ಇದೆಂಥಾ ಮಾತು? ಪಾಕ್​ ಸ್ಟಾರ್​ ಕ್ರಿಕೆಟಿಗನ ಮಾನ-ಮರ್ಯಾದೆ ತೆಗೆದ ಮಿಚೆಲ್ ಸ್ಯಾಂಟ್ನರ್! | Mitchell Santner

Mitchell Santner: ಮಾ.08ರಂದು ಅಹಮದಾಬಾದ್​ನ ನರೇಂದ್ರ ಮೋದಿ ಕ್ರೀಡಾಂಗಣದಲ್ಲಿ ನಡೆದ ಟಿ20 ವಿಶ್ವಕಪ್ ಫೈನಲ್​ನಲ್ಲಿ 96 ರನ್​ಗಳಿಂದ ಭಾರತ ಎದುರು ಹೀನಾಯ ಸೋಲುಂಡ ನ್ಯೂಜಿಲೆಂಡ್​, ತಮ್ಮ ಚೊಚ್ಚಲ ಟಿ20 ವಿಶ್ವಕಪ್​ ಟ್ರೋಫಿಗೆ ಮುತ್ತಿಡುವ ಅವಕಾಶವನ್ನು ಎರಡನೇ ಬಾರಿಗೆ ಅಂತಿಮ ಹಣಾಹಣಿಯಲ್ಲಿ ಕಳೆದುಕೊಂಡಿತು. ಇದು ಕಿವೀಸ್​ ಪಡೆಯ ಅಪಾರ ಸಂಖ್ಯೆಯ ಕ್ರಿಕೆಟ್​ ಅಭಿಮಾನಿಗಳ ನಿರಾಶೆಗೆ ಕಾರಣವಾಯಿತು. ಇನ್ನು ಪಂದ್ಯ ಸೋತ ಬಳಿಕ ಹಲವು ವಿಷಯಗಳಿಗೆ ಪ್ರತಿಕ್ರಿಯಿಸಿದ ಕ್ಯಾಪ್ಟನ್ ಮಿಚೆಲ್ ಸ್ಯಾಂಟ್ನರ್​, ಪಾಕ್​ ಪತ್ರಕರ್ತನ ಪ್ರಶ್ನೆಗೆ ಕೊಟ್ಟ ಉತ್ತರ ಸದ್ಯ ನೆಟ್ಟಿಗರ ಹುಬ್ಬೇರಿಸಿದೆ.

ಪಂದ್ಯ ಸೋತ ಬೆನ್ನಲ್ಲೇ ಮಾತನಾಡಿದ ಮಿಚೆಲ್ ಸ್ಯಾಂಟ್ನರ್, ಈ ಪಂದ್ಯವನ್ನು ನಾವು ಸೋತರು ಕೂಡ ನಮಗೆ ತುಂಬಾ ಹೆಮ್ಮೆ ಎನಿಸುತ್ತಿದೆ. ನಾವು ಫೈನಲ್ ತಲುಪಿದ್ದಕ್ಕೆ ಮತ್ತು ನಮ್ಮ ತಂಡದ ಆಟಗಾರರನ್ನು ನೋಡಲು ನನಗೆ ತುಂಬಾ ಹೆಮ್ಮೆಯಾಗುತ್ತಿದೆ ಎಂದರು. ಈ ಮೆಗಾ ಟೂರ್ನಮೆಂಟ್‌ನ ಅಂತ್ಯದಲ್ಲಿ ನಾವು ಕೆಲವು ಸವಾಲುಗಳನ್ನು ಎದುರಿಸಿದೆವು. ಆದಾಗ್ಯೂ, ನಾವು ಪ್ರತಿ ಹಂತದಲ್ಲೂ ಅವುಗಳನ್ನು ಜಯಿಸಿ ಉತ್ತಮ ಪ್ರದರ್ಶನದೊಂದಿಗೆ ಮುನ್ನಡೆದಿದ್ದೇವೆ. ಈ ರಾತ್ರಿ ಲಕ್ಷಾಂತರ ಪ್ರೇಕ್ಷಕರ ಮುಂದೆ, ನಾವು ಉತ್ತಮ ತಂಡದ ಎದುರು ಸೋತಿದ್ದೇವೆ ಎಂದು ಸ್ಯಾಂಟ್ನರ್ ಹೇಳಿದರು.

