ಐಪಿಎಲ್​ ಆರಂಭ 2 ದಿನ ವಿಳಂಬ? ಮಾರ್ಚ್​ ಮೊದಲ ವಾರ ವೇಳಾಪಟ್ಟಿ ಪ್ರಕಟ ಸಾಧ್ಯತೆ

ಕಳೆದ ಡಿಸೆಂಬರ್​ನಲ್ಲಿ ಅಬುಧಾಬಿಯಲ್ಲಿ ನಡೆದ ಮಿನಿ ಹರಾಜು ಪ್ರಕ್ರಿಯೆಯ ಸಮಯದಲ್ಲಿ ಬಿಸಿಸಿಐ, ಮಾರ್ಚ್​ 26ರಿಂದ (ಗುರುವಾರ) ಮೇ 31ರವರೆಗೆ (ಭಾನುವಾರ) ಐಪಿಎಲ್​ 19ನೇ ಆವೃತ್ತಿ ನಡೆಯಲಿದೆ ಎಂದು ಫ್ರಾಂಚೈಸಿಗಳಿಗೆ ತಿಳಿಸಿತ್ತು. ಆದರೆ ಇದೀಗ ಬಿಸಿಸಿಐ ಎರಡು ತಡವಾಗಿ ಮಾರ್ಚ್​ 28ರ ಶನಿವಾರದಂದು ಉದ್ಘಾಟನಾ ಪಂದ್ಯ ಆಯೋಜಿಸುವ ಚಿಂತನೆಯಲ್ಲಿದೆ. ಮಾರ್ಚ್​ 29ರ ಭಾನುವಾರದಂದು ಕೂಡ ಮೊದಲ ಪಂದ್ಯ ಆಯೋಜಿಸುವ ಬಗ್ಗೆಯೂ ಪರಿಶೀಲನೆಗಳು ನಡೆದಿವೆ.

ಐಪಿಎಲ್​ ಆರಂಭವನ್ನು ಬಿಸಿಸಿಐ ವಿಳಂಬಗೊಳಿಸುತ್ತಿರುವುದು ಯಾಕೆ ಎಂದು ನಿಖರ ಕಾರಣ ತಿಳಿದುಬಂದಿಲ್ಲ. ಆದರೆ ವಾರಾಂತ್ಯದ ದಿನಗಳಲ್ಲಿ ಟೂರ್ನಿಗೆ ಚಾಲನೆ ನೀಡಲು ಬಿಸಿಸಿಐ ಬಯಸಿದೆ ಎನ್ನಲಾಗುತ್ತಿದೆ. ಆದರೆ ಆರಂಭ ವಿಳಂಬವಾಗುವುದರಿಂದ, ಟೂರ್ನಿ ಮುಕ್ತಾಯವೂ 2 ದಿನ ತಡವಾಗುವುದೇ ಎಂಬುದು ಸ್ಪಷ್ಟವಾಗಿಲ್ಲ.

ಏಪ್ರಿಲ್​&ಮೇ ಸಮಯದಲ್ಲೇ ನಡೆಯಲಿರುವ ತಮಿಳುನಾಡು, ಕೇರಳ, ಅಸ್ಸಾಂ ಮತ್ತು ಪಶ್ಚಿಮ ಬಂಗಾಳ ರಾಜ್ಯಗಳ ಚುನಾವಣೆಯ ವೇಳಾಪಟ್ಟಿ ಇನ್ನೂ ಪ್ರಕಟವಾಗದಿರುವ ಕಾರಣ ಬಿಸಿಸಿಐ, ಐಪಿಎಲ್​ ವೇಳಾಪಟ್ಟಿಯನ್ನು ಇನ್ನೂ ಬಿಡುಗಡೆಗೊಳಿಸಿಲ್ಲ. ಐಪಿಎಲ್​ ಪಂದ್ಯ ನಿಗದಿಯಾದ ಸಮಯದಲ್ಲೇ ಕೋಲ್ಕತ, ಚೆನ್ನೈ, ಗುವಾಹಟಿಯಲ್ಲಿ ಪಂದ್ಯಗಳು ನಿಗದಿಯಾದರೆ, ಭದ್ರತಾ ಕಾರಣದಿಂದ ಪಂದ್ಯ ಸ್ಥಳಾಂತರಿಸಬೇಕಾಗುವ ತಾಪತ್ರಯವನ್ನು ತಪ್ಪಿಸುವುದು ಇದರ ಉದ್ದೇಶ. ಹೀಗಾಗಿ ಚುನಾವಣೆ ದಿನಾಂಕ ಘೋಷಣೆಯಾದ ಬಳಿಕ ಅದಕ್ಕೆ ತಕ್ಕಂತೆ ಐಪಿಎಲ್​ ಪಂದ್ಯ ನಿಗದಿಪಡಿಸುವುದು ಬಿಸಿಸಿಐ ಯೋಜನೆ. ಆದರೆ ಚುನಾವಣಾ ಆಯೋಗ ಯಾವಾಗ ದಿನಾಂಕ ಘೋಷಿಸಲಿದೆ ಎಂಬುದು ಇನ್ನೂ ತಿಳಿದುಬಂದಿಲ್ಲ. ಹೀಗಾಗಿ ಬಿಸಿಸಿಐ, ಎರಡು ಹಂತಗಳಲ್ಲಿ ಐಪಿಎಲ್​ ವೇಳಾಪಟ್ಟಿ ಬಿಡುಗಡೆಗೊಳಿಸಲು ಚಿಂತಿಸಿದೆ. 2019ರ ಸಾರ್ವತ್ರಿಕ ಚುನಾವಣೆಯ ಸಮಯದಲ್ಲೂ ಬಿಸಿಸಿಐ ಇದೇ ರೀತಿ 2 ಹಂತಗಳಲ್ಲಿ ಐಪಿಎಲ್​ ವೇಳಾಪಟ್ಟಿ ಪ್ರಕಟಿಸಿತ್ತು. ಮಾರ್ಚ್​ ಮೊದಲ ವಾರದಲ್ಲಿ ಐಪಿಎಲ್​ 19ನೇ ಆವೃತ್ತಿಯ ಭಾಗಶಃ ಅಥವಾ ಸಂಭಾವ್ಯ ವೇಳಾಪಟ್ಟಿಯನ್ನು ಬಿಸಿಸಿಐ ಪ್ರಕಟಿಸುವ ಸಾಧ್ಯತೆ ಇದೆ.