ರಾಯ್ಪುರ: ಆರ್ಸಿಬಿ (RCB) ವಿರುದ್ಧದ ಪಂದ್ಯದಲ್ಲಿ ಕೆಕೆಆರ್ ಪರ ಕನ್ನಡಿಗ ಮನೀಷ್ ಪಾಂಡೆ (Manish pandey) ಹಿಡಿದ ಟಿಮ್ ಡೇವಿಡ್ ಅವರ ಅದ್ಭುತ ಕ್ಯಾಚ್ ಎಲ್ಲರ ಮನಗೆದ್ದಿದೆ. ಬ್ಯಾಕ್ವರ್ಡ್ ಪಾಯಿಂಟ್ನಲ್ಲಿದ್ದ ಮನೀಷ್, ಎಡಗಡೆಗೆ ಹಾರಿ ಹಿಡಿದ ಕ್ಯಾಚ್ ಎಲ್ಲರಿಗೂ ವಿಸ್ಮಯ ತಂದಿತು. ಬೌಲರ್ ಕಾರ್ತಿಕ್ ತ್ಯಾಗಿ ಕೂಡ ಈ ಹಿಡಿದಿದ್ದನ್ನು ನಂಬಲಾಗದೆ ಅಚ್ಚರಿ ಪಟ್ಟರು.
ಟಿವಿ ಅಂಪೈರ್ ಮರುಪ್ರಸಾರವನ್ನು ಪರಿಶೀಲಿಸಿ ಕ್ಯಾಚ್ ಕ್ಲೀನ್ ಎಂದರು. ಆಗ ಮೈದಾನದಲ್ಲಿದ್ದ ವಿರಾಟ್ ಕೊಹ್ಲಿ ಕೂಡ ಈ ಕ್ಯಾಚ್ ನೋಡಿ ಅಚ್ಚರಿಪಟ್ಟಿದ್ದಲ್ಲದೆ, ಮನೀಷ್ ಪಾಂಡೆ ಅವರನ್ನು ಅಪ್ಪಿ ಅಭಿನಂದಿಸಿದರು. 2008ರಲ್ಲಿ ಕೊಹ್ಲಿ ನಾಯಕತ್ವದಲ್ಲಿ 19 ವಯೋಮಿತಿ ವಿಶ್ವಕಪ್ ಗೆದ್ದ ತಂಡದಲ್ಲಿ ಮನೀಷ್ ಕೂಡ ಇದ್ದರು. ಅಲ್ಲದೆ 2009&10ರಲ್ಲಿ ಇಬ್ಬರೂ ಆರ್ಸಿಬಿ ಪರ ಜತೆಯಾಗಿ ಆಡಿದ್ದರು.
36 ವರ್ಷದ ಮನೀಷ್ ಕಳೆದ 10 ತಿಂಗಳಿನಿಂದ ಹೆಚ್ಚಿನ ಸ್ಪರ್ಧಾತ್ಮಕ ಪಂದ್ಯಗಳನ್ನು ಆಡದ ನಡುವೆಯೂ ಇಂಥ ಚುರುಕುತನ ಉಳಿಸಿಕೊಂಡಿರುವುದು ಕೂಡ ಸಾಮಾಜಿಕ ಜಾಲತಾಣದಲ್ಲಿ ಮೆಚ್ಚುಗೆಗೆ ಪಾತ್ರವಾಗಿದೆ. ವೀಕ್ಷಕ ವಿವರಣೆಕಾರ ಆಕಾಶ್ ಚೋಪ್ರಾ ಇದನ್ನು ಟೂರ್ನಿ ಇತಿಹಾಸದ ಅತ್ಯುತ್ತಮ ಕ್ಯಾಚ್ಗಳಲ್ಲಿ ಒಂದು ಎಂದು ಬಣ್ಣಿಸಿದ್ದಾರೆ.
"ಹಾಲಿ ಆವೃತ್ತಿಯಲ್ಲಿ ಇದುವರೆಗೆ ಸುಮಾರು 175 ಕ್ಯಾಚ್ಗಳು ಕೈಚೆಲ್ಲಲ್ಪಟ್ಟಿವೆ. ಇದರ ನಡುವೆ ಇಂಥ ರತ್ನದಂಥ ಕ್ಯಾಚ್ ನೋಡಲು ಸಿಕ್ಕಿದೆ. ಮನೀಷ್ ಎಡಗೈಯಲ್ಲಿ ಎಷ್ಟು ಅದ್ಭುತವಾಗಿ ಈ ಕ್ಯಾಚ್ ಹಿಡಿದರೆಂದರೆ, ಅಂಪೈರ್ಗಳು ಎರಡೆರಡು ಬಾರಿ ಮರುಪ್ರಸಾರದಲ್ಲಿ ಪರಿಶೀಲಿಸಬೇಕಾಯಿತು. ಇದು ನಿಜಕ್ಕೂ ಮನೀಷ್ ಪಾಂಡೆಯೇ ಅಥವಾ ಗ್ಲೆನ್ ಫಿಲಿಪ್ಸ್ ಅವರೇ ಎಂದೂ ಅಂಪೈರ್ ಪರಿಶೀಲಿಸಿದಂತಿತ್ತು' ಎಂದು ಆಕಾಶ್ ಚೋಪ್ರಾ ಪ್ರಶಂಸಿಸಿದ್ದಾರೆ.
ಐಪಿಎಲ್ನಲ್ಲಿ ಶತಕ ಸಿಡಿಸಿದ ಮೊದಲ ಭಾರತೀಯರೆಂಬ ಹೆಗ್ಗಳಿಕೆ ಹೊಂದಿರುವ ಮನೀಷ್ ಪಾಂಡೆ, ಎಲ್ಲ 19 ಆವೃತ್ತಿ ಆಡಿರುವ ಕೇವಲ ಮೂವರು (ಕೊಹ್ಲಿ, ರೋಹಿತ್ ಶರ್ಮ) ಆಟಗಾರರಲ್ಲಿ ಒಬ್ಬರಾಗಿದ್ದಾರೆ.