ಇನ್ನು ಟೀಮ್ ಇಂಡಿಯಾದ ಸ್ಟಾರ್​ ಆರಂಭಿಕ ಬ್ಯಾಟರ್ ಸಂಜು ಸ್ಯಾಮ್ಸನ್​ ಅವರ ಬ್ಯಾಕ್ ಟು ಬ್ಯಾಕ್​ ಅದ್ಭುತ ಇನ್ನಿಂಗ್ಸ್​ ಗಮನಿಸಿದ ಐಸಿಸಿ, ಪ್ಲೇಯರ್​ ಆಫ್​ ದಿ ಟೂರ್ನಮೆಂಟ್​ ಪ್ರಶಸ್ತಿಯನ್ನು ಸಂಜು ಮುಡಿಗೆ ಅರ್ಪಿಸಿತು. ಈ ಅವಾರ್ಡ್​ಗೆ ಸಂಜು ಅರ್ಹ ಆಟಗಾರ ಎಂದೇ ಕ್ರಿಕೆಟ್​ ಪ್ರೇಮಿಗಳು ಸಂತಸ ವ್ಯಕ್ತಪಡಿಸಿದರು. ಆದರೆ, ಇದನ್ನೇ ತನ್ನ ಪ್ರಶ್ನೆಯಾಗಿ ಮುಂದಿಟ್ಟ ಪಾಕ್​ ಪತ್ರಕರ್ತರೊಬ್ಬರು, ಪಾಕಿಸ್ತಾನ ತಂಡದ ಸಾಹಿಬ್‌ಜಾದಾ ಫರ್ಹಾನ್ ಈ ಟೂರ್ನಿಯಲ್ಲಿ 383 ರನ್ ಗಳಿಸಿದ್ದಾರೆ. ಆದರೆ, ಪ್ಲಾಟ್​ (POTT) ಪ್ರಶಸ್ತಿಯನ್ನು ಸಂಜು ಸ್ಯಾಮ್ಸನ್‌ಗೆ ನೀಡಿದ್ದರ ಬಗ್ಗೆ ನೀವೇನು ಹೇಳುತ್ತೀರಿ? ಎಂದು ಸ್ಯಾಟ್ನರ್​ಗೆ ಪ್ರಶ್ನಿಸಿದರು.

ಈ ಪ್ರಶ್ನೆಗೆ ಮುಖಕ್ಕೆ ಹೊಡೆದಂತೆ ಉತ್ತರಿಸಿದ ಸ್ಯಾಂಟ್ನರ್​, ಆಯಾ ಪ್ರಶಸ್ತಿಗಳನ್ನು ಅವರ ಪ್ರದರ್ಶನ ಮತ್ತು ಬೀರಿದ ಪ್ರಭಾವದ ಆಧಾರದ ಮೇಲೆ ನೀಡಲಾಗುತ್ತದೆ. ಇಲ್ಲಿ ಸಂಜು ಸ್ಯಾಮ್ಸನ್​ ಅವರು ಮೂರು ಇನ್ನಿಂಗ್ಸ್​ನಲ್ಲಿ ಅದ್ಭುತ ಬ್ಯಾಟಿಂಗ್ ಪ್ರದರ್ಶನ ನೀಡಿದ್ದಾರೆ. ಆ ಮೂರು ಕೂಡ ಮ್ಯಾಚ್​ ವಿನ್ನಿಂಗ್​ ಇನ್ನಿಂಗ್ಸ್​ಗಳೇ ಆಗಿವೆ. ಅದೇ ಫರ್ಹಾನ್​ ಬಾರಿಸಿರುವುದು ಯುಎಸ್​ಎ, ನೆದರ್​ಲ್ಯಾಂಡ್ಸ್​, ನಮೀಬಿಯಾ ಮತ್ತು ಶ್ರೀಲಂಕಾ ತಂಡಗಳ ಎದುರು ಮಾತ್ರ ಎಂದು ಹೇಳಿದ್ದು, ಪಾಕ್​ ಆಟಗಾರನ ಮಾನ-ಮರ್ಯಾದೆಯನ್ನು ಬಹಿರಂಗವಾಗಿ ತೆಗೆದಂತಾಗಿದೆ ಎಂಬುದರಲ್ಲಿ ಅನುಮಾನವೇ ಬೇಡ,(ಏಜೆನ್ಸೀಸ್).