shami : ಕಳೆದ ಐಪಿಎಲ್​ನಲ್ಲಿ ಸನ್​ ರೈಸರ್ಸ್​ ಹೈದರಾಬಾದ್​ ( SRH ) ತಂಡದಲ್ಲಿದ್ದ ಟೀಮ್​ ಇಂಡಿಯಾದ ಅನುಭವಿ ವೇಗಿ ಮೊಹಮ್ಮದ್​ ಶಮಿ ಈ ಬಾರಿ ಲಖನೌ ಸೂಪರ್ ಜೈಂಟ್ಸ್ ತಂಡದ ಭಾಗವಾಗಿದ್ದು, 2024ರ ಐಪಿಎಲ್ ಆವೃತ್ತಿಯಲ್ಲಿ  ಮಾಲೀಕ ಸಂಜೀವ್ ಗೋಯೆಂಕಾ ಮತ್ತು ಫ್ರಾಂಚೈಸಿಯ ಮಾಜಿ ನಾಯಕ ಕೆಎಲ್ ರಾಹುಲ್ ನಡುವಿನ ವಿವಾದದ ಬಗ್ಗೆ ಶಮಿ ಪ್ರತಿಕ್ರಿಯಿಸಿದ್ದಾರೆ. ಇತ್ತೀಚಿನ ಪಾಡ್‌ಕಾಸ್ಟ್‌ನಲ್ಲಿ ಮಾತನಾಡುತ್ತಾ ಗೋಯೆಂಕಾ ಅವರನ್ನು ಶಮಿ ಸಮರ್ಥಿಸಿಕೊಂಡರು.

ನಾನು, ಗೋಯೆಂಕಾ ಅವರನ್ನು ಎರಡ್ಮೂರು ಬಾರಿ ಭೇಟಿಯಾಗಿದ್ದೆ. ಅವರು ಯಾವಾಗಲೂ ತುಂಬಾ ತಾರ್ಕಿಕವಾಗಿ ಹಾಗೂ ತಂಡದ ಬಗ್ಗೆ ಮಾತ್ರ ಮಾತನಾಡುತ್ತಿದ್ದರು. ತಮ್ಮ ತಂಡದ ಬಗ್ಗೆ ಪೊಸೆಸಿವ್ ಆಗಿರುವುದರಲ್ಲಿ ಯಾವುದೇ ತಪ್ಪಿಲ್ಲ. ಭಾರೀ ಹೂಡಿಕೆ ಮಾಡಿದ ನಂತರ, ಆಟಗಾರರಿಂದ ಅತ್ಯುತ್ತಮ ಪ್ರದರ್ಶನ ನಿರೀಕ್ಷಿಸುವುದು ಸಹಜ. ಯಾರೇ ಆಗಲಿ ತಮ್ಮ ಹಣ ವ್ಯರ್ಥವಾಗುತ್ತದೆ ಎಂದು ಚಿಂತೆ ಮಾಡುತ್ತಾರೆ ಎಂದು ಶಮಿ ಹೇಳಿದರು. ಈ ಮೂಲಕ ಗೋಯೆಂಕಾ ಅವರ ನಡೆಯನ್ನು ಶಮಿ ಸಮರ್ಥನೆ ಮಾಡಿಕೊಂಡರು. 

2024ರ ಐಪಿಎಲ್ ಆವೃತ್ತಿಯಲ್ಲಿ ಸನ್‌ರೈಸರ್ಸ್ ವಿರುದ್ಧದ ಪಂದ್ಯದಲ್ಲಿ ಲಖನೌ ಸೂಪರ್ ಜೈಂಟ್ಸ್ ಹೀನಾಯ ಸೋಲು ಅನುಭವಿಸಿತು. ಎಸ್‌ಆರ್‌ಎಚ್ ತಂಡ ಕೇವಲ 9.4 ಓವರ್‌ಗಳಲ್ಲಿ ವಿಕೆಟ್ ಕಳೆದುಕೊಳ್ಳದೆ 165 ರನ್‌ಗಳ ಗುರಿಯನ್ನು ಬೆನ್ನಟ್ಟಿತು. ಈ ಪಂದ್ಯದ ನಂತರ, ಗೋಯೆಂಕಾ ಅವರು ಮೈದಾನದಲ್ಲೇ ಎಲ್ಲರ ಮುಂದೆ ಕೆಎಲ್ ರಾಹುಲ್ ಅವರ ಜತೆ ವಾಗ್ವಾದ ನಡೆಸಿದರು ಮತ್ತು ಅವರನ್ನು ನಿಂದಿಸಿದರು. ಇದಕ್ಕೆ ಸಂಬಂಧಿಸಿದ ವಿಡಿಯೋಗಳು ಆ ಸಮಯದಲ್ಲಿ ವೈರಲ್ ಆಗಿ, ಭಾರಿ ಟೀಕೆಗೆ ಗುರಿಯಾಗಿದ್ದವು. ಎಷ್ಟೇ ದೊಡ್ಡ ಬಾಸ್ ಆಗಿದ್ದರೂ ಒಬ್ಬ ನಾಯಕನನ್ನು ಸಾರ್ವಜನಿಕವಾಗಿ ಟೀಕಿಸುವುದು ಸರಿಯಲ್ಲ ಎಂದು ಹಲವರು ಅಭಿಪ್ರಾಯ ವ್ಯಕ್ತಪಡಿಸಿದ್ದರು.

ಆದರೆ, ಇದೀಗ ಮೊಹಮ್ಮದ್​ ಶಮಿ ಅವರು ಗೋಯೆಂಕಾ ಅವರನ್ನು ಬೆಂಬಲಿಸಿ ಮಾತನಾಡಿದ್ದು, ಶಮಿ ಅವರ ಮಾತುಗಳು ಕೂಡ ಇದೀಗ ವಿವಾದದ ಸ್ವರೂಪ ಪಡೆದುಕೊಂಡಿದೆ. 

