ಡ್ಯಾಶ್ ಹಾಫ್‌ ಮ್ಯಾರಥಾನ್‌ 2ನೇ ಆವೃತ್ತಿ: ರಾಯಭಾರಿಯಾಗಿ ಮಹಿಳಾ ಕ್ರಿಕೆಟರ್ ಶ್ರೇಯಾಂಕಾ ಪಾಟೀಲ್‌ ಆಯ್ಕೆ

ಬೆಂಗಳೂರು: ಸಿಲಿಕಾನ್‌ ಸಿಟಿಯ ಮ್ಯಾರಥಾನ್ ಪ್ರಿಯರನ್ನು ಒಂದೇ ವೇದಿಕೆಯಡಿ ತರುವ ಡ್ಯಾಶ್‌ ಬೆಂಗಳೂರು ಹಾಫ್‌ ಮ್ಯಾರಥಾನ್‌ (ಡಿಬಿಎಚ್ಎಂ) ಕಾರ್ಯಕ್ರಮದ ಎರಡನೇ ಆವೃತ್ತಿಯು ಬೆಂಗಳೂರಿನ ಹೃದಯಭಾಗದಲ್ಲಿ ಅದ್ದೂರಿಯಾಗಿ ಆಯೋಜನೆಗೊಳ್ಳಲು ಕ್ಷಣಗಣನೆ ಆರಂಭವಾಗಿದೆ. ಕ್ರೀಡಾ ಕಾರ್ಯಕ್ಷಮತೆ, ಸಾಮಾಜಿಕ ಕಳಕಳಿ ಹಾಗೂ ಸಮುದಾಯದ ಸಹಭಾಗಿತ್ವವನ್ನು ಒಳಗೊಂಡ ಈ ವಿಶಿಷ್ಟ ಕ್ರೀಡಾಕೂಟವು ಈ ಬಾರಿ ಕಂಠೀರವ ಕ್ರೀಡಾಂಗಣವನ್ನು ಕೇಂದ್ರವಾಗಿರಿಸಿಕೊಂಡು ನಡೆಯಲಿದೆ.

ಬೆಂಗಳೂರು ರನ್ನರ್ಸ್‌ ಅಸೋಸಿಯೇಷನ್‌ ಸಹಯೋಗದಲ್ಲಿ ನಡೆಯುತ್ತಿರುವ ಈ ಮ್ಯಾರಥಾನ್‌, "ಓಟಗಾರರಿಗಾಗಿ, ಓಟಗಾರರಿಂದಲೇ" ಎಂಬ ಮೂಲ ಆಶಯವನ್ನು ಹೊತ್ತು ನಡೆಯುತ್ತಿದೆ. ಕಂಠೀರವ ಕ್ರೀಡಾಂಗಣದಿಂದ ಆರಂಭವಾಗಲಿರುವ ಮ್ಯಾರಥಾನ್ ನಗರದ ಪ್ರಮುಖ ವಾಣಿಜ್ಯ ವಲಯವಾದ ಸೆಂಟ್ರಲ್‌ ಬಿಸಿನೆಸ್‌ ಡಿಸ್ಟ್ರಿಕ್ಟ್‌ (ಸಿಬಿಡಿ) ಮೂಲಕ ಹಾದುಹೋಗಲಿದ್ದು, ನಗರದ ಐತಿಹಾಸಿಕ ಸೊಬಗು ಹಾಗೂ ಆಧುನಿಕ ನಗರ ಜೀವನದ ಸಂಭ್ರಮವನ್ನು ಓಟಗಾರರಿಗೆ ಕಟ್ಟಿಕೊಡಲಿದೆ.

ಭಾರತ ಮಹಿಳಾ ಕ್ರಿಕೆಟ್‌ ತಂಡದ ಯುವ ಆಟಗಾರ್ತಿ, ಕನ್ನಡಿಗರ ಹೆಮ್ಮೆಯ ಶ್ರೇಯಾಂಕಾ ಪಾಟೀಲ್‌ ಅವರನ್ನು ಈ ಬಾರಿಯ ಮ್ಯಾರಥಾನ್‌ನ ಅಧಿಕೃತ ರಾಯಭಾರಿಯನ್ನಾಗಿ ಘೋಷಿಸಲಾಗಿದೆ. ಅವರ ಛಲ, ಶ್ರಮ ಮತ್ತು ಕ್ರೀಡಾ ಮನೋಭಾವವು ಯುವ ಓಟಗಾರರಿಗೆ ಸ್ಫೂರ್ತಿಯಾಗಲಿದೆ. 

