ಕ್ರಿಕೆಟ್​ ನಿಯಮಗಳಲ್ಲಿ 73 ಬದಲಾವಣೆ ಮಾಡಿದ ಎಂಸಿಸಿ; ಚೆಂಡು-ಬ್ಯಾಟ್​ ರೂಲ್ಸ್​ ತಿದ್ದುಪಡಿ!

"ಕ್ರಿಕೆಟ್​ ನಿಯಮಾವಳಿ'ಯಲ್ಲಿ 2022ರ ಬಳಿಕ ಇದೇ ಮೊದಲ ಬಾರಿಗೆ ಬದಲಾವಣೆ ಮಾಡಿರುವ ಎಂಸಿಸಿ, ಆಧುನಿಕ ಕ್ರಿಕೆಟ್​ಗೆ ಸೂಕ್ತವೆನಿಸುವಂತೆ ಕೆಲ ನಿಯಮಗಳನ್ನು ಪರಿಷ್ಕರಿಸಿದೆ. ಐಸಿಸಿ (ICC) ಈಗಾಗಲೆ ಅಂತಾರಾಷ್ಟ್ರೀಯ ಕ್ರಿಕೆಟ್​ನಲ್ಲಿ ಬಳಕೆಗೆ ತಂದಿರುವ "ಬೌಂಡರಿ ಗೆರೆ ಸಮೀಪದ ಕ್ಯಾಚ್​', "ಶಾರ್ಟ್​ ರನ್​' ನಿಯಮಗಳೂ ಇದರಲ್ಲಿ ಸೇರಿವೆ.

ಕೀಪರ್ಸ್​ ವಿಕೆಟ್​ ಮುಂದೆಯೂ ಚೆಂಡು ಹಿಡಿಯಬಹುದು: ವಿಕೆಟ್​ ಕೀಪರ್​ಗಳು ಬೌಲರ್​ ರನ್​ಅಪ್​ ವೇಳೆ ವಿಕೆಟ್​ ಮುಂದೆ ಗ್ಲೌಸ್​ ತಂದು ಚೆಂಡು ಹಿಡಿದರೆ ಅದನ್ನು ನೋಬಾಲ್​ ಎನ್ನಲಾಗುತ್ತಿತ್ತು. ಚೆಂಡು ಸ್ಟ್ರೆ$ಕರ್​ನ ವಿಕೆಟ್​ ದಾಟುವ, ಬ್ಯಾಟ್​ ಅಥವಾ ಬ್ಯಾಟರ್​ಗೆ ಸ್ಪರ್ಶಿಸುವ ಮುನ್ನ ಕೀಪರ್​ ವಿಕೆಟ್​ನಿಂದ ಮುಂದೆ ಬರಲು ಅವಕಾಶವಿರಲಿಲ್ಲ. ಆದರೆ ಇನ್ನು ಕೀಪರ್​ ಹಾಗೆ ಮಾಡಿದರೂ ಅದು ನೋಬಾಲ್​ ಆಗುವುದಿಲ್ಲ.

ಡೆಡ್​ಬಾಲ್​ ನಿಯಮ ಬದಲು: ಎಸೆತವೊಂದರ ಬಳಿಕ ಚೆಂಡು ಯಾವಾಗ "ಡೆಡ್​' ಆಗಿದೆ ಎಂದು ನಿರ್ಧರಿಸುವ ನಿಯಮವನ್ನೂ ಎಂಸಿಸಿ ತಿದ್ದುಪಡಿ ಮಾಡಿದೆ. "ಡೆಡ್​ಬಾಲ್​' ಎಂದು ಪರಿಗಣಿಸಲು ಅದು ಇನ್ನು ಕೀಪರ್​ ಅಥವಾ ಬೌಲರ್​ ಕೈಸೇರಬೇಕಾಗಿಲ್ಲ. ಅಂತಿಮವಾಗಿ ಫೀಲ್ಡರ್​ ಕೈಯಲ್ಲಿ ಅಥವಾ ನೆಲದ ಮೇಲೆ ಚೆಂಡು ಸ್ಥಿರವಾಗಿ ನಿಂತರೂ ಅದು "ಡೆಡ್​ಬಾಲ್​' ಆಗಲಿದೆ.