ಅಂದಹಾಗೆ, ಐಪಿಎಲ್ 2026ಕ್ಕೂ ಮೊದಲು ಶಮಿ ಅವರನ್ನು ಎಸ್‌ಆರ್‌ಎಚ್‌ನಿಂದ ಎಲ್‌ಎಸ್‌ಜಿಗೆ ಟ್ರೇಡ್​ ವಿಂಡೋ ಮೂಲಕ ವಿನಿಮಯ ಮಾಡಿಕೊಳ್ಳಲಾಯಿತು. ಐಪಿಎಲ್ 2025ರಲ್ಲಿ ಎಸ್‌ಆರ್‌ಎಚ್, ಶಮಿ ಅವರನ್ನು 10 ಕೋಟಿ ರೂ.ಗೆ ಖರೀದಿಸಿತು. ಆದರೆ ಎಲ್‌ಎಸ್‌ಜಿ, ಅವರನ್ನು ಅದೇ ಬೆಲೆಗೆ ವಿನಿಮಯ ಮಾಡಿಕೊಂಡಿತು. 2013 ರಲ್ಲಿ ಕೆಕೆಆರ್ ಪರ ಪಾದಾರ್ಪಣೆ ಮಾಡಿದ ಶಮಿ, ಡೆಲ್ಲಿ ಕ್ಯಾಪಿಟಲ್ಸ್, ಪಂಜಾಬ್ ಕಿಂಗ್ಸ್, ಗುಜರಾತ್ ಟೈಟಾನ್ಸ್ ಮತ್ತು ಎಸ್‌ಆರ್‌ಎಚ್ ಪರ ಆಡಿದ್ದಾರೆ. ಗುಜರಾತ್ ಟೈಟಾನ್ಸ್ ಪರ 2022 ಮತ್ತು 2023ರ ಸೀಸನ್‌ಗಳಲ್ಲಿ ಕ್ರಮವಾಗಿ 20 ಮತ್ತು 28 ವಿಕೆಟ್‌ಗಳನ್ನು ಕಬಳಿಸಿದರು.

ಲಖನೌದ ಏಕಾನಾ ಸ್ಟೇಡಿಯಂನಲ್ಲಿ ನಿನ್ನೆ (ಏಪ್ರಿಲ್​ 01) ನಡೆದ ಐಪಿಎಲ್​ 19ನೇ ಆವೃತ್ತಿಯ ಐದನೇ ಪಂದ್ಯದಲ್ಲಿ ಲಖನೌ ಸೂಪರ್​ ಜೈಂಟ್ಸ್ ವಿರುದ್ಧ ಡೆಲ್ಲಿ ಕ್ಯಾಪಿಟಲ್ಸ್  ಗೆದ್ದು ಬೀಗಿತು. ​ ಟಾಸ್​ ಗೆದ್ದು ಮೊದಲು ಬ್ಯಾಟ್​ ಮಾಡಿದ ಎಲ್​ಎಸ್​ಜಿ, 18.4 ಓವರ್​ಗೆ ಕೇವಲ 141 ರನ್​ ಕಲೆಹಾಕಿತು. ಈ ಸಾಧಾರಣ ಗುರಿಯನ್ನು ಬೆನ್ನತ್ತಿದ ಅಕ್ಷರ್​ ಪಡೆಗೆ ಆರಂಭಿಕ ಆಘಾತ ಎದುರಾಯಿತು. ಓಪನರ್​ಗಳಾದ ಕೆ.ಎಲ್.​ ರಾಹುಲ್ ಡಕ್​ ಔಟ್​ ಆದರೆ, ಪತ್ತಮ್​ ನಿಸ್ಸಂಕಾ ಒಂದು ರನ್​ಗೆ ಪೆವಿಲಿಯನ್ ಹಾದಿ ಹಿಡಿದರು. ಆರಂಭಿಕರ ಬಳಿಕ ಬಂದ ನಿತೀಶ್​ ರಾಣಾ 15 ರನ್ ಬಾರಿಸಿದರೆ,​ ಅಕ್ಷರ್​ ಪಟೇಲ್​ ಶೂನ್ಯಕ್ಕೆ ಔಟ್​ ಆದರು. ಪವರ್​ಪ್ಲೇ ಹಂತದಲ್ಲಿ ಕೇವಲ 33 ರನ್​ಗೆ 4 ಬಹುಮುಖ್ಯ ವಿಕೆಟ್​ಗಳನ್ನು ಕಳೆದುಕೊಂಡು ಕಂಗಾಲಾಗಿದ್ದ ಡೆಲ್ಲಿ ಕ್ಯಾಪಿಟಲ್ಸ್​ಗೆ ಆಸರೆಯಾಗಿದ್ದ ಸಮೀರ್ ರಿಜ್ವಿ ಮತ್ತು ಟ್ರಿಸ್ಟನ್​ ಸ್ಟಬ್ಸ್​ ಅವರ ಭರ್ಜರಿ ಇನ್ನಿಂಗ್ಸ್​. ಅಂತಿಮವಾಗಿ ಡೆಲ್ಲಿ ಕ್ಯಾಪಿಟಲ್ಸ್​ 17.1 ಓವರ್​ಗಳಲ್ಲಿ 4 ವಿಕೆಟ್​ ನಷ್ಟಕ್ಕೆ ಗುರಿ ಮುಟ್ಟಿತು, (ಏಜೆನ್ಸೀಸ್​).