ಈತ ವಿಶ್ವದ ಬೆಸ್ಟ್​​... ಟೆಸ್ಟ್​ ಸರಣಿ ವೈಟ್​ವಾಶ್​ಗೆ​ ಕಾಯುತ್ತಿರುವ ಟೀಮ್ ಇಂಡಿಯಾ ಬೌಲರ್​ನ​​​ ಕೊಂಡಾಡಿದ ಲಂಕಾ ಆಟಗಾರ | Manav Suthar

ಶ್ರೀಲಂಕಾ: ಪ್ರಸಕ್ತ, ಎಸ್‌ಎಸ್‌ಸಿ (SSC) ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ಭಾರತ ಮತ್ತು ಲಂಕಾ ನಡುವಿನ ಎರಡು ಪಂದ್ಯಗಳ ಟೆಸ್ಟ್ ಸರಣಿಯಲ್ಲಿ ಟೀಮ್ ಇಂಡಿಯಾ 1-0 ಅಂತರದಲ್ಲಿ ಮುನ್ನಡೆ ಸಾಧಿಸಿದೆ. ಗಾಲ್ಲೆ ಟೆಸ್ಟ್​ನ ಎರಡನೇ ಪಂದ್ಯವನ್ನೂ ಗೆದ್ದು, ಸರಣಿಯನ್ನು ವೈಟ್​ವಾಶ್​ ಮಾಡಲು ಭಾರತ ತಂಡ ಎದುರುನೋಡುತ್ತಿದೆ. ಈ ಪಂದ್ಯಕ್ಕೂ ಮುನ್ನ ಸಂದರ್ಶನದಲ್ಲಿ ಮಾತನಾಡಿರುವ ಶ್ರೀಲಂಕಾದ ಸ್ಟಾರ್​ ಸ್ಪಿನ್ನರ್​, ಭಾರತ ತಂಡದ ಮಾನವ್​ ಸುತಾರ್​ರನ್ನು (Manav Suthar) ಕೊಂಡಾಡಿದ್ದಾರೆ.  

ಭಾರತದ ಎದುರು ಮೊದಲ ಟೆಸ್ಟ್‌ನ ಪ್ರಥಮ ಇನಿಂಗ್ಸ್‌ನಲ್ಲಿ 7 ವಿಕೆಟ್‌ಗಳನ್ನು ಕಬಳಿಸಿದರೂ ತಂಡದ ಸೋಲನ್ನು ತಡೆಯಲು ಸಾಧ್ಯವಾಗಲಿಲ್ಲ. ಗಾಲ್ಲೆ ಪಿಚ್ ಆರಂಭದಲ್ಲಿ ಬ್ಯಾಟಿಂಗ್‌ಗೆ ಸೂಕ್ತವಾಗಿತ್ತು, ಇದನ್ನು ಸರಿಯಾಗಿ ಡಿಕೋಡ್​ ಮಾಡುವಲ್ಲಿ ಯಶಸ್ವಿಯಾದ ಕೆ.ಎಲ್. ರಾಹುಲ್ ಮತ್ತು ದೇವದತ್ ಪಡಿಕ್ಕಲ್ ಅತ್ಯುತ್ತಮವಾಗಿ ಬ್ಯಾಟಿಂಗ್ ಮಾಡಿ ತಂಡಕ್ಕೆ ಆಸರೆಯಾದರು. ಹೀಗಿರುವಾಗ, ಮುಂದಿನ ಪಂದ್ಯದಲ್ಲಿ ಅಂದರೆ ಎರಡನೇ ಟೆಸ್ಟ್‌ನಲ್ಲಿ ನಾವು ಸ್ಪಷ್ಟ ಪ್ಲ್ಯಾನಿಂಗ್​ನೊಂದಿಗೆ ಬೌಲಿಂಗ್ ಮಾಡಬೇಕಿದೆ ಎಂದು ಪ್ರಭಾತ್​ ಜಯಸೂರ್ಯ ಹೇಳಿದ್ದಾರೆ.

ತಂಡದ ಅನುಭವಿ ಆಟಗಾರರಾದ ಕುಸಲ್ ಮೆಂಡಿಸ್ ಮತ್ತು ದಿನೇಶ್ ಚಂಡಿಮಾಲ್ ಎರಡನೇ ಟೆಸ್ಟ್‌ನಿಂದ ಹೊರಗುಳಿದಿರುವುದು ತಂಡಕ್ಕೆ ಸಂಕಷ್ಟ ಎನ್ನುವಂತಾಗಿದೆ. ಆದರೆ, ಇದು ಯುವ ಆಟಗಾರರಿಗೆ ತಮ್ಮ ಸಾಮರ್ಥ್ಯ ಸಾಬೀತುಪಡಿಸಲು ಸಿಕ್ಕಿರುವ ದೊಡ್ಡ ಅವಕಾಶ. ಟೀಮ್ ಇಂಡಿಯಾ ವಿರುದ್ಧ ಕಮಾಲ್​ ಮಾಡಲು ಒಂದು ಒಳ್ಳೆಯ ಚಾನ್ಸ್ ಎಂಬುದರಲ್ಲಿ ಅನುಮಾನವಿಲ್ಲ ಎಂದು ಹೇಳಿದರು. 