ಜೂನಿಯರ್​ ಮತ್ತು ಮಹಿಳಾ ಕ್ರಿಕೆಟ್​ನಲ್ಲಿ ಭಿನ್ನ ತೂಕ ಮತ್ತು ಅಳತೆಯ ಚೆಂಡಿನ ಬಳಕೆಗೆ ಎಂಸಿಸಿ ನಿಯಮ ಬದಲಾವಣೆ ಮಾಡಿದೆ. ಮಹಿಳಾ ಕ್ರಿಕೆಟಿಗರು ಮತ್ತು ಚೆಂಡು ತಯಾರಕರೊಂದಿಗೆ ಚರ್ಚಿಸಿ ಎಂಸಿಸಿ ಈ ಭಿನ್ನ ಚೆಂಡುಗಳನ್ನು ರೂಪಿಸಿದೆ. ಇದರನ್ವಯ ಇನ್ನು ಕ್ರಿಕೆಟ್​ ಚೆಂಡುಗಳು, "ಸೈಜ್​ 1, 2, 3' ಎಂಬ 3 ಭಿನ್ನ ಗಾತ್ರ&ತೂಕಗಳನ್ನು ಹೊಂದಿರಲಿವೆ. ಸೈಜ್​ 1 ಈಗಿರುವ ಚೆಂಡುಗಳೇ ಆಗಿರಲಿದ್ದು, ಪುರುಷರ ಕ್ರಿಕೆಟ್​ನಲ್ಲಿ ಇದರ ಬಳಕೆ ಮುಂದುವರಿಯಲಿದೆ. ಸೈಜ್​ 2 ಮಹಿಳಾ ಕ್ರಿಕೆಟ್​ ಮತ್ತು ಸೈಜ್​ 3 ಜೂನಿಯರ್​ ಕ್ರಿಕೆಟ್​ನಲ್ಲಿ ಬಳಕೆಯಾಗಲಿದೆ.

ಟೆಸ್ಟ್​ ಸಹಿತ ಬಹುದಿನ ಪಂದ್ಯಗಳಲ್ಲಿ ಸದ್ಯ ದಿನದ ಕೊನೇ ಓವರ್​ನಲ್ಲಿ ಮೊದಲ ಎಸೆತದಲ್ಲೇ ವಿಕೆಟ್​ ಬಿದ್ದರೂ, ಆ ಓವರ್​ ಅಲ್ಲಿಗೆ ಸ್ಥಗಿತಗೊಂಡು ದಿನದಾಟ ಮುಕ್ತಾಯಗೊಳ್ಳುತ್ತದೆ. ಆದರೆ ಇನ್ನು ಆ ಓವರ್​ನ ಬಾಕಿ ಎಸೆತಗಳನ್ನೂ ಪೂರ್ಣಗೊಳ್ಳುವುದು ಕಡ್ಡಾಯವಾಗಿರುತ್ತದೆ. ವಿಕೆಟ್​ ಬಿದ್ದಾಗ ಓವರ್​ನ ಕೊನೇ ಎಸೆತವಷ್ಟೇ ಬಾಕಿ ಉಳಿದಿದ್ದರೂ, ಮುಂದಿನ ಬ್ಯಾಟರ್​ ಬಂದು ಆ ಎಸೆತ ಎದುರಿಸಬೇಕಾಗುತ್ತದೆ. ಆದರೆ ಇದು ಭೋಜನ ಅಥವಾ ಚಹಾ ವಿರಾಮಕ್ಕೆ ಮೊದಲಿನ ಕೊನೇ ಓವರ್​ಗೆ ಅನ್ವಯಿಸುವುದಿಲ್ಲ.