ಕ್ರೀಡೆಯ ಮೂಲಕ ಆರೋಗ್ಯಕರ ಸಮಾಜ ನಿರ್ಮಾಣ ಮತ್ತು ಸಾಮಾಜಿಕ ಬದಲಾವಣೆ ತರುವ ಕನಸು ಹೊಂದಿರುವ ಡ್ಯಾಶ್‌ ಗ್ರೂಪ್‌ನ ಸಂಸ್ಥಾಪಕ ಮತ್ತು ಅಧ್ಯಕ್ಷ ಮಂಜುನಾಥ್‌ ಎನ್‌. ರೆಡ್ಡಿ ಈ ಕುರಿತು ಮಾತನಾಡಿ, "ಓಟವೆಂದರೆ ಕೇವಲ ದೂರ ಕ್ರಮಿಸುವುದಷ್ಟೇ ಅಲ್ಲ, ಅದು ಶಿಸ್ತು, ಸಹಿಷ್ಣುತೆ ಮತ್ತು ಮುನ್ನಡೆಯುವ ದೃಢಸಂಕಲ್ಪದ ಸಂಕೇತವಾಗಿದೆ. ಸಾಮಾನ್ಯ ಓಟಗಾರರಿಗೂ ಕೈಗೆಟುಕುವ ವೆಚ್ಚದಲ್ಲಿ ಅತ್ಯುನ್ನತ ಗುಣಮಟ್ಟದ ಓಟದ ಅನುಭವ ನೀಡುವುದೇ ನಮ್ಮ ಪ್ರಮುಖ ಧ್ಯೇಯ" ಎಂದು ತಿಳಿಸಿದರು.

ಕೇವಲ ಕ್ರೀಡಾಕೂಟಕ್ಕೆ ಸೀಮಿತವಾಗದೆ, ಪರಿಸರ ಸಂರಕ್ಷಣೆಯ ಮಹತ್ತರ ಉದ್ದೇಶವನ್ನೂ ಈ ಮ್ಯಾರಥಾನ್‌ ಹೊಂದಿದೆ. ಒನ್ ರನ್ನರ್‌, ಒನ್‌ ಟ್ರೀ (ಒಬ್ಬ ಓಟಗಾರ, ಒಂದು ಗಿಡ) ಯೋಜನೆಯಡಿ ಪ್ರತಿಯೊಬ್ಬ ಸ್ಪರ್ಧಿಯ ಭಾಗವಹಿಸುವಿಕೆಯ ಹೆಸರಿನಲ್ಲಿ ಒಂದೊಂದು ಸಸಿ ನೆಡಲಾಗುತ್ತದೆ. ಈ ಮೂಲಕ ಆರೋಗ್ಯದ ಜತೆಗೆ ಹಸಿರು ಪರಿಸರ ನಿರ್ಮಾಣಕ್ಕೂ ಕೊಡುಗೆ ನೀಡಲಾಗುವುದು ಎಂದು ಆಯೋಜಕರು ತಿಳಿಸಿದ್ದಾರೆ.

ಈ ಕುರಿತು ಮಂಜುನಾಥ್ ಎನ್ ರೆಡ್ಡಿ ಅವರು, "ಒಂದು ಕಾರ್ಯಕ್ರಮದ ಪ್ರಭಾವವು ಕೇವಲ ಆ ಕಾರ್ಯಕ್ರಮಕ್ಕೆ ಮಾತ್ರ ಸೀಮಿತವಾಗಿರದೆ ಅದಕ್ಕಿಂತ ಹೆಚ್ಚಿದ್ದಾಗ ಮಾತ್ರ ಅದು ಅರ್ಥಪೂರ್ಣವಾಗುತ್ತದೆ. ಪ್ರತಿಯೊಬ್ಬ ಓಟಗಾರರ ಪರವಾಗಿ ಒಂದು ಗಿಡ ನೆಟ್ಟಾಗ ಹಸಿರು ಪರಿಸರ ನಿರ್ಮಾಣಕ್ಕೂ ಕೊಡುಗೆ ನೀಡುತ್ತದೆ. ಸಾವಿರಾರು ಓಟಗಾರರೊಂದಿಗೆ ಇಡುವ ಒಂದು ಸಣ್ಣ ಹೆಜ್ಜೆ ಅರ್ಥಪೂರ್ಣ ಬದಲಾವಣೆ ಆಗುವುದು ಹೀಗೆಯೇ" ಎಂದು ಹೇಳಿದರು.