ಟೀಮ್ ಇಂಡಿಯಾ ಪರ ಅತ್ಯುತ್ತಮ ಬೌಲಿಂಗ್ ಮಾಡಿ ಮಿಂಚಿದ ಯುವ ಎಡಗೈ ಸ್ಪಿನ್ನರ್ ಮಾನವ್ ಸುತಾರ್ ಆಟಕ್ಕೆ ನಾನು ಮನಸೋತೆ. ಸುತಾರ್ ವಿಶ್ವದ ಅತ್ಯುತ್ತಮ ಬೌಲರ್‌ಗಳಲ್ಲಿ ಒಬ್ಬರಾಗುವ ಎಲ್ಲ ಅರ್ಹತೆಯನ್ನು ಹೊಂದಿದ್ದಾರೆ. ಸರಿಯಾದ ಲೈನ್ ಮತ್ತು ಲೆಂಥ್​ನಲ್ಲಿ ಸ್ಥಿರವಾಗಿ ಬೌಲಿಂಗ್ ಮಾಡುವ ಅವರ ಶೈಲಿ ನಿಜಕ್ಕೂ ಅದ್ಭುತ" ಎಂದು ಮೆಚ್ಚಿ ಮಾತನಾಡಿದರು. ಸದ್ಯ ಶ್ರೀಲಂಕಾ ಪಡೆಯ ಬೌಲರ್​ನ ಈ ಹೇಳಿಕೆ ಭಾರತೀಯ ಕ್ರಿಕೆಟ್​ ಪ್ರೇಮಿಗಳಲ್ಲಿ ಸಂತಸ ಮೂಡಿಸಿದೆ. 

ಇನ್ನು ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್ ಫೈನಲ್ ತಲುಪುವ ರೇಸ್‌ನಲ್ಲಿದ್ದು, ಮುಂಬರುವ ಪಾಕಿಸ್ತಾನ, ನ್ಯೂಜಿಲೆಂಡ್ ಮತ್ತು ದಕ್ಷಿಣ ಆಫ್ರಿಕಾ ವಿರುದ್ಧದ ಸರಣಿಗಳಲ್ಲಿ ಉತ್ತಮ ಪ್ರದರ್ಶನ ನೀಡುವ ವಿಶ್ವಾಸವನ್ನು ಶ್ರೀಲಂಕಾ ತಂಡ ವ್ಯಕ್ತಪಡಿಸಿದೆ. 

ಭಾರತ ಹಾಗೂ ಶ್ರೀಲಂಕಾ ನಡುವಿನ ಸರಣಿಯ ಮೊದಲ ಟೆಸ್ಟ್​ ಪಂದ್ಯದಲ್ಲಿ ಕೆ.ಎಲ್ ರಾಹುಲ್ ಹಾಗೂ ದೇವದತ್ ಪಡಿಕ್ಕಲ್ ಅವರ ಭರ್ಜರಿ ಬ್ಯಾಟಿಂಗ್ ಹಾಗೂ ಯುವ ಸ್ಪಿನ್ನರ್ ಮಾನವ್ ಸುತಾರ್ ಅವರ ಕಿಲಾಡಿ ಬೌಲಿಂಗ್ ನೆರವಿನಿಂದ ಟೀಮ್ ಇಂಡಿಯಾ ಅತ್ಯಂತ ಸುಲಭ ಜಯ ಸಾಧಿಸಿ, ಸರಣಿಯಲ್ಲಿ 1-0 ಮುನ್ನಡೆ ಕಾಯ್ದುಕೊಂಡಿದೆ. ಎರಡನೇ ಟೆಸ್ಟ್ ಇದೇ ಆ.23ರಿಂದ ಆರಂಭವಾಗಲಿದ್ದು, ವೈಟ್​ವಾಶ್​ ಆಗದೆ ಕಂಬ್ಯಾಕ್ ಮಾಡಲು ಶ್ರೀಲಂಕಾ ಎದುರುನೋಡುತ್ತಿದೆ,(ಏಜೆನ್ಸೀಸ್).