ಕ್ರಿಕೆಟ್​ ಬ್ಯಾಟ್​ಗಳಲ್ಲಿ ಹೆಚ್ಚಾಗಿ ಬಳಸಲಾಗುವ ಹಗುರವಾದ "ಇಂಗ್ಲಿಷ್​ ವಿಲ್ಲೋ' ಮರದ ಕೊರತೆಯಿಂದಾಗಿ ಕ್ರಿಕೆಟ್​ ಜಗತ್ತಿನಲ್ಲಿ ಸದ್ಯ ಆ ಮರದ ಬ್ಯಾಟ್​ಗಳ ಅಭಾವ ಉಂಟಾಗಿದೆ ಮತ್ತು ಆ ಬ್ಯಾಟ್​ಗಳ ಬೆಲೆಯೂ ಭಾರಿ ಏರಿಕೆ ಕಂಡಿದೆ. ಇದರಿಂದಾಗಿ ಇನ್ನು ಎಲ್ಲ ವಯೋಮಿತಿಯ ಕ್ರಿಕೆಟ್​ನಲ್ಲೂ ಲ್ಯಾಮಿನೇಟೆಡ್​ ಬ್ಯಾಟ್​ಗಳ ಬಳಕೆಗೆ ಎಂಸಿಸಿ ಅವಕಾಶ ಕಲ್ಪಿಸಿದೆ. ಸದ್ಯ ಜೂನಿಯರ್​ ಕ್ರಿಕೆಟ್​ನಲ್ಲಿ ಮಾತ್ರ ಇದರ ಬಳಕೆಗೆ ಅವಕಾಶ ನೀಡಲಾಗಿತ್ತು. ಇದು ಮೂರು ಮರದ ತುಂಡುಗಳಿಂದ ತಯಾರಿಸಲಾದ (ಟೈಪ್​ ಡಿ) ಬ್ಯಾಟ್​ ಆಗಿದೆ. ಆದರೆ ಅಂತಾರಾಷ್ಟ್ರೀಯ ಕ್ರಿಕೆಟ್​ನಲ್ಲಿ ಮಾತ್ರ ಒಂದೇ ಮರದ ತುಂಡಿನ ಬ್ಯಾಟ್​ ಬಳಕೆ ಮುಂದುವರಿಯಬೇಕೆಂದು ಎಂಸಿಸಿ ಸ್ಪಷ್ಟಪಡಿಸಿದೆ.

ಎಂಸಿಸಿ ಇದೇ ಮೊದಲ ಬಾರಿಗೆ ಓವರ್​ಥ್ರೋ ಬಗ್ಗೆ ವ್ಯಾಖ್ಯಾನ ನೀಡಿದ್ದು, ಬ್ಯಾಟರ್​ ರನ್​ ಕಸಿಯುವುದನ್ನು ತಡೆಯಲು ಅಥವಾ ರನೌಟ್​ ಮಾಡಲು ಯತ್ನಿಸುವಾಗ ವಿಕೆಟ್​ನತ್ತ ಚೆಂಡು ಎಸೆಯುವುದಷ್ಟೇ ಓವರ್​ಥ್ರೋ ಎಂದು ಪರಿಗಣಿಸಲಾಗುತ್ತದೆ. ಚೆಂಡನ್ನು ತಡೆಯುವ ಯತ್ನದಲ್ಲಿ ಮಿಸ್​ಫೀಲ್ಡ್​ ಮಾಡಿದಾಗ ಅಥವಾ ಸಮೀಪದ ಫೀಲ್ಡರ್​ಗೆ ಚೆಂಡನ್ನು ದಾಟಿಸುವುದು ಓವರ್​ಥ್ರೋ ಆಗುವುದಿಲ್ಲ ಎಂದು ಎಂಸಿಸಿ ಸ್ಪಷ್ಟಪಡಿಸಿದೆ.

ಹಿಟ್​ ವಿಕೆಟ್​ ನಿಯಮದಲ್ಲೂ ಎಂಸಿಸಿ ತಿದ್ದುಪಡಿ ತಂದಿದೆ. ಬ್ಯಾಟರ್​ ದೇಹದ ಸಮತೋಲ ತಪ್ಪಿ ತಾನಾಗಿಯೇ ಸ್ಟಂಪ್ಸ್​ ಬೀಳಿಸಿದರೆ ಅದು ಎಂದಿನಂತೆ ಹಿಟ್​ ವಿಕೆಟ್​ ಎನಿಸಲಿದೆ. ಆದರೆ ಬ್ಯಾಟರ್​ ತನ್ನ ದೇಹದ ಸಮತೋಲನ ಕಾಪಾಡುವ ಪ್ರಯತ್ನದಲ್ಲಿ ಫೀಲ್ಡರ್​ ಅಥವಾ ಕೀಪರ್​ಗೆ ಡಿಕ್ಕಿ ಹೊಡೆದಾಗ ಸ್ಟಂಪ್ಸ್​ ಬಿದ್ದರೆ ಅದನ್ನು ಹಿಟ್​ ವಿಕೆಟ್​ ನೀಡಲಾಗುವುದಿಲ್ಲ ಎಂದು ಎಂಸಿಸಿ ವಿವರಿಸಿದೆ.